INPÂKNA HLABU 88 - Pathien Lekhabu Inthieng (BSI)

Thinaa inthawka sansuokna dinga ṭawngṭâina Hla, Kora naupahai Inpâkna Hla: Hla ṭhuoitu ta dingin; Mahalath-Leannotha sak ding. Ezrah mi Heman Maskil

¹ Aw LALPA, a mi sandamtu Pathien, A sûn a zânin i hmaah ka khêk hlak a:

² Ka ṭawngṭaina hi i hmaah lût sienla, Ka khêkriah i na hung sit rawh.

³ Ka hringna hi lunginzîngna- haiin a sip a, Ka hringna hin Seol chu a hung hnai ta sih a.

⁴ Khursûnga zu fehai laia tiemsa ka na, Hrâtna hrim hrim neilo mi ang ka nih.

⁵ Râl thathai thlâna zâlhai anga, Mithi laia pei thlâk ka nih, Chuonghai chu i hriet ta nawh, I kuta inthawka sukbohmang an nih.

⁶ Khursûng hnuoihnungtakah i mîn zâltir tah a. Hmun inthimtak, inthûktakahai chun.

⁷ I lunginsenna chun a mi del tlat a, Nangin i tuifâwn po po chun i mi sukrinum tah a.

⁸ Ka hmêlhriethai chu keia hlatah în umtir a, An ta dinga tirdakumtakah i mi siem tah a; Khârkhumin ka um a, ka suok thei naw a nih.

⁹ Rinumna leiin ka mit a se tieu tieu a, Aw LALPA, ni tin ka ko cheh a, Nanga tieng ka kuthai ka phar a.

¹⁰ Mithihai ta ding chun thilmak i thaw ding am a nih? Thi tahnunghai chun thoin an inpâk ding che am a nih?

¹¹ I zainêmzie chu thlâna inhriettirin, I ringumzie chu Bohmangna hmuna inhriettirin a um ding am a nih?

¹² I thilmak thawhai chu inthimah inhriettirin a um ding am a nih? I felna chu theinghilna ramah hrietin a um bawk ding am a nih?

¹³ Aw LALPA, kei ruok chun ka ko cheh a, Ka ṭawngṭaina chun zîngkâr tuok a ti che.

¹⁴ LALPA, iengdinga ka hringna hi i thlauthlâk am a na? Iengdinga keia tienga i hmai i thup am a na?

¹⁵ Ka naupangtea inthawk rinum tuor le, thi vâng vângin ka um hlak a, I thil râpthlâktakhai ka tuorin ka thaah a mi man hlak.

¹⁶ I lunginsen nasatak chun a mi chîm tlum a, I thil râpthlâktakhai chun a mi sukbohmang tah a.

¹⁷ Chuongchun, sûnnithlâkin tui angin an mi vêl a, An mîn huol vêl tâwl a,

¹⁸ A mi hmangaitu le ka ruol chu a mi hlatah în umtir tah a, Ka hmêlhriethai chu inthimah în umtir ta bawk a.