2 LALHAI 4 - Pathien Lekhabu Inthieng (BSI)

Hmeithainu Sahriek

¹ Chun, zâwlnei naupasalhai nu- hmeihai laia nuhmei tu amani chu a khêk a, Elisa kuomah, “I siehlaw ka pasal chu a thi tah a, i siehlaw chun LALPA a ṭi hlak ti i hriet a, chuongchun, a leibatnapa a hung a, ka nauhai pahni suoka um dingin ama kuomah ṭhuoi a tum a nih,” a ta.

² Elisa chun a kuomah, “I ta dingin ieng am thawpêk ka ti che a? Mi hril rawh, i inah ieng am i nei a?” a ta. Chun, amanu chun, “I siehlawnu hin inah hriek bûr khat ti chau naw chu iengkhawm ka nei dêr nawh,” a ta.

³ Chun, Ama chun, “Fe la, i tuolbâwmhai bêl po po, bêl ruokhai chu, haw khâwm ṭeu rawh; tlâwmte chu haw naw rawh.

⁴ Chun, lût i ta, i naupasalhai le nang chu kawt inkhârkhum in ta, chuongchun, chuong bêl po pohaia chun hriek chu sung rawh, chun a sip chu sie hmang pei bawk la,” a ta.

⁵ Chun, a kuoma inthawk chun a fe tah a, a naupasalhai le ama chu kawt an inkhârkhum a; chun, bêlhai chu a kuomah an hung lâk a, ama chun a lo thun pei a.

⁶ Chun, bêlhai po po chu a sip phingleh, a naupa kuoma chun, “Bêl dang mi la hung lapêk rawh,” a ta. Chun, ama chun a kuomah, “Bêl dang a um ta nawh,” a ta. Chun, hriek chu a kang tah a.

⁷ Chun, a hung a, Pathien mi chu a hril a, ama chun a kuomah, “Fe la, hriek chu zawr la, i bat chu thung la, a la chuong chun nang le i naupa- salhai chu inchâwmna ro,” a lo tih a.

Elisa le Sunam nuhmei chanchin

⁸ Chun, ni khat chu hieng hi a hung na, Elisa chu Sunem khuoah ân zin a, chu khuoa chun nuhmei nei- nungtak hi a um a, ama chun Elisa chu bu fa dingin a lo ko ṭâl hlak a. Chun, chutaka a fe po le chun, chu- taka chun bu fa dingin a lût hlak a.

⁹ Chun, ama chun a pasal kuomah, “Ngai ta, hi mipa mi hung sir rawp hlaktu hi Pathien mi inthieng a nih ti ka hriet a nih.

¹⁰ Ka ngên che hi, in sâwng chîtê bâwl ei ta, chutaka chun khum leh, dawkân leh, ṭhungna le khâwnvar siena sieng ei ta, a hung poleh chu- taka a lût theina dingin,” a ta.

¹¹ Chun, ni khat chu chutieng chun a hung inzin a, pindana chun a lût a, a zâl tah a.

¹² Chun, a siehlaw Gehazi kuoma chun, “Hi Sunamnu hi hung ko ta,” a ta. Chun, a hang ko hnung chun, a hmaa chun a hung ngîr a.

¹³ Chun, ama chun a kuomah, “Ngai ta, hi nangin theitâwpin i mi duot a, ieng am thawpêk vêng ka ti cheh a? lal amanih, sipai hotu ama- nih biekpêk che i nuom am, tiin a kuoma hin hril ta,” a ta. Chun, ama chun a dawn a, “Mâni chipui laia chêng ka nih annâwm,” a ta.

¹⁴ Chun, ama chun, “Ieng am ei thawpêk ding a ni chu aw?” a ta. Gehazi chun, “Naupasal a nei dêr luo nawh a, a pasal khawm tar a ni tah,” tiin a dawn a.

¹⁵ Chun, ama chun, “Ama chu hung ko rawh,” a ta. Chun, ama chu a hung ko chun kawtkhâra chun a ngîr a.

¹⁶ Chun, ama chun, “Hi hun pha hin, hun a hung inlet nâwk pha chun naupasal pawm tâng i tih,” a ta. Chun, ama minu chun, “Ni lo e, pu, nang Pathien mi, i siehlawnu kuoma hin khêl hril naw rawh,” a ta.

¹⁷ Chun, nuhmei chu ân rai a, a kuoma Elisain a hril hun, chu hun chu a hung tlung chun naupasal a nei tah a.

¹⁸ Chun, naupang chu a hung inṭhang lien a; ni khat chu a pa kuoma busîktuhai kuomah a fe veh a.

¹⁹ Chun, a pa kuoma chun, “Ka lu, ka lu,” a ta. Chun, ama chun a sie- hlaw kuoma chun, “A nu kuomah ama kha ṭhuoi rawh,” a ta.

²⁰ Chun, ama chun a pawm a, a nu kuom a hang tlungpui chun, a nu khûp chungah nisa inding chen chu a ṭhung a; chun, a thi tah a.

²¹ Chun, a hang feh a, ama chu Pathien mi khum chunga chun ân zâl tah a; chun, kawt a khârkhum a, ama chu a suok tah a.

²² Chun, a pasal chu a ko a, “Ka ngên che hi, Pathien mi kuomah ka va tlâna ka hung kîr nâwk vak theina dingin siehlaw pakhat le sabengtung pakhat kha mi hung ngaituopêk rawh,” a ta.

²³ Chun, ama chun, “Vawisûn kher kher iengdingin am ama kuoma chun fêng i ta? thla thar a ni nawh a, Châwlni khawm a ni bawk si nawh a,” a ta. Chun, ama chun, “Ṭha tho de nih,” a ta.

