DÂN PAHNINA 19 - Pathien Lekhabu Inthieng (BSI)

Insanhimna khawpui, ramri hluihai

¹ “LALPA in Pathienin an ram a pêk cheu hnam LALPAIN a sukboa, in hluo a, an khuohaia dâm, an inhaia dâm in um pha chun,

² LALPA in Pathienin hluo dinga a pêk cheu rama chun khuo pathum in ruot ding a nih.

³ Tuolthat taphawt an tlânlûtna dingin, LALPAIN ân hluotir ding cheu ram chu hmun thumah ṭhêng in ta, in ramrihai siem in ta, lampuihai in buotsai ding a nih.

⁴ Tuolthathai chutaka tlânlûta him theihai chu hienghai hi an nih; miin a tuolbâwm kha hmaa theidâna khawm nei chuong loa that paltu hai,

⁵ mi a tuolbâwm le thing phûr dinga rama fea thing phûr dinga hrei a hang inlet a, hreipui tlawngin a tuolbâwm chu dênghlum el ta anghai hi, chu laia khuo pakhata chun tlân a ta, him a tih;

⁶ chuong naw chun thisen phuba latu chun a lunginsen inling laia tuolthattu chu hnawtin, lampui kâr a hlat leiin va hnawtphâkin va vaw- hlum hlau rawi a tih, tuta hmaa theidânahai nei chuong lo a ni leiin thi âwm a ni si nawh a.

⁷ Chuleiin, ‘Khuo pathum in ta dingin in ruot ding a nih,’ tiin thu ka pêk cheu a nih.

⁸ “Chun, LALPA in Pathienin in pi le puhai kuoma ṭawng a lo inkhâm anga in pi le puhai pêk a lo tiem ram chu a pêk cheu a,

⁹ LALPA in Pathien chu hmangai ding le a lampui hraw rawp dinga a thupêk po po, tuta thu ka pêk cheu hi in pawm a, in ram chu a suklien chun khuo pathum bâka hin in ta dingin khuo pathum dang belsa nâwk in tih;

¹⁰ LALPAIN hluo dinga a pêk cheu in ram sûnga pawitâwk lo thisen insuo a um nawh a, in chunga thisen a um nawna dingin.

¹¹ Amiruokchu, miin a tuolbâwm chu a theida a, ân chân a, a thawh a, thi khawp raka a vuok a, chu khuo laia pakhata chun a tlân chun,

¹² an khuo upahaiin mi tir sienla, chutaka inthawk chun va ṭhuoi hai sienla, sukhlum dingin thisen phuba latu kutah inhlân raw se.

¹³ In lunginsiet ding a ni nawh a, in ta dinga ṭha dingin Israel rama inthawka pawitâwk lo thisen insuona chu in sukbo ding a nih.

¹⁴ “LALPA in Pathienin in hluo dinga a pêk cheu ram, in hluo ding rama a hmaa an lo phun tah in inripui in tuolbâwm ramri chu in sawn ding a ni nawh.

Hrepuitu chungchânga dân siem chu

¹⁵ “Mi a rîtlona amanih, a suolna hrim hrim amanih hretu pakhat chau chu huntâwk naw nih; hretu pahni bâu amanih, hretu pathum bâu amaniha sukdet ding a nih.

¹⁶ Hretu fel lotakin mi thil thaw dik loa ân tum chun,

¹⁷ an inkhingnaah an pahni chun LALPA hmaah chu huna thiempuhai le rorêltuhai hmaa chun an ngîr ding a nih.

¹⁸ Rorêltuhai chun nguntakin dap an ta; thuhretu chu hretu tehlêm a nih a, a unau chu khêla intum a nih ti hriet suok a ni chun,

¹⁹ a unau chunga thaw a lo tum ang chun a chungah in thaw ding a nih; chuong ang chun nangni laia thil ṭha naw chu in sukbo ding a nih.

²⁰ Mi danghai chun hrieng an ta, ṭîng an ta, tuta hnung chuong ang thil ṭha naw hrim hrim chu nangni lai an thaw ta naw ding a nih.

²¹ In lunginsiet ding a ni nawh a, hringna aiah hringna, mit aiah mit, ha aiah ha, kut aiah kut, ke aiah ke nîng a tih.