Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 THESSALONIKA 5 - Pathien Lekhabu Inthieng (BSI)

1 Amiruokchu, unauhai, a hun le a ni kawng thu hrim ziekpêk in ngai nawh a.

2 Lalpa Ni chu zâna inru angin a hung tlung ding a nih ti nangni ngeiin chiengtakin in hriet sih a.

3 “Muongna le himna,” tia an hril lai takin, nuhmei nauhase angin kârloin an chungah bohmangna hung tlung a tih, pumpel naw tawp an tih.

4 Nisienlakhawm, unauhai, nang- ni ruok chu, chu Ni chun inru anga a nangna ding cheuin inthimah in um nawh.

5 Var nauhai le Ni nauhai in ni vawng sih a, zâna mi ei ni nawh a, inthima mi ei ni bawk nawh.

6 Chuleichun, mi danghai angin in ta nâwng ei tiu khai! Meng ei tiu a, fîmkhurin ngaiven lem ei tiu.

7 A inhai chu zânah a nih an in hlak chu, zu inruihai khawm zânah a nih an inrui hlak chu.

8 Nisienlakhawm, eini chu nia mi ei ni lei hin, ringna le hmangaina âwmphaw chu hâkin, sandamna beiseina chu lukhuma hmangin ngaiven lem ei tiu.

9 Pathienin lunginsenna tuor ding ni loin, ei Lalpa Isu Krista zâra sandamna hmu ding lema a mi ruot a ni sih a.

10 Ei meng khawma, ei in khawm- a, ama leh ei hring kawp theina dingin ama chu ei thi aiin a thi a nih.

11 Chuleiin, infui tuoin insukṭha- hnem tuo seng ro, in thaw hrim hlak ang khan.


Infuina chi tum tum le thu namdetna

12 Nisienlakhawm, unauhai, kan ngên cheu a nih: nangni laia sin inrim le Lalpaa in hotua um le, a kâwktuhai cheu chu hre ding le,

13 an sinthaw leia hmangaia ngaihlu bêk bêk dingin. Inremin um ro.

14 Chun, unauhai, kan ngên cheu, dân ang nawa umhai chu kâwk unla, lungril chînhai chu infui unla, a hrât nawhai chu ṭhangpui unla, mi po po chungah dâwthei takin um ro.

15 Tûkhawmin tu suol khawm suola thung lo dingin fîmkhur ro; thil in inthawpêk tuona tieng le, mi po po chunga in thawpêkna tienga khawm a ṭha taphawt chu hnawt lem rawp ro.

16 Lâwm rawp unla,

17 ma loin ṭawngṭai unla,

18 iengkimah lâwmthu hril rawp ro; chu chu nangni tieng thuah Krista Isua chun Pathien dit zâwng a ni sih a.

19 Thlarau chu sukmit naw ro.

20 Thu hrilhai hmusit naw ro;

21 iengkim infie lem unla, a ṭha ṭha chu pawm tlat ro.

22 Suol anga inlang po poa inthawk chun insiekieng ro.

23 Chun, inremna Pathien ngei chun, in pumin sukthieng raw se cheu; chun, in thlarau le, in lungril le in taksa chu ei Lalpa Isu Krista a hung pha chun, sawisêlboa a puma humhimin um raw se.

24 A kotu cheu chu ring a um a, thaw khawm thaw ngei bawk a tih.

25 Unauhai, mi ṭawngṭaipêk ro.

26 Unau po pohai kha fâwp inthiengin chibai mi bûkpêk ro.

27 Hi lekha hi unau po po kuoma chun tiem dingin Lalpa hmingin ka phût cheu.

28 Ei Lalpa Isu Krista lungin- sietna chu in kuomah um raw se.

Hmar CL Bible - Pathien Lekhabu Inthieng 

Copyright © Bible Society of India, 2015.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