1 LALHAI 15 - Pathien Lekhabu Inthieng (BSI)

Abijam inlal thu

¹ Tûn Nebat naupa lal Jeroboam chu kum sâwm le kum riet ân lal kum chun Judahai chungah Abijam chu ân lal ṭan a.

² Jerusalem khuoah kum thum ân lal a, a nu hming chu Maaka, Abisa- lom naunu a nih.

³ A hmaa a pain thil suol a thawhai po po kha a thaw veh a; a pu David lungril angin a lungril chu LALPA a Pathien tienga chun a ṭha famkim ve nawh a.

⁴ Nisienlakhawm, David leiin LALPA Pathien chun ama hnunga a naupa la tungdingna ding le Jerusalem khuo inngîr det dingin Jerusalem khuoa chun khâwnvar a pêk a.

⁵ Hit mi Uria chungchâng ti nawa chun Davidin LALPA mithmua thil- ṭha a thaw hlak lei le a dam sûng poa thaw dinga thu a pêk taphawt chu a sêl ngai dêr naw leiin.

⁶ Rehoboam chu a dam sûng po chu Jeroboam leh an indo zing zing hlak a.

⁷ Abijam chanchin le a thilthaw danghai po po chu Juda lalhai inlal lai thu ziekna buah a chuong a ni naw am a nih?

⁸ Abijam le Jeroboam chu an indo hlak a. Chun, Abijam chu a puhai kuoma chun a in tah a, David khaw- puia chun an phûm tah a; ama aiawin a naupa Asa chu ân lal tah a.

Asa inlal thu

⁹ Israel lal Jeroboam chu kum sâwmhni ân lal kum chun Asa chu Judahai chungah ân lal ṭan a.

¹⁰ Chun, kum sâwmli le kum khat chu Jerusalemah ân lal a, a pi hming chu Maaka, Abisalom naunu a nih.

¹¹ Asa chun a pu David ang bawkin LALPA mithmua thilṭha a thaw hlak a.

¹² Chun, pasal inzawrhai chu a rama inthawkin a hnawt suok a, a puhaiin milim an lo siemhai po po chu a sukbo vawng a.

¹³ A pi Maaka khawm chu milim tirdakumtak Asera a siempêk leiin, a lalnu nina chu a bân a; chun, Asa chun a milim siem chu a sât thlûk a, Kidron vadungah a rawh a.

¹⁴ Bâwlhmunhai ruok chu a sukbo nawh a, nisienlakhawm, Asa lungril chu a dam sûng po chun LALPA tieng chun a ṭha famkim a nih.

¹⁵ Chun, a pain thil a lo inhlân tasahai le ama ngeiin a lo inhlân tah, tangkaruohai, rângkachak dâm, bûr le bêlhai chu LALPA inah a lâk lût a.

Asain Benhadad ân thuruolpui

¹⁶ Chun, Asa le Israel lal Baasa chu an inlal sûng po chu an indo zing hlak a.

¹⁷ Israel lal Baasa chun Judahai chu a hang thawh a, Juda lal Asa kuoma lût ding le suok ding dangna dingin Rama khuo a siem a.

¹⁸ Chuongchun, Asa chun LALPA ina le lal ina ro la um tangkaruo le rângkachak po po chu a lâk a, a siehlawhai a pêk a; chun, lal Asa chun Damaska khuoa um Suria lal Hezion nau Tabrimon naupa Ben- hadad kuoma chun,

¹⁹ “Nang le keia kâra le ka pa le i pa kârah thuthlung a um a, ngai ta, lâwmman dingin tangkaruo le râng- kachak ka hung thawn che; thaw ta, Israel lal Baasa hin a min kiensanna dingin a kuoma i thuthlung kha ṭhiek el ta,” tiin a thawn a.

²⁰ Chun, Benhadad chun lal Asa thu chu a lo pawm a, chuongchun, Israel khuohai chu thaw dingin a sipai hotuhai a tir a. Ijon khuo dâm, Dan khuo dâm, Abel-beth-maaka khuo dâm, Kinneroth biel po po chu, Naphtali ram po po le chun a thawh a.

²¹ Chun, Baasa chun chu thu chu a lo hriet phingleh Rama khaw siem chu a ma a, Tirza khuoa chun a um tah a.

²² Chuongchun, lal Asa chun Judai ram po poa chun thu ân phur vêl tah a; tukhawm a âwl bîk hrim hrim an um nawh, chuongchun, Baasain Rama khaw siemna dinga thing le lung a hmanghai chu an thak a; chuonghai chu hmangin lal Asa chun Mizpa khuo le Benjamin rama Geba khuo a siem a.

²³ Asa chanchin dang po pohai, a thilthawtheizie po pohai, a thilthaw po pohai, a khaw siemhai chu Juda lalhai inlal lai thu ziekna buah a chuong a ni naw am a nih? Ami- ruokchu, a tar hnung chun a kea chun hri ieng amanih a hung invawi tah a.

²⁴ Chun, Asa chu a puhai kuomah a in tah a, a pu David khawpuiah a puhai lai chun an phûm tah a; a naupa Jehosaphat chu ama aiawin ân lal tah a.

Nadab inlal thu

²⁵ Chun, Jeroboam naupa Nadab chu Juda lal Asa inlal kum hninaa chun Israelhai chungah ân lal ṭan a; Israelhai chunga chun kum hni ân lal a.

²⁶ LALPA mithmuin thil ṭha naw- tak a thaw hlak a; a pa lampui hraw chu a hraw veh a, Israelhai thil insuksuoltira a suksuolna kha a thaw veh a.

²⁷ Chun, Issakar sûnghai laia mi Ahija naupa Baasa chun ama chu a phier rûk a, Philistin mihai chan, Gibbethon khuoah Baasa chun a that tah a, Nadab le Israelhai po po chun Gibbethon khuo chu an inhuol lai tak a nih.

²⁸ Juda lal Asa inlal a kum thumnaah a nih Baasa chun a that a, a aiah ân lal chu.

²⁹ Chun, lal a hung ni phing chun a sukchimit dêr hmakhat chun Jeroboam sûnghai po po chu a that a, a dam taphawt chu pakhat khawm Jeroboam chu a hlapêk nawh a; LALPAIN Shilo khuoa mi a siehlaw Ahija hmanga a lo hril ta ang khan,

³⁰ chu chu Israelhai thil insuk- suoltira a thaw, Jeroboam suolnahai lei le LALPA Israelhai Pathien chu a suklungsen lei a nih.

³¹ Nadab chanchin danghai le a thilthaw po pohai chu Israel lalhai inlal lai thu ziekna buah a chuong a ni naw am a nih?

³² Chun, Asa le Israel lal Baasa chu an inlal sûng po chu an indo zing hlak a.

Baasa inlal thu

³³ Juda lal Asa inlal kum thumnaa chun Ahija naupa Baasa chu Tirza khuoah Israelhai po po chungah ân lal ṭan a, kum sâwmhni le kum li ân lal a.

³⁴ LALPA mithmuin thil ṭhanaw- tak a thaw hlak a, Jeroboam lampui hraw chu a hraw veh a, Israelhai thil insuksuoltirnaa a suksuolna kha a thaw veh a.