²⁴ Chun, sabengtung chu a chuongpha a phah a, a siehlaw kuom- a chun, “Khal la, hmatieng fe pei rawh, ka tir chau naw che chun mi sukmuong naw rawh,” a ta.

²⁵ Chuongchun, a feh a, Karmel tlânga Pathien mi kuoma chun a hang fe tah a. Chun, Pathien mi chun ama chu hlataka a um lai chun a lo hmuh a, a siehlaw Gehazi kuoma chun, “En ta, sawtaka saw Sunamnu kha a nih,

²⁶ tuhin ama tuok dingin tlân la, a kuomah, ‘Nang i dam de maw? i pasal kha a dam de maw? naupang kha a dam de maw?’ lo va ti rawh,” a ta. Chun, ama chun, “Dam e,” tiin a lo dawn pei a.

²⁷ Chun, tlânga Pathien mi kuom a hung tlung chun a kephahai chu a chel tlat a. Gehazi chu ama hnawt- kieng ding chun a hung hnai a, ni- sienlakhawm, Pathien mi chun, “Tosan phawt el rawh, a sûngah a lungril a lungngai a nih, LALPA chun chu chu a thup a, ka kuomah a la hril hri si nawh,” a ta.

²⁸ Ama chun a kuomah, “Pu, naupasal ka hni hrim che am a nih? Mi hlêm naw rawh, ka ti hrim a ni naw am a nih?” a ta.

²⁹ Chun, ama chun Gehazi kuoma chun, “I dier kei ṭha la, i kutah ka hmawl kha chawi la fe raw khai; mi tukhawm în tuokpui chun chibai bûk naw la, chun, tukhawma chibai an bûk che khawma bûk thung naw rawh; chun, ka hmawl hi naupang hmai chunga chun innghat rawh,” a ta.

³⁰ Chun, naupang nu chun, “LALPA hringna le nanga hringna sâlin ka hril a nih, inthla naw ning che,” a ta. Chun, a tho a, a zui tah a.

³¹ Gehazi chun anni chu a lo hmakhal a, naupang hmai chunga chun hmawl chu a lo innghat a; nisienlakhawm, râwl hrim hrim le a dawn tina hrim hrim chu a um nawh a. Chuleichun, ama chu lo tuok dingin Gehazi chu a va kîr a; “Naupang chu a meng naw tawp el,” a tih a, a lo hril a.

³² Chun, Elisa chu in a hung lût chun ngai ta, naupang chu a thi tah a, khuma chun a lo zâl a.

³³ Chuongchun, a va lût a, an pahni chun kawt ân khârkhum a, LALPA kuoma chun a ṭawngṭai tah a.

³⁴ Chun, a hang feh a, naupang chunga chun a hang bawk a; chuong- chun, a bau chungah a bau, a mithai chungah a mithai, a kuthai chungah a kuthai a sieh a; chuongchun, nau- pang chunga chun a zuk bawk nâwk a; chun, naupang taksa chu a hung lum tah a.

³⁵ Chun, a hung kîr a, in sûnga chun hnungtieng hmatieng hin vawi- khat ân lawn a; chun, a hang feh a, a chunga chun a hang bawk nâwk a; chun, naupang chu vawi sari a hung insim a, chuongchun, a mit a hung meng tah a.

³⁶ Chun, Gehazi chu a ko a, “Su- namnu kha hung ko rawh,” a ta. Ama chun nuhmei chu a hung ko a, a kuoma a hung lût chun, a kuomah, “I naupa kha pawm rawh,” a ta.

³⁷ Chun, ama minu chu a va lût a, a hmaia hnuoi sikin chibai a bûk a, chun, a naupa chu a pawm a, a suok tah a.

Zâwlneihai ta dinga Elisa thilmak thaw

³⁸ Chun, Elisa chu Gilgalah a fe nâwk a; chun, chu rama chun ṭâm nasatak a tlah a; zâwlnei naupa- salhai chu a hmaa chun an ṭhung a, a siehlaw kuoma chun, “Bel lientak inchuon la, zâwlnei naupasalhai ta dingin hmepawk suong rawh,” a ta.

³⁹ Chun, mi pakhat chu ramah anhna zawng dingin a va feh a; grêp suok hrui hi a va hmuh a; chutaka ûmzâm chu a pawm khawp ṭeuin a hung inkhâwm bawk a, a hung a, a channawi a, hmepawk bêla chun a thlâk tah a; an hriet si nawh a.

⁴⁰ Chun, mihai ta ding chun an fâk dingin an hung thur suok a, chun, an fâk lai chun, “Aw Pathien mi, bêla hin thina hri a um a nih,” tiin an khêk suok a. Chuongchun, an fâk thei ta nawh a.

⁴¹ Ama chun, “Chuong a ni chun, beiphit hung la ro,” a ta. Bêl sûnga chun a dêng lût a, “Mipui fâk dingin thur suok ta ro,” a tih a. Chuongchun, bêl sûnga chun thil ṭha naw hrim chu a um ta nawh a.

⁴² Chun, Baal-salisaa inthawkin mi pakhat a hung a, Pathien mi chu ra hmasa bei, buṭei bei sâwmhni le bu thar vui a ipin a hung chawipêk a. Elisa chun, “An fâk dingin mipuihai kha pe rawh,” a tih a.

⁴³ A siehlaw chun, “Iengtin am hi hi mi za khat hmaa chun fâk dingin sieng ka ta?” a tih a. Nisienlakhawm, ama chun, “An fâk dingin mipuihai kuoma chun pe rawh, LALPA chun ‘Fâng an ta, fa sêng naw ni hai,’ a ti a nih,” a ta.

⁴⁴ Chuongchun, an hmaa chun a sieh a, an fâk tah a, LALPA thu ang ngei chun an fâk sêng ta nawh a.