INPÂKNA HLABU 12 - Pathien Lekhabu Inthieng (BSI)

Mi riloa inthawka himna dinga ngênna Hla ṭhuoitu ta dingin: Seminith le sak ding. David Inpâkna Hla.

¹ LALPA, mi ṭhangpui rawh, Pathien ngaisak mi an um ta si nawh a, Mihriem nauhai laia hin mi ringum chu an bo ta sih a.

² Mi tin chun an vênghai kuomah thu teplo mei mei an hril hlak sih a; Mi inpâk tehlêmna hmûr le, hlêmna lungril putin thu an hril hlak a;

³ LALPA chun inpâk tehlêmna hmûr po po chu ât thlâng a ta, Thu chapotak hrilna lei le chun.

⁴ Anni chun, “Ei lei hin hnêng ei ta, Ei hmûrhai hi eini ta ngei a ni annâwm, tu am ie ei chunga lala um chu?” an ti hlak.

⁵ LALPA chun, “Rimsihai an nêksâwr lei le, pasiehai inrûm lei chun, Tho nghâl el ka ta, An innuisan chu himtakin inumtir ka tih,” a tih a.

⁶ LALPA thuhai hi thu inthieng- tak a na, Tangka hnuoi chunga rawtuina meia fieh a, Vawi sari sukthieng ta hnung ang hi a nih.

⁷ Aw LALPA, anni chu nangin vawng ṭhâng i ta, Hieng ṭhangtharhaia inthawk hin kumkhuoin humhim tâng i tih.

⁸ Mihriem nauhai lai hin suolna chu chawimawia a umin, Mi rilohai chu an invâk vêl ruoi hlak.