INPÂKNA HLABU 8 - Pathien Lekhabu Inthieng (BSI)

Pathien ropuina le mihriem chawimawina Hla ṭhuoitu ta ding: Gittith le sak ding. David Inpâkna Hla

¹ Aw LALPA, kan LALPA, Hnuoi chung po poa hin i hming chu a va ṭha de! I ropuina chu vân chungahai khin i sieh a.

² I hmêlma le phubalatu sukdeina dingin, Nangma dotuhai lei chun, Nautehai le nêne ne laihai bau suok chun hrâtna i sukdet a.

³ I vân, i kutsuokhai, Thla le arasi i ruothai khi ka ngaituo châng chun,

⁴ Mihriem hi ieng am a na, i hriet zing hlak a na? Mihriem naupa khawm hi ieng am a nih a i kan hlak a na? ka ti hlak.

⁵ Ama chu Pathien nêka inhnuoi deu chauin i siem a, Ropuina le chawimawina în khumtir sih a.

⁶ I kutsuokhai chunga hin thu în neitir a; A ke hnuoiahai iengkim i sieh a:

⁷ Berâm le bâwnghai po po leh, Anih, ramsahai khawm chu;

⁸ Chunglêng vate le tuisuoriet ngahai, Tuisuoriet lampuia fehai po leh;

⁹ Aw LALPA, kan LALPA, Hnuoi chung po poa hin i hming a va ṭha de!