INPÂKNA HLABU 34 - Pathien Lekhabu Inthieng (BSI)

Sukrinumnaa inthawka sansuokna leia inpâkna David Inpâkna Hla. Abimelek hmaa a um dân ân sukdanglam a, amain a lo hnawtdawk laia mi.

¹ Ienglai khawmin LALPA chu inpâk ka ta, Ama inpâkna chu ka bauah suok rawp a tih.

² Ka hringna hin LALPA chu sawng a ta, Mi rimsihai chun chu chu hrieng an ta, lâwm an tih.

³ Aw LALPA chu mîn pâkpui unla, A hming chu chawimawi seng ei tiu.

⁴ LALPA chu ka zawng a, chun, ama chun a mi dawn a. Ka iṭi po poa inthawk chun a mi sanhim tah.

⁵ Ama an en a, chun, an hung var suok tah a, An hmêlhai chu iengtika khawm inzak naw ni.

⁶ Hi mi rimsi hi a khêk a, LALPA chun a lo hriet a, A lunginzîngna po poa chun a sansuok tah a.

⁷ Ama ṭîtuhai chu an vêla chun LALPA vântirko chun a um nghah a. A sanhim hlak.

⁸ Aw LALPA ṭhatzie chu intem sin hrim ta u: Amaa ringna innghattu chu a hamṭha.

⁹ Aw, a mi inthienghai, LALPA chu ṭi unla, Ama ṭîtuhai ta ding chun tlâksamna hrim hrim a um si nawh.

¹⁰ Sakeibaknei vânglaihai chu an tlasamin an phîng a ṭâm hlak a: LALPA zawngtuhai ruok chun thil ṭha hrim hrim tlasam naw ni hai.

¹¹ Hung ro, naupanghai ka thu ngai ta u, LALPA ṭi dân lo inchûktir ka ti cheu.

¹² Thilṭha a hmu theina dinga hringna dita, Dam sâwt ngaina mi chu tu am a na?

¹³ I lei chu suola inthawkin vêngṭha la, I hmûr chu hlêmna thu hril lo dingin.

¹⁴ Suol chu fe san la, thil ṭha thaw rawh; Inremna zawng la, a hnawtin hnawt rawh.

¹⁵ LALPA mit chun mi felhai tieng a en hlak a, Ama chun an khêk hre dingin a ngai zing hlak.

¹⁶ LALPA hmêl chun thil suk- suoltuhai chu a do hlak a, Anni hriet zingna chu hnuoia inthawka sukbohmang dingin.

¹⁷ Mi felhai chu an khêk a; LALPA chun a lo hriet a, An lunginzîngna po poa chun a sansuok tah a.

¹⁸ LALPA chun lungrila lung- riem ithlâkhai chu a hnai hlak a, Lungrila insîrhai po chu a sandam hlak.

¹⁹ Mi fel rinumnahai chu a tam a, Nisienlakhawm, chuong po poa chun LALPAIN a sansuok hlak.

²⁰ A ru po po a vawng ṭhah a, Pakhat khawm sukthliek a ni nawh.

²¹ Thil ṭha nawin mi rilohai chu sukhlum a ta, Mi fel theidatuhai chun thiemnaw chang an tih.

²² LALPA chun a siehlawhai hringna chu ân tlan hlak a, Amaa ringna innghattuhai chu pakhat khawm thiemnaw chang um naw ni hai.