2 SAMUEL 21 - Pathien Lekhabu Inthieng (BSI)

Gibeon mihai phubalâkna

¹ Chun, David damlai chun a kum bi sirin kum thum ṭâm a tlah a; chun, David chun LALPA chu a rawn a. Chun, LALPA chun, “Thisen insuotu Saula le a sûnghai lei a nih; Gibeon mihai a that el si a,” a ta.

² Chun, lal chun Gibeon mihai chu a ko a, an kuomah, (Gibeon mihai chu Israel thlahai an ni nawh a, Amor mi la um sunhai kha an ni lem a; Israel thlahai chun an chunga chun ṭawng an lo inkhâm tah a; Saula chun Juda thlahai le Israel thlahai ta dinga ṭhahnem a ngai leiin that a tum el hlak a nih).

³ David chun Gibeon mihai kuoma chun, “Iengam thawpêk ka ti cheu a? LALPA ro chu mal in sâwm theina dingin ieng ang inremna am siempêk ka ti cheu a?” a ta.

⁴ Chun, Gibeon mihai chun a kuomah, “Saula le a sûnghai le kan chungthua hin tangka le rângkachak tieng thu a ni nawh a, Israel mihai lai hin mi sukhlum theina kan nei bawk nawh,” an ta. Chun, ama chun, “In hril ang taphawt chu thawpêk ka ti cheu,” a ta.

⁵ Chun, lal kuoma chun, “A mi sukbohmangtu le Israel ram sûng hrim hrima khawm um loa, sukbo- hmang dinga a mi phiertu chu,

⁶ a naupasalhai pasari mi pe la, LALPA mi ruot Saula umna khuo Gibea khuoa chun LALPA hmaah khai kan tih,” an ta. Chun, lal chun, “Pe e â,” a ta.

⁷ Nisienlakhawm, lal chun LALPA kuomah David le Saula naupa Jonathan kâra, an pahni inkâra ṭawng inkhâmna leiin Saula naupa Jonathan naupa Mephiboseth chu a hum a.

⁸ Lal chun Aia naunu Rizpain Saula naupasal pahni a neipêk Armoni le Mephiboseth chu a ṭhuoi a; chun, Meholath mi Barzillai naupa Adriel, Saula naunu Mikalin nau- pasal panga a neipêkhai leh;

⁹ chun, Gibeon mihai kuta chun ân hlân a, chun, anni chun LALPA hmaah thingah an khai a, chuong- chun, an pasari chun hmunkhatah an thi seng a, bu sîk hun, buṭei sîk hun vêl laiin an sukhlum a.

¹⁰ Chun, Aia naunu Rizpa chun saiip puon a lâk a, bu sîk ṭantira inthawka vâna inthawka tuiin a hung burkhum chena a umna dingin, lungpui chungah ân zar khum a; an chunga sûna chunglêng vatehai fûk le ramsahai um khawm a phal nawh a.

¹¹ Chun, Aia naunu Saula thai- kêm Rizpa thilthaw chu David chu an hril a.

¹² Chun, David chu a feh a, Philistin mihaiin Gilboaa Saula an that nia Philistin mihaiin Beth-san muol laia an khai inrutu, Jabes- Gilead mihai kuoma inthawkin Saula ru le a naupa Jonathan ruhai chu a lâk a.

¹³ Chutaka Saula ru le a naupa Jonathan ruhai chu a lâk a; chuong- chun, an khaihai ru khawm chu an lâk khâwm a.

¹⁴ Chun, Saula ru le a naupa Jonathan ruhai chu Benjamin rama Zela khuoa a pa Kis thlânah an phûm a, chun, lal thupêk ang pei chun an thawh a. Chun, chu hnunga chun chu ram chunga chun Pathien a lungâwi tah a.

Abisaiin milien kuta inthawka David a sanhim

¹⁵ Philistin mihai chun Israel mihai chu an do nâwk a; chun, David chu a mihai le chun an fe thlah a; Philistin mihai chu an zu do a, chun, David chu a hung chau ta hle el a.

¹⁶ Chun, Isbi-benod, mi lien naupasalhai laia mi, a fei rikzie chu dâr Shekel za thum, kâwlhnâm thar pai chun David chu that a tum a.

¹⁷ Nisienlakhawm, Zeruia naupa Abisai chun a san a, Philistin mi chu a thawh a, a that tah a. Chun, David mihai chun, “Israelhai khâwnvar hi i sukmit nawna dingin indo dingin kan kuomah suok ve ta dêr naw ti nih,” tiin a chungah ṭawng an inkhâm a.

David a rawihaiin milienhai an that

¹⁸ Chu hnunga chun Philistin mihai leh Gob khuoah indona a um nâwk a; chutaka chun Husath mi Sibbekai chun mi lien naupasalhai laia mi Saph a that a.

¹⁹ Chun, Philistin mihai leh Gob khuoah an indo nâwk a; chun, Bethlehem mi Jaare-oregim naupa Elhananin Git mi Goliath a that a, a fei ngul chu puon khâwngtu puon- kawl ang a nih.

²⁰ Chun, Gath khuoah indona a um nâwk a, chutaka chun mi insâng- tak el a kut khingtieng khingtienga kutpâr paruk, a ke khingtieng khingtienga kepâr paruk, a rênga sâwmhni le pali nei hi a um a; ama khawm chu mi liena inthawka pieng a nih.

²¹ Chun, Israel mihai chu a va cho a, David unau Simei naupa Jonathan chun a lo that a.

²² Chun, chuong palihai chu Gath khuoa mi liena inthawka pieng an na, chuonghai chu David le a mihai kutah an thih a.