DÂN PAHNINA 25 - Pathien Lekhabu Inthieng (BSI)

¹ “Mi an inkhing a, rorêlnaah an feh a, rorêltuhaiin an lo rêlpêk a, mi fel chu thiem an inchangtir a, mi suol chu thiemnaw an inchangtir a ni chun,

² mi suol chu vuok âwm a ni chun rorêltu chun inzâltir a ta, a hmaah ân vuoktir ding a nih, a suol dân izirin vuok zât ding bi chu thliek nîng a tih.

³ Vawi sâwmli chena vuok thei nîng a ta, chu nêka tam lem chu ni loin; hi nêka tam lem vuok chun in unau chu muolpho taluo rawi a tih.

⁴ Sebâwngchalin bu a chîl laiin a hmûr in khit ding a ni nawh.

Unau nuhmei inhluo sâwng

⁵ “Urêng um hai sienla, naupasal nei loin anni laia mi chu thi sienla, a thi nuhmei chun puo tienga mi, mi dang a nei ding a ni nawh; a pasal unau chun ama chu hluong a ta, nuhmeiah nei a ta, pasal unau thaw ding chu a chungah a thaw ding a nih.

⁶ A nau pasal neipêk hmasa tak chun Israelhai lai a hming a bo nawna dingin a unau thi tahnung hming chu a put ding a nih.

⁷ Ama chun a unaupa nuhmei chu nei a nuom naw chun, a unaupa nuhmei chu kul kawtkhârah upahai kuomah hang fêng a ta, ‘Ka pasal unaupa chun Israelhai lai a unau hming chu inumtir pei a nuom naw a, pasal unaupa thaw ding chu ka chungah a thaw nuom nawh,’ a hang ti ding a nih.

⁸ Chuongchun, an khuo upahai chun ama chu ko an ta, bieng an ta, chun ama chun, ‘Ka nei nuom naw a nih,’ tiha a ṭhang tlat chun, a unaupa nuhmei chun upahai hmaa chun hang pan a ta,

⁹ a kekawk hlîppêk a ta, a hmaiah chil sâk a ta, ‘A unaupa sûngkuo indin nuom nawtu chunga chun hieng anga thaw hi ni pei raw se,’ tîng a ta, a dawn ding a nih.

¹⁰ Chuongchun, ‘Kekawk hlippêk sûngkuo’ tiin Israelhai laia chun a hming inputtir ding nîng a tih.

Dân danghai

¹¹ “Mi insuol hai sienla, pakhat lem nuhmei chun ân suolpuia inthawka a pasal sansuok dingin a zamawah keipêk sienla,

¹² a kut chu in tanpêk ding a nih, in lunginsiet hlawl ding a ni nawh.

¹³ “In ipa chun bûkna chi dang dang, a rik le a zâng in nei ding a ni nawh.

¹⁴ In ina khawm inkhina chi dang dang a lien le a chîn in kawl ding a ni nawh.

¹⁵ Inkhina indiktak le feltak in nei ding a nih; chuongchun, LALPAIN ram a pêk cheua hin in dam sâwt ding a nih.

¹⁶ Chuong ang thil thawtu, fel- nawtaka thawtuhai po po chu LALPA in Pathien ngaiin tirdakum an nih.

Amalek sukbohmang dinga thupêk

¹⁷ “Aigupta rama inthawka in hung suokna lampuia Amalek mihai lo thaw dân cheu kha hre zing ro;

¹⁸ Pathien khawm ṭi loin in châu lai le in ngui laia lampuia a lo tuok cheu a, nangni laia hnung tienga a hnufuolhai po po a lo thaw dân kha.

¹⁹ Chuleiin, LALPA in Pathienin hluo dinga ram a pêk pha cheua in vêla in hmêlmahai po po laia in- thawka LALPA in Pathienin râl- muongna a pêk pha cheu chun vânkhuphnuoia Amalek mihai hriet zingna chu in sukbo dêr ding a nih; in theinghil dêr ding a ni nawh.