JONA 2 - Pathien Lekhabu Inthieng (BSI)

Jona lâwmthu hril ṭawngṭaina

¹ Chun, Jona chu nga phîng sûnga inthawk chun LALPA a Pathien kuoma chun a ṭawngṭai a.

² Hieng ang hin a tih a: “Ka rinumna leiin LALPA chu ka ko a, Ama chun a mi lo dawn a; Seol phîng sûnga inthawk chun ka ko a, Nangin ka râwl chu i hriet a.

³ Inthûktakah tuisuoriet sûngrila chun nang chun i mi peilût a, Tui tamtak chu ka vêlin a um a; I tuifâwnhai le i tui insawkhai po po chun a mi vur pei a.

⁴ Chun, ‘I mithmua inthawka pei suok ka na, Nisienlakhawm, i biekin inthieng tieng ngha nâwk ka tih,’ ka ta.

⁵ Tuihai chun ka hringna chenin an mîn huol vêl a, Tui inthûk chu ka vêlin a um a; Hlohnahai chun ka lu a tuom vêl a nih.

⁶ Tlâng bul tâwp rêthaia chun ka zu feh a, Hnuoi chun kumkhaw ta dingin a kalnahai chun a mi khâr khum a; Amiruokchu, nangin aw LALPA ka Pathien, khursûnga inthawk chun ka hringna chu i lâk suok a nih.

⁷ Ka hringna chu ka sûnga a chau lai chun, LALPA chu ka hriet zing a; Ka ṭawngṭaina chu i biekin inthienga chun i kuomah a hung tlung a nih.

⁸ Thil teplo khêl thu mei mei ngaituotuhai chun, An ta dinga ngilneina chu an nghatsan a nih.

⁹ Kei ruok chun lâwmthu hrilna râwl leh i kuomah inthâwina inhlân ka ta; Thu ka tiem ta chu hlen ka ta, Sandamna chu LALPA ta a nih,” tiin.

¹⁰ Chun, LALPA chun nga chu a biek a, Jona chu khawmuolah a luok suok tah a.