INPÂKNA HLABU 16 - Pathien Lekhabu Inthieng (BSI)

Ro hlutak chu David Miktam

¹ Aw Pathien, mi humhim rawh, nangmaa chun ka ringna kân nghat si hlak a.

² LALPA kuoma chun, “Nang chu ka LALPA i na, Nangmaa naw chun thil ṭha hrim ka nei nawh,” ka tih a.

³ Hnuoia mi inthieng umhai thua chu, Anni chu mi ṭha, ka lâwmna po po umnahai chu an nih.

⁴ LALPAA pathien dang thleng- tuhai chu an lungngainahai la pung a tih, An thisen inhlân dâwn mihai chu dâwn ve naw ningah a, Ka hmûr khawma an hminghai lam bawk naw ning.

⁵ LALPA chu ka rochan ding le ka no chan ding chu a na, Nangin ka chanpuol i mi sukdetpêk hlak.

⁶ Inkhina hruihai chu hmun inhawitakhaiah ka puolin a tla ta hlau a nih, Anih, ro ṭhatak ka hluo tah a nih.

⁷ LALPA, rem mi ruotpêktu chu inpâk ka ta, Anih, zânahai chun ka lungrilin a mi thunun hlak.

⁸ LALPA chu ka hmaah kân umtir rawp hlak a, Ka changtieng a um leiin inhnîng naw ning.

⁹ Chuleiin, ka lungril hi a lâwm a, ka ropuina khawm a hlim a; Ka taksa khawm himtakin um a tih.

¹⁰ Ka thlarau chu Seol kuomah i mâksan âwm si nawh a, I mi inthieng hi hmawnna hmu i phal âwm bawk si nawh a.

¹¹ Nangin hringna lampui chu min hriettir i ta, I hmaa chun hlima sipliemna a um a; I kut changtienga chun kumkhaw lâwmna ding a um.