इफिसीयो 4 - Halbiमसीह चो देंह ने सोर-सुतर 1 ऐईकाजे मय जोन परबु ने बन्दी आसे तुमचो ले बिनती करें से कि जोन बुलाहट ले तुमी हाग दिया जाऊ राआस, हुनचो लायक चाल चला, 2 बल्लोने पूईतराय दिनता आउर नम्रता संगे, आउर धीरज धरून भाती मया ले गोटक दुसर चो सहा; 3 आउर मेल चो बान्दन ने आत्मा चो सोर सुतर ने संगातोर कोशिश करा। 4 गोटक ची देंह आय, आउर गोटक ची आत्मा; जसन तुमके जोन हाग दिया जाऊ राआस आपलो हाग दिया गेलो ले गोटक ची आशा आसे। 5 गोटक ची परबु आय, गोटक ची बिश्वास, गोटक ची डूबन, 6 आउर सपाय चो गोटक ची माहापुरू आउर बुआ आय, जोन सपाय चो उपरे आउर सपाय चो मंजी ने आउर सपाय ने आसे। आत्मिक बर 7 मान्तर आमचो थानले हरकोनी के मसीह चो दान चो सबुत चो अनुसार अनुग्रह मिरली से। 8 ऐईकाजे हुन बले से, “हुन डेंग उपरे चेगलो आउर बन्दीमन के बान्दुन निलो, आउर मानेमन के दान दिला।” 9 (हुनचो चेगलो ले, आउर काय पाया जाऊ आय मात्र ऐ कि हुन धरतनी चो खाले जगामन ने उतरू बले रलो। 10 आउर जो उतरून गेलो ऐ हुनी आय जोन पूईतराय बादरी ले उपरे चेगुन बले गेलो कि सपाय काई भरपूर करो)। 11 हुन कितलो के पठालोबिता नियुक्त करून, आउर कितलो के अगम गिआनी नियुक्त करून, आउर कितलो के नगतखबर सुनातो बिता नियुक्त करून, आउर कितलो के राका करूमन आउर उपदेशक नियुक्त करून देऊन दिलो, 12 जेचो ले पवितर लोग सिद्ध होऊन जाओत आउर सेवा चो काम कराय जाओ आउर मसीह चो देंह उन्नती पाओ, 13 जिदलदाय ले कि आमी सपाय के सपाय बिश्वास आउर माहापुरू चो बेटा चो पयचान ने गोटक नी होऊन जाऊँ, आउर गोटक सिद्ध माने नी बनुन जाऊँ आउर मसीह चो पुरा हाव-भाव लगले नी बडुन जाऊँ। 14 तेबे आमी पहिल ले लेका नी रऊँ जोन मानेमन चो ठग-बिदया आउर चलाक ले, हुनमन चो भरम चो फान्दामन चो आउर उपदेश चो हरकोनी लेहरा ले उदलाया आउर ऐ बाटे-हुन बाटे किन्दराया जाऊ आहास। 15 मान्तर मया ने सत ले चलते-चलते सपाय गोठमन ने हुनमन थाने जोन मुण्ड आय, बल्लोने मसीह ने बड़ते जाओत, 16 जेचो ले पूईतराय देंह, हरकोनी जोड़ान चो सायता ले गोटक संगे मिसुन भाती आउर गोटक संगे गठेयाय होऊन भाती, हुन असर चो अनुसार जोन हरकोनी धड़ चो नुकु-नुकु काम करतोर दुआरा हुन थाने होऊ आय, आपन खुद के बढ़ाऊ आय कि हुन मया ने उन्नती करते जाओं। नवा माने 17 ऐईकाजे मय बलेंसें आउर परबु ने बिनती करें से कि जसन दुसर जाति लोग आपलो मन चो खराप रीति थाने चलु आत, तुमी अदायं ले फेर असन नी चलासे। 18 कसनबल्लोने हुनमन चो अकल अंधार होऊन गेली से, आउर हुन अगिआन चो लागुन जोन हुनमन थाने आसे आउर हुनमन चो मन चो कठर चो लागुन हुनमन माहापुरू चो जीवना ले अलग कराय गेलासे; 19 आउर हुनमन चिमनाय होऊन भाति ढ़िलाढ़ाला लगुन गेला सोत कि सपाय परकार चो अशुद्ध काम लालच ले करते रओत। 20 मान्तर तुमी मसीह चो असन सिक्या नी पावलास। 21 मान्तर तुमी सत-सत हुनचेई सुनलास आउर, जसन ईशु ने सत आसे, हुनी थाने सिकाय बले गेलास 22 कि तुमी पिछला चाल-चलन चो जुना माने के जोन भरमातो बिती आशामन चो अनुसार भ्रष्ट होते जाऊ आय, उतराऊन पकाहा 23 आउर आपलो मन चो आत्मिक चाल-चलन ने नवा बनते जाहा, 24 आउर नवा माने के पिन्दा जोन माहापुरू चो अनुसार सत चो धारमिक आउर पवितरता ने बनाया गेली से। आत्मा के दुखी नी करा 25 ऐई लागुन झुठ बोलतोर छांडुन भाती हरकोनी आपलो पारा चो लोग ले सत बोला, कसनबल्लोने आमी आपस ने गोटक दुसर चो अंग आंव। 26 रीस तो करा, मान्तर पाप नी करा, बेर बोसु-बोसु तुमचो रीस नी रओ, 27 आउर ना शयतान के मवका दिआस। 28 चोरी करतो बिता फेर चोरी नी करो, मान्तर अच्छा काम करतो ने आपलो हाथमन ले मसागत करो, ऐईकाजे कि जोन के जरूरत आसे हुनके देतो काजे हुनचो लगे काई होओ। 29 काई खराप गोठ तुमचो मुंह ले नी निकरो, मान्तर जरूरत चो अनुसार हुनी निकरो जोन उन्नती चो काजे अच्छा होओ, बल्ले हुनचो ले सुनतो बितामन चो उपरे अनुग्रह होओ। 30 माहापुरू चो पवितर आत्मा के दुकी नी करा, जेचो ले तुमचो उपरे छुटकारा चो दिने चो काजे छाप दिया गेली से। 31 सपाय परकार चो पीता, आउर परकोप आउर रीस, आउर कोलार, आउर निन्दा, सपाय बयर भाव संगे तुमचो ले दूर कराय जाओ। 32 गोटक दुसर उपरे किरपालु आउर करूनामय हुआ, आउर जसन माहापुरू मसीह ने तुमचो अपराध छमा करलो, असने ची तुमी बले गोटक दुसर चो अपराध छमा करा। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation