NAMBAR 30 - Pathien Lekhabu Inthieng (BSI)

Nuhmei thutiemna dân

¹ Mosie chun Israel thlahai ṭhuoituhai chu a biek a, “Hi hi a nih LALPAIN thu a pêk chu.

² Pasalin LALPA kuomah thu a tiem amanih, a lungril thutiema inkhuokhir dinga ân khâm chun a thu chu a bawsiet ding a ni nawh; a bâua suok ta ang po po chun a thaw ding a nih.

³ Nuhmei khawmin a nunghâk laia a pa ina a um laiin LALPA kuom- ah thu a tiem a, a thutiema ân khuokhir a,

⁴ a thutiem le thutiema a lungril a khuokhir chu a pain a hriet a, a pain a tosan el chun a thutiem po po chu puitling a ta; chun, thutiem tinrêng a lungril a khuokhirnahai chu um zing a tih.

⁵ Amiruokchu, a pain a hriet niah a phal naw chun a thutiem- hai, a inkhuokhirna thutiemhai a ieng ieng khawm chu puitling naw nih a, a pain a phal naw a ni leiin LALPAIN ama chu ngaidam a tih.

⁶ Thutiemin amanih, thu dâwn loa intiemnain amanih a del zing laia pasal a nei a,

⁷ a pasalin a hriet a, a hriet nia a to zing chun a thutiem chu um zing a ta, a lungril inkhuokhirna thu dâwn loa a thutiem khawm chu um zing a tih.

⁸ Amiruokchu, a pasal chun a hriet nia a phal naw chun a chunga thu- tiem um le thu dâwn loa ân tiemna chu sukbo a tih; chun, LALPAIN ngaidam a tih.

⁹ Amiruokchu, hmeithai amanih, mâksiet tâwk amanih hai thutiem chu ân tiemna po po chun del zing a tih.

¹⁰ Chun, a pasal inah thu a tiem a, inkhâma a lungril khuokhir dinga thu a thlung a, a pasalin a hriet khawma a to zing a,

¹¹ a phalnaw naw chun a thutiem po po chu um zing a ta, ama ân tiemna tinrêng khawm chu um zing a tih.

¹² Amiruokchu, a pasalin a hriet nia iengkhawm ni loa a siem a, a sukbo el chun a thutiem amanih, ama ân tiemna thua a bâu thu suok taphawt chu um ta naw nih a; a pasal chun a sukbo tah a nih; chun, LALPAIN ama chu ngaidam a tih.

¹³ Thutiem po po le hringna sukrinum dinga khuokhirna in- khâmna po po chu a pasalin a sukhmangin a sukbo thei.

¹⁴ Chuleiin, a pasalin a hriet nia inthawkin a to ṭawk el chun a thutiem tiem ta po po le ân khitna po po chu a suknghet a nih; a hriet nia inthawka a tosan el leiin a suknghet a nih.

¹⁵ Amiruokchu, a hriet ni ni loa a hnunga iengkhawm ni loa a siem a, a sukbo chun a rîtlona maw chu a phur ding a nih,” tiin.

¹⁶ Hieng hi pasal le nuhmei inkâr le pa le a naunu nunghâk laia a pa ina la um zing, inkâra dân dinga LAL- PAIN Mosie thu a pêkhai chu a nih.