DÂN PAHNINA 34 - Pathien Lekhabu Inthieng (BSI)

Mosie thi thu

¹ Chun, Mosie chu Moab phaia inthawkin Jeriko zâwna Nebo tlâng, Pisga tlâng sîpa chun a hang lâwn a. LALPA chun Gilead ram po po, Dan chenin ân entir a;

² Naphtali le Ephraim ram po po, Manasse le Juda ram po po, a thlangtieng tuisuoriet chen;

³ Sim ram le tûm khawpui, Jeriko phai ruom, Zoar chenin.

⁴ Chun, LALPAIN a kuomah, “Hi ram hi a nih, Abraham hai, Isak hai, Jakob hai kuoma, ‘In thlahai la pêng ka tih,’ tia inkhâma ka lo tiem kha; a hmu chu kân hmutir phawt che a na; nisienlakhawm, chutaka chun fe naw ti ni,” a ta.

⁵ Chuongchun, LALPA siehlaw Mosie chu LALPA thu angin Moab rama chun a thi tah a.

⁶ Chun, Beth-peor zâwnah Moab rama ruomah a phûm a; nisien- lakhawm, a thlân chu tu chen hin tukhawma an hriet nawh.

⁷ Mosie chu a thi chun kum za le sâwmhni mi a nih; a mit ân thim nawh a, a tha khawm a ṭhum chuong nawh.

⁸ Israel thlahai chun Mosie chu Moab phaia chun ni sâwmthum an ṭah a; chuongchun, Mosie sûna ṭap nihai chu a hung tâwp tah a.

⁹ Chun, Nun naupa Josua chu varna thlarauin a sip a, Mosie chun a chungah a kut ân nghat leiin; chun, Israel thlahai chun a thu an zâwm a, LALPAIN Mosie thu a pêk ang chun an thawh a.

¹⁰ Chutaka inthawk chu Israelhai lai chun Mosie anga LALPAIN hmai- san meua a biek zâwlnei hrim hrim an hung um ta nawh a,

¹¹ inchiknahai po po le, thilmak po pohai, Pharao le a siehlawhai po po kuoma le Aigupta ram po poa inen- tira,

¹² kut hrâttak le ṭiumtak tak dâma Israel mi po pohai mithmua Mosien a thaw ang thaw ve hlak chu.