NAMBAR 35 - Pathien Lekhabu Inthieng (BSI)

Levi mihai khawpuihai

¹ Chun, Jeriko zâwn Jordan va- pang, Moab phaia chun LALPAIN Mosie a biek a,

² “Israel thlahai chu thu pe la, an ramahai chun Levi mihai umna ding khuohai siempêk raw hai se; chun, ran tlatna dingin khaw kâwl vêl- hai chu Levi mihai chu i pêk ding a nih.

³ Khuohai chu an umna ding nîng a ta, a vêlhai chu an bâwng le an ran, an thil vai po pohai ta dingin nîng a tih.

⁴ Khaw kâwl Levi mihai i pêk ding chu khaw kula inthawka tawng sâng khata hla a ni ding a nih.

⁵ Kul puotienga inthawkin in- khîng i ta, saktieng pangah tawng sâng hni, simtieng pangah tawng sâng hni; thlangtieng pangah tawng sâng hni, hmârtieng pangah tawng sâng hni, khuo a lai taka umin. Hi hi an khuo khawhnâwm nîng a tih.

⁶ Chun, Levi mihai i pêk ding khuohai chu tuolthathai tlânna dingin himna khuo paruk nîng a ta; chuong naw khawm chu khuo sâwmli pahni i pêk bawk ding a nih.

⁷ Levi mihai i pêk ding khuo po pohai chu khuo sâwmli pariet nîng a tih, an khawhnâwm seng pei leh.

⁸ Israel thlahai ihluo khuo i pêk dân chu a tam deua inthawk chun pe tam deu i ta; a tlâwm deua inthawk chun pe tlâwm i ta, pahnam tinin an hluo ram tam dân i zirin a khuo chu Levi mihai a pêk ding a nih,” tiin.

Insanhimna khawpuihai

⁹ LALPA chun Mosie a biek a, “Israel thlahai hril la, an kuomah,

¹⁰ ‘Jordan vadung in kai a, Kanaan ram in lût pha chun,

¹¹ himna khuo ding in ruot ding a nih, tuolthat paltu tlânna dingin.

¹² Chuong khuohai chu phuba- latua inthawka himna khuohai nîng an ta; pungkhâwmhai hmaa rorêlpêk dinga a ngir hmaa tuolthattu chu a thi nawna dingin.

¹³ Chuongchun, in ta dinga himna khuo in ruothai chu khuo paruk nîng a ta.

¹⁴ Jordan râlah khaw thum ruot in ta, Kanaan ramah khaw thum ruot in ta; himna khuohai nîng an tih.

¹⁵ Israel thlahai le hnam dang le an kuoma chênghai ta dingin hi khuo paruk hi himna khuohai nîng an tih, chutaka chun tukhawm mi that palhai chu an tlân ding a nih.

¹⁶ Amiruokchu, thîr hriemhrei hmanga mi a thawh a, a thi chun, tuolthat a nih, tuolthattu chu suk- hlum ngei ding a nih.

¹⁷ Chun, thina khawpa lunga mi a suk a, a thi chun tuolthat a nih, tuolthattu chu sukhlum ngei ding a nih.

¹⁸ Chun, thi khawpa thinga mi a vuok a, a thi chun tuolthat a nih, tuolthattu chu sukhlum ngei ding a nih.

¹⁹ Thisen phubalatu chun tuol- thattu chu that nghâl el a tih. A hmu pha pha a sukhlum el ding a nih.

²⁰ Chun, mi a theida leia nam rak amanih, inchân rûka dênga a thiin amanih,

²¹ intaina leia a chum hlum amani chun a sukhlumtu chu sukhlum ve ngei nîng a tih; tuolthat a nih, thisen phubalatu chun a hmu pha pha a sukhlum el ding a nih.

²² Amiruokchu, intai lei khawm ni chuong loa, nam thut amanih, chun, inchân ni kher loa dêng amanih,

²³ an um ti khawm hre loa, a hmêlma khawm ni loa, a pawitâwk khawm ni chuong loa, lungin ama- nih a dêng a, mi a lo thi dâm a ni chun,

²⁴ pungkhâwmhaiin hieng rorêlna dân ang hin a sukhlumtu thisen phubalatu ro chu a rêlpêk ding a nih;

²⁵ pungkhâwmhai chun tuolthattu chu thisen phubalatua inthawk chun hum an ta, pungkhâwmhai chun a tlânna, himna khuoa chun inumtir nâwk an ta, hriek inthienga nâl, thiempu lal a thi hmakhat chun chutaka chun a um ding a nih.

²⁶ Amiruokchu, ienglai khawmin tuolthattu chu a tlânna, himna khaw ramri puotieng a feh a,

²⁷ thisen phubalatuin a himna khaw puoa a hmuh a, thisen phu- balatuin a that chun thisena chun thiemnaw chang naw ni;

²⁸ thiempu lal a thi hmakhat chun chu himna khuoa chun a um zing ding a ni leiin; thiempu a thi hnunga ruok chun tuolthattu chu a umna rama chun a kîr nâwk ding a nih.

Tuolthat thua hrepuitu le intlanna dân

²⁹ Hieng thil hi in thlahai chena in umna taphawta in rorêl dân ding chu nîng a tih.

³⁰ Tukhawma mi a that chun tuol- thattu chu hretuhai bâua inthawka thu suokin sukhlum ding a nih; ami- ruokchu, hretu pakhat chau chu, chu chu sukhlumna ding chun a hun nawh.

³¹ Chun, tuolthattu chu in intlan ding a ni nawh, thina khawpa thiem- naw chang a na, sukhlum ngei ding a ni lem.

³² Chun, thiempu thi hma chun a himna khuoa tlân, a rama um nâwk ding intlanna chu in lâk ding a ni nawh.

³³ Chuongchun, in umna ram chu, sukpawrche ding a ni nawh, thisen chun ram chu in sukpawrche sih a, thisen suokna ram pawrche sâwpna ding chun thisen insuotu thisen ngawt naw chu hmang thei a ni si nawh a.

³⁴ In umna ram, ka umna hi in sukpawrche ding a ni nawh, kei LALPA chu Israel thlahai lai hin ka um sih a,’ ti rawh,” tiin.