INPÂKNA HLABU 97 - Pathien Lekhabu Inthieng (BSI)

Lalpa ram le a thilthawtheina

¹ LALPA chu Lalah a ṭhung a, hi hnuoi hi hlimtakin um sienla, Thlierkâr tamtak takhai chu lâwmtakin um raw se.

² Sûmhai le inthim sâmup hi a vêlah a um a, Felna le rorêlna fel chu a lalṭhungpha innghatna a nih.

³ A hma tieng chun mei a feh a, A vêla ama dotuhai chu a kâng hmang hlak.

⁴ A kâwlinlephai chun khawvêl hi a el zawt zawt a, Hnuoi hin a hmuh a, ân thin a.

⁵ Tlânghai chu khuoihlu ang hin LALPA hmaah an intui hmang tah a, Khawvêl po po LALPA hmaa chun.

⁶ Vânhai khin a felna chu a tlânginsampui hlak a, Mi tinrêng chun a ropuizie an hmu tah a.

⁷ Milim siemfâwmhai rawngbâwl- tuhai po po chu muolphoin um raw se, Milimhai suongtuhai chu: Nangni pathien po pohai, ama chibai bûk ro.

⁸ Zion tlâng chun a hriet a, lâwmtakin a um a; Juda naunuhai chu hlimtakin an um bawk a, Aw LALPA, i rorêlnahai leiin.

⁹ LALPA, nang chu hnuoi chung po poa hin a chunghnungtak i ni sih a, Nang chu pathien po po chung daia chawimawiin i um a.

¹⁰ Aw LALPA hmangaituhai, suol chu theida ro, Ama chun a mi inthienghai hringna chu a vawng ṭha hlak a; Anni chu mi rilohai kuta inthawkin a sanhim hlak.

¹¹ Mi fel ta ding chun var hi thêpêk a ni hlak, Lungril indiktak puttu ta ding chun lâwmna thêpêk a ni bawk hlak.

¹² Mi felhai, LALPAA chun lâwmtakin um unla, A hming inthieng chu inpâk ro.