INPÂKNA HLABU 7 - Pathien Lekhabu Inthieng (BSI)

Rorêlna indik dinga ṭawngṭâina David Siggaion Hla, Benjamin mi Kusa thuhril chungchâng thuha ama bawkin LALPA chawimawia a sak chu.

¹ Aw LALPA ka Pathien, nangmaa chun ka ringna kân nghat a, A mi hnawttuhai po poa inthawk hin mi sandamin, mi humhim rawh.

² Chuong naw chun, sanhimtu um loin, sakeibaknei angin, Ka hringna hi keinawiin, sawisa rawi an tih.

³ Aw LALPA ka Pathien, hi hi thaw ka lo nih a, Ka kutah suolna um a lo nih a,

⁴ Kei le inremtaka um chu suola thung ka lo ni chun, (Anih, san nei loa a mi dotuhai hi ka sanhim a ni lem a nih)

⁵ Hmêlma chun ka hringna chu hnawtin, hnawt phâk el raw se; Anih, ka hringna hi hnuoia chun chîlthluin, Ka ropuina hi pilvut lai sie el raw se.

⁶ Aw LALPA, lunginsenin tho la, A mi dotuhai lunginsenna doin inthawk la, Ka ta dingin insukhar la, rorêl- na ding thu i pêk ta sih a.

⁷ Chuongchun, mi tin inkhâwm- hai chun inhuol vêl hai sienla che. Chun, nang chu an chungah chungtieng chun kîr nâwk rawh.

⁸ LALPA chun mi tin chungah ro a rêl hlak; Aw LALPA, keimaa felna le, ka lungrila ṭhatna um ang peiin ro mi rêlpêk la;

⁹ Aw mi rilohai rîtlona chu hung tâwp ta sienla, mi felhai ruok chu sukdet rawh. Pathien feltak chun lungrilhai le lungvarhai chu a fie hlak sih a.

¹⁰ Ka phaw chu Pathien kuomah a um a; Ama chu lungril indiktak put sandamtu a nih.

¹¹ Pathien chu rorêltu feltak a na, Anih, ni tina mi suolhai chunga lungninawna nei hlak Pathien a nih.

¹² Mi chu a nghakîr naw chun ama chun a kâwlhnâm tâtngei a ta, A thalngul chu a kuoi a, a siemrêl tah a.

¹³ Thina hriemhreihai chu ama thatna dingin a siem diem ta bawk a; A thalhai chu chawk theiin a siem a.

¹⁴ En ta, suolna hasein a um a, Anih, thil suksuolna a vawn a, khêlthu a nei tah a.

¹⁵ Khur a siem a, inthûktakin a cho a, Ama hum siema chun a tla tah a.

¹⁶ A thil suksuolna chu ama lu chung ngeia chun hung kîr nâwk a ta, Nunsetaka a thilthaw chu ama lusîpa ngei hung tlâng a tih.

¹⁷ LALPA chu a felna lei hin a kuomah lâwmthu hril ka ta, LALPA Achunghnungtak hming inpâkin sak bawk ka tih.