प्रकाशितवाक्य 1 - Halbiपयचान 1 ईशु मसीह चो परकाशन बचन, जोन हुनके माहापुरू ऐईकाजे दिलो कि आपलो दासमन चो हुन गोठमन, जेचो झटके होतोर जरूर आय, दकाओ; आउर हुन आपलो सरगदूत के पटाऊन भाती हुनचो दुवारा आपलो दास यूहन्ना के सांगलो, 2 जोन माहापुरू चो बचन आउर ईशु मसीह चो गोहई, बल्लोने जोन काई हुन दकु रलो हुनचो गोहई दिलो। 3 धन्य आय हुन जोन ऐ अगम गिआन चो बचन के पढु आय, आउर हुनमन जोन सुनु आत आउर ऐ थाने लिकलो बिती गोठमन के मानु आत; कसनबल्लोने समया लगे आसे। सातो कलीसियामन के यूहन्ना चो जुहार 4 यूहन्ना चो बाटले आसिया चो सात कलीसियामन चो नाव: हुनचो बाटले जोन आसे, आउर जोन रये, आउर जोन ऐतो बिती आय; आउर हुन सात आत्मामन चो बाटले, जोन हुनचो सिंघासन चो पुरे आसे, 5 आउर ईशु मसीह चो बाटले जोन बिश्वास लायक गोहई आउर मरलो बितामन थानले जीव उठतो बितामन ने पयलवात आउर धरतनी चो राजामन चो हाकिम आय, तुमके अनुग्रह आउर शान्ति मिरते रओ। हुन आमचो ले मया संगाऊ आय, आउर हुन आपलो लऊ चो दुवारा आमके पापमन ले छंडालो से, 6 आउर आमके गोटक राज आउर आपलो बुआ माहापुरू चो काजे याजक बले बनान दिलो, हुनचेई महिमा आउर पराकरम जुग-जुग रओ। आमीन। 7 दका, हुन बादरी चो संगे ऐतो बिता आय, आउर हरकोनी आँईक हुनके दकेदे, मान्तर जोनमन हुनके भेदु रवत हुनमन बले हुनके दकदे, आउर धरतनी चो पुईतराय कुल हुनचो कारन छाती पेटदे। हव। आमीन। 8 परबु माहापुरू, जोन आसे आउर जोन रये आउर जोन ऐतो बिता आय, जोन सर्वशक्तिमान आय, ऐ बले से, “मय ची अलफा आउर ओमेगा आंय।” यूहन्ना के मसीह चो दरशन 9 मय यूहन्ना, जोन तुमचो भाई आउर ईशु चो कलेश आउर राज आउर धीरज ने तुमचो शामिल आंसे, माहापुरू चो बचन आउर ईशु चो गोहई चो लागुन पतमुस नाव चो ढिपका ने रयें। 10 मय परबु चो दिने आत्मा ने ईले, आउर आपलो पाटे तुरी चो असन बड़े राग ऐ बोलते सुनले, 11 “जोन काई तुय दक सीस हुनके किताब ने लिकुन भाती सातो कलीसियामन चो लगे पटाऊन देस, बल्लोने इफिसुस, आउर स्मुरना, आउर पिरगमुन, आउर थुआथीरा, आउर सरदीस, आउर फिलदिलफिया, आउर लौदीकिया के।” 12 तेबे मय हुनके, जोन मोके बोलते रये, दकतो काजे आपलो मुंह फेर लो, आउर पाटकुती उलटुन भाती मय सोना चो सात ठान पटेरामन दकले, 13 आउर हुन पटेरामन चो मंजी ने माने चो बेटा चो असन गोटक माने के दकले, जोन पाँयमन ले फटीई पिन्दुन, आउर छाती थाने सोना चो पट्टा बान्दुन भाती रये। 14 हुनचो मुण्ड आउर केश पंडरी ऊन आउर गोरस चो असन उजर रये, आउर हुनचो आँईकमन आईग चो तरास चो असन रये। 15 हुनचो पाँय बड़ीया पीतल चो असन रये जोन माना भाटी ने तपाया गेली से, आउर हुनचो शब्द खुबे पानी चो शब्द चो असन रये। 16 हुन आपलो उजा हाथ ने सात तारामन धरून भाती रये, आउर हुनचो थोमना ले तेज दुयधारी तलवार निकरते रये। हुनचो थोमना असन बरते रये, जसन बेर तेज घाम चो समया बरू आय। 17 जिदलदाय मय हुनके दकले तो हुनचो पाँयमन थाने मुरदा असन घसरुन पढ़ले। हुन मोचो उपरे आपलो उजा हाथ संगाऊन भाती बल्लो, नी डर; मय पयला आउर आखरी आउर जीव आंय; 18 मय मरून जाऊ रयें, आउर अदायं दक मय जुग-जुग जीव आंसे, आउर मरना आउर अधलोक चो कुचीकाड़ी मोचो ची लगे आसे। 19 ऐईकाजे जोन गोठमन तुय दकली सीस आउर जोन गोठमन होये से आउर जोन गोठमन ऐचो पाचे होतो बिती आय, हुन सपाय के लिक। 20 बल्लोने हुन सात तारामन चो भेद जेके तुय मोचो उजा हाथ ने दकु रईस, आउर हुन सात सोना चो दियामन चो भेद: हुन सात तारा सातो कलीसियामन चो दूत आत, आउर हुन सात पटेरा सात कलीसियामन आत। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation