LUKA 2 - Pathien Lekhabu Inthieng (BSI)

Isu pieng thu

¹ Chun, Kaisar Augustain khawvêl ram po po hming ziek ding thu a pêk a.

² Chu chu Suria rama Kurini Bawrsâp a ni laia hming ziek hmasa tak chu a nih.

³ Chuongchun, mi po po chu an hming ziek dingin anni khuo sengah an feh a.

⁴ Josef khawm, David sûnghai le a thla a ni leiin, Galili rama Nazareth khuoa inthawka Judai rama David khuo Bethlehem an tia chun a feh a,

⁵ a nuhmei huol Mari, naupai inhlâtak pum le chun an hming ziek dingin.

⁶ Chun, chutaka an um lai chun a naunei chu a hung hun tah a.

⁷ Chun, a nau lutîrah naupasal a nei a; puonin a tuom a, khuolbûkah an inleng ve naw leiin ran bu pêkna thlêngah ân zâltir a.

Berâmpuhai le vântirkohai

⁸ Chun, chu rama ma chun berâm vêngtuhai an um a, zânah an berâm- hai an vêng a, phûlah an rieknghah a.

⁹ Chun, Lalpa vântirko pakhat an kâwlah a hung ngîr a, Lalpa ropuinân an vêl chu a hung sun var a; chuongchun, an ṭi ta bêk bêk a.

¹⁰ Chun, vântirko chun an kuomah, “Ṭi naw unla, ngai ro, mi tin ta ding chanchin ṭha lâwmum bêk bêk ka hung intlun cheu a nih.

¹¹ Vawisûn hin in ta dingin David khuoah Sandamtu a pieng tah, Lal Krista chu.

¹² Chun, hi hi in ta dingin inchik- na ding a nih; naute puona tuom, ran bu pêkna thlênga zâl hmûng in tih,” a ta.

¹³ Chun, kârloin vântirko kuoma chun vâna mihai mipui an hung um ta huk el a, Pathien an inpâk a,

¹⁴ “A chunghnungtakah Pathien ropuitakin um raw se, Hnuoi chunga a ilâwm bêk bêk mihriemhai kuomah inremna thu inlêng raw se,” an tih a.

¹⁵ Chun, vântirkohai chun vân tieng an fe san phingleh, berâm vêngtuhai chun, “Tuhin Bethlehem chenin fe inla, Lalpain thu a mi hril hung tlung chu en ei tiu,” an in tih a.

¹⁶ Chuongchun, an fe vat vat a, Mari le Josef leh, ran bu pêkna thlênga nautê zâl le chun an hmuh a.

¹⁷ Chun, an hmu chun nautê chanchin thu vântirkoin a hril kha an hril vêl a.

¹⁸ Chun, a hre taphawt chun berâm vêngtuhai thu hril chu mak an ti hleh a.

¹⁹ Mari ruok chun thu hril po po chu a lungrilin a ngaituoh a, a vawng zing a.

²⁰ Chun, berâm vêngtuhai chun vântirko hril ang ngeia iengkim an hmua an hriet leiin, Pathien chawimawi le inpâk pei pumin an kîr nâwk tah a.

Isu sertanna

²¹ Chun, a sertanna ding ni riet a hung tling chun, a hminga chun sula a um hma daia vântirkoin a sak tasa ISU an sak a.

Isu Biekinah an inhlân

²² Chun, Mosie dân anga an inthien ni a hung tlung chun ama chu Jerusalemah an hung ṭhuoi a,

²³ Lalpa Dân thua, “Nau lutîr pasal taphawt chu Lalpa ta dinga ruot tîng an tih” ti ziek ang khan,

²⁴ Lalpa kuoma inhlân ding le vaṭhu tuok khat amanih, pârva tê pahni amanih Lalpa Dân thua ziek anga that dingin.

²⁵ Chun, ngai ta, Jerusalema chun mi pakhat a hming Simeon a um a; ama chu mi feltak le Pathien ngaisaktak a na; Israel thlamuongtu ding chu a nghâk zing a, a chungah Thlarau Inthieng a um a.

²⁶ Chun, Lalpa Krista chu a hmu hmakhat chu thi naw ni ti Thlarau Inthiengin a lo inhriettir ta hrim a.

²⁷ Chun, Thlarau inhriettirin Pathien biekina chun a va lût a; nautê Isu chu a nu le a pain Dân pângngai anga a chunga thawpêk dinga an hung ṭhuoi lût lai chun,

²⁸ ama chun a lo pawm a, Pathien ân pâk a;

²⁹ “Lalpa, tuhin i thu ang peiin i suok hi thlamuongtakin în fetir ding a na;

³⁰ I sandamna chu ka mitin a hmu tah a,

³¹ Mi tin mithmua I siem kha;

³² Jentailhai kuoma suklangna var le I mi Israelhai ropuina ding chu,” a ta.

³³ Chun, nautê thu a hril chu a nu le a pa chun mak an ti hleh a.

³⁴ Chun, Simeon chun mal a sâwmpêk a, a nu Mari kuomah, “Ngai rawh, hi naupang hi Israel lai mi tamtak tlûkna ding le ngîrsuokna dinga ruot a nih, mi isawisêl ding inchikna ni bawk dingin:

³⁵ anih, nanga lungril khawm ngûnhnâmin la sun thleng a tih, mi tamtakin an lungrila an ngaituohai chu ân langna dingin,” a ta.

³⁶ Chun, mi pakhat zâwlnei Anna, Phanuel naunu, Aser hnama mi a um a. Ama chu tartak a na, a nunghâk mâka inthawk a pasal leh kum sari a um a.

³⁷ Kum sâwmriet pali zet hmei- thaiin a um a. Ama chun Pathien biekin fesan loin asûn azâna bu nghei dâma ṭawngṭaiin Pathien a biek hlak a.

³⁸ Chun, chu lai tak chun ama chu a hung a, Pathien kuomah lâwmthu a hril a, Jerusalem intlan beiseihai taphawt kuoma chun Isu chanchin a hril a.

Nazaretha an kîr nâwk

³⁹ Chun, Lalpa dân ang peia thil po po an thaw zoin, Galili rama anni khuo Nazaretha chun an kîr nâwk tah a.

⁴⁰ Chun, nautê chu a hung inṭhang lien deu deu a, a hung hrât deu deu a, varnain a sip tah a, Pathien lunginsietna a chungah a um bawk a.

Biekina naupang Isu chu

⁴¹ Chun, kum tinin Fekân Ruoiṭhe hunin a nu le pa chu Jerusalemah an fe hlak a.

⁴² Ama chu kum sâwmpahni a niin ruoiṭhe dân pângngaiin an hang feh a.

⁴³ An ṭumṭieka an hung chun, naupang Isu chun Jerusalemah a um san tah a; a nu le pa chun an hriet si nawh a.

⁴⁴ An intlawnpuihai lai a um ve zing amanih an ta, ni khat lam zet an fe tah a, an laibunghai le an hmêlhriethai lai an zawng a.

⁴⁵ Chun, an hmu naw leiin zawng pei pumin Jerusalemah an kîr nâwk tah a.

⁴⁶ Chun, ni thum chena chun, Pathien biekinah, inchûktirtuhai laia ṭhungin, an thu lo ngai a, lo indawnin an hmu tah a.

⁴⁷ Chun, a thu hre taphawt chun a hrietzie le a dawnzie chu mak an ti hleh a.

⁴⁸ Chun, a nu le pa chun ama an hmu chun mak an ti hleh a, chuongchun, a nu chun a kuomah, “Ka nau, iengdinga hienga i mi thaw? Ngai ta, i pa le keiin thlaphângtakin kan zawng che a nih,” a ta.

⁴⁹ Ama chun an kuomah, “Iengdinga in mi zawng am a na? Ka pa ina ka um ding in hriet naw am a nih?” a ta.

⁵⁰ Chun, an kuoma a thu hril chu a ngaina an hriet nawh a.

⁵¹ Chun, anni chu a zui thlâk a, Nazareth chu a hung tlung a, an thu zâwmin a um a. Chun, a nu chun chuong thil po po chu a lungrilah a vawng zing a.

⁵² Chun, Isu chu a var deu deu a, a hung lien deu deu a, Pathien le mihriem ditsakin a um deu deu a.