ESTHER 7 - Pathien Lekhabu Inthieng (BSI)

Haman thiltum suksieta a um thu le ama chu khâi hluma a um thu

¹ Chuongchun, lal le Haman chu lalnu Estherin thlaithlêng a buotsai chu an awt tah a.

² Chun, uoin dâwn huna a ni hni ni chun lal chun Esther kuoma chun, “I hnina ieng am a na, lalnu Esther? Phalpêk ni ngei i tih, i ingên chu ieng am a na? Ram chenve rau khawm ni sienla thaw pei nîng a tih,” a ti nâwk a.

³ Chun, lalnu Esther chun a dâwn a, “I mithmua hin ditsak tlâk ka na, aw lalpa, lal ṭhati zâwng a ni chun; ka ingêna hin ka chipuihai le, ka ihnia hin keima hringna ngei hi hla ni el raw se:

⁴ sukchimit ding le, that ding le, sukbohmang ding sa, kei le ka chipuihai hi zawr kan ni ta sih a. Amiruokchu, siehlawpahai, siehlaw- nuhai ding ang dâma zawr ni inlang chu, lal sietna ding chu hmêlma chun a thung zo naw ding khawma, ka to ṭawk ṭawk ding a na,” a ta.

⁵ Chun, lal Ahasuer chun a biek a, lalnu Esther kuoma chun, “Chuong ang thil a lungrila thaw ngam chu khawlai am a um a? Ama chu tu am a na?” a ta.

⁶ Esther chun, “Hmêlma le khing- pui chu hi mi rilotak Haman hi a nih,” a ta. Chuongchun, Haman chu lal le lalnu hmaa chun a ṭi tah a.

⁷ Chun, lal chu a lunginsen chun uoin dâwn lai chu a tho a, lal in huona chun a va fe tah a; chun, lalnu Esther kuoma a hringna ta dinga ngên dingin Haman khawm chu a ngîr tah a; a chunga chun thiltum ṭha nawtak lal chun a nei ti a hmu ta sih a.

⁸ Chun, lal chu lal in huona in- thawk chun uoin dâwnna hmuna chun a hung kîr nâwk a; Esther umna ṭhungpha chunga chun Haman chu a bawkkhup a. Chun, lal chun, “Ina hin ka hmaa ngei khawm lalnu chu a sukpawrche ding a ni maw?” a ta. Lal baua inthawka thu a hung suok ta lei chun, Haman hmai chu an inkhum tah a.

⁹ Chun, lal hmaa um hlak, mi tillâkhai laia mi pakhat Harbona chun, “Ngai ta, lal ta dinga thu ṭha hriltu Mordekai ta dinga khaihlumna tawng sâwmngaa insâng Hamanin a siem chu, Haman ina khun ân phun a nih,” a ta.

¹⁰ Chun, lal chun, “Chutaka chun ama kha khai hlum ro,” a ta. Chuong- chun, Mordekai ta dinga khaihlumna a buotsaia chun Haman chu an khai hlum tah a. Chun, lal lunginsen chu a hung dam tah a.