MATTHAI 17 - Pathien Lekhabu Inthieng (BSI)

Tlâng chunga a hmêl danglamna

¹ Chun, ni ruk hnung chun Isûn Peter hai, Jakob hai, a unau Johan hai a ṭhuoi a, a tumin tlâng insângtakah a hang fepui a;

² an hmaa chun a hmêl umzie chu a hung danglam tah a; a hmai nisa angin a hung var a; a silfênhai chu vûr angin a hung vâr tah a.

³ Chun, ngai ta, Mosie le Elija chu ama le inbien an kuomah an ngîr a.

⁴ Chun, Peterin Isu a biek a, “Lalpa, ei ta dingin hitaka um hi a ṭha; i nuom chun hitaka hin bâwkte pathum khâwng ka ta; i ta dingin pakhat, Mosie ta dingin pakhat, Elija ta dingin pakhat,” a tih a.

⁵ A la hril lai zingin ngai ta, sûm vârtakin anni a hung hlie tah a; chun, ngai ta, sûma inthawk râwlin, “Hi hi ka Naupa dittak, ka ilâwm bêk bêk chu a nih, ama thu ngai ro,” a ta.

⁶ Inchûktirhai chun chu chu an hrietin bawkkhupin an tluh a, an ṭi ta bêk bêk a.

⁷ Chun, Isûn anni chu a hung them a, “Tho unla, ṭi naw ro,” a ta.

⁸ Chun, an hang dâk a, Isu chau naw chu tukhawm an hmu ta nawh a.

⁹ Chun, tlânga inthawka an ṭum lai chun, Isûn an kuomah, “Mihriem Naupa hi mithi laia inthawka a thonâwk hmakhat chu in thil hmu kha tukhawm hril naw ro,” tiin thu a pêk tah a.

¹⁰ Chun, a inchûktirhaiin a kuomah, “Dân inchûktirtuhaiin ‘Elija a hung hmasa ding a nih,’ iengtiziea ti am an ni leh?” tiin an indawn a.

¹¹ Ama chun, “Elija chu a hung ding hrim a nih, tinrêng siem ṭha bawk a tih.

¹² Nisienlakhawm, ka hril cheu, Elija chu a hung tah a nih, ama chu an hriet nawh a, a chungah an nuom nuomin an thaw ta lem a. Chuong ang bawkin Mihriem Naupa khawm hin annia inthawkin a tuor ve ding a nih,” a ta, a dawn a.

¹³ Chu phingle chun inchûktirhai chun, Baptistu Johan thu an kuomah a hril a ni ti an lo hriet tah a.

Naupang khawhri iman sukdamna

¹⁴ Chun, mipui kuom an hung tlung chun, mi pakhat a kuomah a hung a, a hmaa dingṭhaṭhuonin,

¹⁵ “Lalpa, ka naupa saw lunginsiet rawh, hringawl invawi a na, a tuor nasa êm el; vawi tamtak meiah a tlu hlak, vawi tamtak tuiah a tlu bawk hlak a nih.

¹⁶ I închûktirhai kuomah ka hung ṭhuoi a, an sukdam thei si nawh a,” a ta.

¹⁷ Chun, Isûn, “Ruolthar ringna nei loa kawmawhai, ieng chen am in kuomah um ka tih a, ieng chen am ngai thei ka ti cheu a? Ama chu ka kuoma hin hung ṭhuoi ro,” a ta, a dawn a.

¹⁸ Chun, Isûn khawhri chu a hal a, a sûnga inthawk chun a suok tah a; chu dâr chena inthawk chu naupang chu a hung dam tah a.

¹⁹ Chun, inchûktirhai chu a tumin Isu kuomah an hung a, “Iengdinga keinîn kan hnawt dawk thei naw am a na?” an ta.

²⁰ Ama chun an kuomah, “In ring- na tlâwm leiin. Titakzetin ka hril cheu hi, anṭam mu mal khat ang ringna in nei chun, hi tlâng kuoma hin, ‘Hitaka inthawkin saw taka sawn vân sawn rawh,’ tîng in ta, insawn el a tih; in ta dingin thaw thei naw hrim hrim iengkhawm um naw ni.

²¹ [Amiruokchu, hieng ang hi ṭawngṭai le bunghei chau naw chun a suok thei nawh]”, a ta.

A thi ding thu Isûn a hrillâwk vawihnina

²² Chun, Galili rama an hung inkhâwm laiin, Isûn an kuomah, “Mihriem Naupa hi mihriemhai kuta inmantirin a um ding a nih;

²³ chun, sukhlum an ta, chun, ni thum nia chun keithoin um a tih,” a ta. Chuongchun, an lungngai ta bêk bêk a.

Biekin sie a chawi

²⁴ Chun, Kapernaum chu an hung tlungin biekin tangka dâwltuhai chu Peter kuomah an hung a, “In inchûktirtu hin biekin tangka chu a pêk ve hlak naw am a nih?” an ta. Ama chun, “Pe ve hlak e,” a ta.

²⁵ Chun, inah a va lût chun, Isûn a kuomah, “Simon, iengtin am i ngai a? hnuoia lalhaiin sie amanih, sum nei man amanih, tu kâwl âm an lâk hlak a? an nauhai kuom âm, mi dang kuomah?” tiin a lo hril khal a.

²⁶ Chun, Peterin, “Mi dang kuomah,” a ti phingleh, Isûn a kuomah, “Chuong a ni si chun nauhai chu an âwl ni naw ni.

²⁷ Nisienlakhawm, nang dîlah va fe la, ngakuoi inchie la, nga hung suok hmasa chu man rawh; chun, a bau i keika phingleh tangka pahni hmu el i tih; chu chu la la, kei le nanga ta dingin an kuomah pe rawh, chuong naw chun anni chu suklungawi naw rawi ei tih,” a ta.