2 LALHAI 13 - Pathien Lekhabu Inthieng (BSI)

Jehoahaz inlal thu

¹ Juda lal Ahazia naupa Joas kum sâwm hni le kum thum ân lal kum chun Jehu naupa Jehoahaz chu Israelhai chungah Samari khuoa chun ân lal ṭan a, kum sâwm le kum sari ân lal a.

² LALPA mithmuah thil ṭha nawtak a thaw hlak a, Israelhai thil insuksuoltira a thaw Nebat naupa Jeroboam suolnahai kha a chîng veh a, a mâksan nâwk ta hrim hrim nawh a.

³ Chun, LALPA lung chu Israelhai chunga chun a chawk a, chuongchun, Suria lal Hazael kuta le, Hazael naupa Benhadad kuta chun a pêk ta pei a.

⁴ Chun, Jehoahaz chun LALPA kuomah a ngên a ngên a; chun, LALPAIN a thu chu a lo ngaipêk a, Israelhai nêksâwra an um a, Suria lalin anni a nêksâwrzie chu a hmu zing sih a.

⁵ LALPA chun Israelhai chu san- damtu a pêk a; chuongchun, Suria mihai hnuoia an um chu an suok a, Israel thlahai chu kha hma ang bawk khan anni in tieng an um nâwk ta ṭawk ṭawk a.

⁶ Amiruokchu, Israelhai thil in- suksuoltira a thaw Jeroboam sûnghai suolna kha an mâksan nawh a; an la chîng ta zing lem a; chun, Samari khuoa chun Asera khawm chu a la um zing nghe nghe a.

⁷ Jehoahaz chu a mihai laia sakawr chung chuong mi sâwmnga le tawlailîr sâwm le, sipai sîng khat ti naw chu nei a phalpêk si nawh a, Suria lal chun a sukbohmang vawng a, pilvut childip ang elin a siem a nih.

⁸ Chuongchun, Jehoahaz chanchin danghai, a thilthaw po pohai, a thil- thawtheizie dâm chu Israel lalhai inlal lai thu ziekna bua chun a chuong a ni naw am a nih?

⁹ Chun, Jehoahaz chu a pi le puhai kuomah a in tah a; chun, Samari khuoa chun an phûm a; chun, a naupa Joas chu a aiawin ân lal tah a.

Israel rama Jehoas ân lal

¹⁰ Juda lal Joas kum sâwmthum le kum sari ân lal kum chun Jehoahaz naupa Jehoas chu Israelhai chungah Samari khuoah ân lal ṭan a; kum sâwm le kum ruk ân lal a.

¹¹ Chun, LALPA mithmuah thil ṭha nawtak a thaw hlak a; Israel hai thil insuksuoltira a thaw Nebat naupa Jeroboam suolnahai po po kha a mâksan bîk nawh a, a la chîng zing ta lem a.

¹² Chuongchun, Joas chanchin danghai, a thilthaw po pohai dâm, Juda lal Amazia a thaw laia a thil- thawtheizie dâm chu Israel lalhai inlal lai thu ziekna bua chun a chuong a ni naw am a nih?

¹³ Chun, Joas chu a pi le puhai kuomah a in tah a; chun Jeroboam chu a lal ṭhungphaah a ṭhung a, chun Joas chu Samari khuoah Israel lalhai lai an phûm tah a.

Elisa hrillâwk tâwpna le a thina

¹⁴ Chun, Elisa chu a thipui ding natnain a hung na tah a, chuongchun, Israel lal Joas chu a kuomah a zu feh a, a ṭah a, “Pa, Pa, Israelhai tawlailîr le sakawr chung chuong mihai,” a ta;

¹⁵ Chun, Elisa chun a kuomah “Thalngul le thalhai hung la ta,” a ta; chun, thalngul le thalhai a hung lâk a.

¹⁶ Chun, Israel lal kuoma chun, “Thalngul kha hang chel ta,” a tih a, chuongchun, a hang chel a. Chun, Elisa chun lal kut chunga chun a kut ân nghat a.

¹⁷ Chun, ama chun, “Saktieng tukver hang hawng ta,” a ta, chun, a hang hawng a. Chun, Elisa chun, “Kâp rawh,” a ta, chun, a hang kâp a, chun, ama chun, “LALPA hnena thal, Suriahai hnena thal a ni kha; Aphek khuoa chun Suria mihai chu bo- hmang dêr khawpin i hne ding annâwm,” a ta.

¹⁸ Chun, “Thalhai kha hung la ta,” a ti nâwk a; chuongchun, a hei lâk a. Chun, Israel lal kuoma chun, “Hnuoi kha hei sun ta,” a ta; chuongchun, vawi thum a hei sun a, a ma ta el a.

¹⁹ Chuongchun, Pathien mi chu a chunga chun a lunginsen tah a, “Vawi nga, vawi ruk lai i sun ding i sawnnaw; chuongchun, Suria mihai chu bo- hmang dêr khawpin i hne ding a nih. Amiruokchu, Suria mihai chu vawi thum chau i hne ding a ni ta hi,” a ta.

²⁰ Chun, Elisa chu a thih a, an phûm tah a. Chun, kum a hung invawi po hin, Moab mihai chun an ram hi an hung rûn hlak a.

²¹ Chun, mi pakhat an phûm ding lai takin, ngai ta, pâwl pakhat an hei hmuh a; chuongchun, ama chu Elisa thlâna chun an thlâk el tah a; chun, a ruong chun Elisa ruhai chu a zu tâwk phingleh, a hung hring nâwk a, a hung ngîr el tah a.

²² Chun, Suria lal Hazael chun Jehoahaz hun sûng chun Israelhai chu a nêksâwr zing a.

²³ Nisienlakhawm, LALPAIN Ab- raham kuoma dâm, Isaak kuoma dâm, Jakob kuoma dâm khan thu a thlung leiin anni chu a lunginsiet a, a lainat a, a ngaisak a, anni chu a sukbohmang nuom nawh a, a kuoma inthawk chun a la pei thlâk nuom ta naw rawp a.

²⁴ Chun, Suria lal Hazael chu a thih a, a naupa Benhadad chu ama aiaw chun ân lal tah a.

²⁵ Chun, Jehoahaz naupa Jehoas chun Hazael naupa Benhadadin a pa Jehoahaz a rûn a, khuo a lâkpêkhai kha a lâkpêk nâwk a, Joas chun vawi thum a hneh a, Israel ram khuohai chu a lâk nâwk a.