INPÂKNA HLABU 74 - Pathien Lekhabu Inthieng (BSI)

Pathien mipuihai hmêlmahai dopui dinga ngênna Asaph Maskil

¹ Aw Pathien Iengdinga kumkhuoa i mi thlauthlâk am a na? Iengdinga i ran tlatna hmuna berâmhai chunga hin i lungsen a khûk am a na?

² I mihai inkhâwmhai, inhmaha i închâwk, Hnam i ro dinga i întlan kha, hre zing rawh; I umna hlak Zion tlâng leh.

³ Kumkhaw rêmna tieng chun i ke khai la, Dotuhaiin hmun inthienga chun thil suol tinrêng an thaw ta hi.

⁴ Nangma dotuhai chu i mihai inkhâwmhai laia chun an hawhaw dur dur a, An inchiknahai chu inchikna dingin an khai tah a.

⁵ Mi, rampui thing, Hreipuia tinhai angin an inlang a.

⁶ Tuhin chu a thil kermawihai po po chu, Hreite le tubauhaiin an suksiet zo tah a.

⁷ I hmun inthieng chu an rawh a, I hming umna khawm chu leihnuoi ichîm khawp hielin an sukkhawhlo tah a.

⁸ An lungrila chun, “Sukse vawng tâwl ei tiu,” an tih a, Hi rama Pathien inkhâwmna in po po hi an raw siet zo tah.

⁹ Kan inchiknahai chu kan hmu ta nawh a, Zâwlnei hrim hrim an um ta nawh a, A sâwt dingzie hre hrim hrim khawm keini lai an um nawh.

¹⁰ Aw Pathien, dotu chun ieng chen am a hrilsiet ding che? Hmêlma chun kumkhuoin i hming hi a hrilsiet ding am a nih?

¹¹ Iengdinga i kut, i kut changtieng kha i lâk kîr am a na? Kei dawk nâwk la, anni chu sukbohmang rawh.

¹² Nisienlakhawm, Pathien chu inhma chena ka Lal a nih, Hnuoi laitaka sandamna siemhlaktu chu.

¹³ Nang chun i hrâtnain tuisuoriet kha i sukṭheh a, Nang chun tuia drakonhai luhai chu i sukkawi a.

¹⁴ Nang chun Leviathan luhai chu i suknâwi a, Ama chu thlalêra umhai kuoma chun bu dingin i pêk a,

¹⁵ Nang chun tuihnâr le tuilien chu în ṭhe huk a, Nang chun vadung lientak takhai chu i sukkang a.

¹⁶ Sûn hi i ta a na, zân khawm i ta a nih; Nangin êntu le nisa khi i buotsai a.

¹⁷ Nangin leihnuoi ramrihai po po chu i khang vawng a, Nangin nipui le thlasik hi i siem a.

¹⁸ Aw LALPA, hi hi hre zing rawh, dotu chun a hrilsiet cheh a. Hnam invêttak chun i hming an hrilsiet kha.

¹⁹ Aw, i vaṭhu hringna hi ram sahrâng kuoma chun pe lul naw la, I mi rimsihai hringna hi kumkhuo chun theinghil lul naw rawh.

²⁰ Thuthlung kha hung pawisa la, Hnuoi hmun inthim lai chu nunsietnain a sip sih a.

²¹ Aw, nêksâwrna tuortuhai chu muolphoin kîr naw sienla, Rimsi le pasiehai chun i hming inpâk raw se.

²² Aw Pathien, tho la, nangma thu chu nangin inhril fâwm la, Mi invêt chun sûnnithlâkin a hrilsietzie che chu hre zing rawh.

²³ Nangma dotuhai ri chu theinghil naw la, Nangma dotuhai ri so insâng zuol pei chu.