DÂN PAHNINA 23 - Pathien Lekhabu Inthieng (BSI)

Mi pungkhâwmhai laia tiemsa lohai

¹ “Mi, a tilmu kawi le a zamaw intan chu LALPA mihai pung- khâwmhai lai a ṭhang ding a ni nawh.

² “Sâwn chu LALPA mihai pung- khâwmhai lai chun a ṭhang ding a ni nawh, a thlahai khawm suon sâwmna chenin LALPA mihai pungkhâwmhai lai chun an ṭhang ding a ni nawh.

³ “Ammon mihai le Moab mihai chu LALPA mihai pungkhâwmhai lai chun an ṭhang ding a ni nawh. Suon sâwmna chenin anni laia mi chu LALPA mihai pungkhâwmhai lai an ṭhang ding a ni nawh;

⁴ Aigupta rama inthawka in hung suok laia bei le tuia an lo tuok naw cheu leiin le, ṭawngsie inphur ding cheua Mesopotamia rama Pethor khuoa Beor naupa Balaam an ruoi lei khan.

⁵ Nisienlakhawm, LALPA in Pathien chun Balaam thu chu a pawm nuom nawh a, LALPA in Pathien chun a hmangai cheu leiin LALPA in Pathien chun ṭawngsie chu in ta dingin malsâwmnaah ân chang- tir lem tah a.

⁶ In dam sûng po chu anni leh inremna le an tluongtlungna iengtika khawm in ngaituopui ding a ni nawh.

⁷ “Edom mihai chu in thîm ding a ni nawh, in unauhai an ni sih a; Aigupta mihai chu in thîm ding a ni nawh, an rama chun in va mikhuol ta leiin.

⁸ An thlahai chu suon thumnaa inthawkin LALPA mihai pungkhâwm- hai laia chun an ṭhang ding a nih.

Indona riebûk inthiengna

⁹ “In hmêlmahai thawha in va riekna hmuna chun thil ṭha naw tin- rênga inthawkin in insiekieng ding a nih.

¹⁰ Nangni lai tukhawm zâna a khata thil suok leia lo pawrche tah an um chun, riebûka inthawk chun suok a ta, riebûka chun a lût nâwk ding a ni nawh.

¹¹ Amiruokchu, khuo a hung zân- tieng chun insil a ta, chun, nisa tlâk chun riebûka chun a lût nawk ding a nih.

¹² Riebûk puotieng chun hmun ruot in ta, chutaka chun in fe hlak ding a nih.

¹³ In hmangruohai lai chun suo- dûr nei in ta; chu chun in vân ṭhungna ding chu cho khur in ta, in hîng thak chu in vur ding a nih;

¹⁴ LALPA in Pathien chu in rie- bûkah nangni sanhim ding le in hmêlmahai pe ding cheuin a hung ṭhang ve pei hlak sih a, chuleiin, in riebûk chu ân thieng ding a nih; chuong naw chun nangni lai thiltir- dakum hmûng a ta, fesan el rawi a ti cheu.

Dân dang dang

¹⁵ “Siehlaw, in kuoma an pu hung tlânsuoksan chu in pêk lêt nâwk ding a ni nawh.

¹⁶ In umnaa an dittak an ithlang ang taphawta chun nangni lai an um ve el ding a nih; in nêksâwr ding a ni nawh.

¹⁷ “Israel naunuhmeihai lai naw- chizawr an um ding a ni nawh a, Israel naupasalhai lai pasal inzawr an um ding a ni bawk nawh.

¹⁸ Nawchizawr man amanih, ui man amanih, thutiemna dingin LALPA in Pathien inah in chawi ding a ni nawh; a ieng ieng khawm chu LALPA in Pathien ngaiin thil tirdakum a nih.

¹⁹ “A pung hnawtin in unauhai in inpûktir ding a ni nawh; tangka tienga pung amanih, fâk ding tienga pung amanih, iengkhawm a pung hnawta inpûktir taphawt chu.

²⁰ Ram dang mi chu a pung hnawt- in inpûktir thei in tih; nisienla- khawm, in unauhai chu a pung hnawtin in inpûktir ding a ni nawh; chuongchun, in va hluo ding rama in kutsuok po poah LALPA in Pathienin mal a sâwm ding cheu a nih.

²¹ “LALPA in Pathien kuoma thu in tiemin sâwt riel loin pêk nghâl ding a nih; LALPA in Pathien chun a phût âwm ngei si cheu a, in ta dingin suol ni el a tih.

²² Thutiem kawnga in insûm chun suol ni naw nih.

²³ In baua suok ta chu in thaw ngei ding a nih; nuomthua thilinhlân in baua in tiem LALPA in Pathien kuoma in tiem ang peiin.

²⁴ “In tuolbâwmhai grêp huona in fein in dittâwkin in fâk thei a; amiruokchu, in paikâwngah in khum ding a ni nawh.

²⁵ In tuolbâwmhai bu ngîr lai hmuna chun in fein a vui chu in thliek thei a, amiruokchu, in tuolbâwmhai bu ngîr laia chun kâwite in ruoi ding a ni nawh.