INPÂKNA HLABU 132 - Pathien Lekhabu Inthieng (BSI)

Hmun Inthieng chunga malsâwmna dinga ṭawngṭâina Kai Hla.

¹ LALPA, David chu a rinumtuorna po po Hrietpui la.

² LALPA kuoma ṭawng inkhâma, Jakob Mi Hrât kuoma thu a tiemzie kha:

³ “Ka umna inah lût dêr naw ning a, Ka khumah kai bawk naw ning a.

⁴ Ka mithai hi insîm phal naw ning a, Ka mit vunhai hi insîm phal bawk naw ning ah.

⁵ LALPA hmun ding ka zawng suok hmakhat chun, Jakob Mi Hrât umna ding chu,” tiin.

⁶ Ngai ta, a thu chu Ephrathaah kan hriet a, Rampui phûla chun kan hmu tah a.

⁷ Ama umnaahai chun lût ei ta, A ke innghatna bula chun chibai bûk ei tih.

⁸ Aw LALPA, tho la, i châwl hmun dinga chun lût rawh, Nang le i hrâtna bâwm leh.

⁹ I thiempuhai chu felnain inthuom sienla, I mi inthienghai chu hlimin khêk raw hai se.

¹⁰ I siehlaw David leiin, I hriek nâl hmêl chu innghat kîrtir naw rawh.

¹¹ LALPA chun David kuomah thutakin ṭawng ân khâm tah a, Chu chu nghatsan naw nih. “I taksa raa mi i lalṭhungphaa chun inṭhungtir ka ta;

¹² I nauhai chun ka thuthlung le, Ka thuinhriettir, anni ka lân chûktir ding chu, an zâwm chun, An nauhai khawm kumkhawtluongin i lalṭhungphaa chun ṭhung pei an tih,” tiin.

¹³ LALPA chun Zion chu a thlang sih a; A umna dingin a dit a nih.

¹⁴ “Hi hi kumkhuoa dinga ka châwl hmun ding a nih, Hitaka hin um zing ka tih, ka nuom zâwng a ni sih a.

¹⁵ A fâk ding chu malsâwm rei rui ka ta, A mi rimsihai chu beiin sukkhawp ka tih.

¹⁶ A thiempuhai chu sandamnain inthuom ka ta, A mi inthienghai chu hlimin khêk khêk an tih.

¹⁷ Chutaka chun David ki chu inder suoktir ka ta, Ka hriek nâl ta ding chun khâwnvar ka ruot tah a.

¹⁸ Ama dotuhai chu muolphonain inthuom ka ta, Ama chunga ruok chun a lallu- khum chu tle sur a tih,” tiin.