कुलुस्सियो 4 - Halbi

मसीही अनुग्रह

¹ हे मालिकमन, आपलो-आपलो दासमन चो संगे नियाय आउर नुकु-नुकु बेबार करा, ऐ समजुन भाती कि सरग ने तुमचो बले गोटक मालिक आसे।

² पारथना ने लगुन राहा, आउर धन्यबाद चो संगे हुनचो ने जागरत राहा;

³ आउर ऐचो संगे ची संगे आमचो काजे बले पारथना करते राहा कि माहापुरू आमचो काजे बचन सुनातोर असन दुआर उगाढुन देओ, कि आमी मसीह चो हुन भेद चो बरनन करूक सकु जेचो लागुन मय कयद ने आसे,

⁴ आउर हुनके असन परकट करें, जसन मोके करतोर नुकु आय।

⁵ समया के किमती समजुन भाती बाहार चो लोगमन चो संगे अकल बितामन असन बर्ताव करा।

⁶ तुमचो बचन सदा अनुग्रह संगे आउर सुन्दर होओ कि तुमके सपाय माने चो अच्छा रीति ले जबाप देऊक ऐओ।

आखरी जुहार

⁷ लाड़रा भाई आउर बिश्वास लायक सेवक तुखिकुस, जोन परबु ने मोचो सकरमी आय, मोचो सपाय गोठमन तुमके सांगुन देये दे।

⁸ हुनके मय ऐईकाजे तुमचो लगे पठाले से कि तुमके आमचो हाल मालुम होओ आउर हुन तुमचो मन-मन के शान्ति देओ।

⁹ हुनचो संगे मय उनेसिमुस के बले पठाले से जोन बिश्वास लायक आउर लाड़रा भाई आउर तुमचेई ले आय; ऐमन तुमके ऐथा चो सपाय गोठमन के सांगुन देदे।

¹⁰ अरिस्तर्खुस, जोन मोचो संगे कयदी आय, आउर मरकुस जोन बरनबास चो भाई लागु आय (जेचो बारे ने तुमी हुकुम पाऊन रलास कि अगर हुन तुमचो लगे ऐओ, तेबे हुनचो ले अच्छा रीति ले बेबार करा),

¹¹ आउर ईशु जोन युस्तुस बलाया जाऊ आय, तुमके जुहार बले सोत। खतना करलो लोगमन ले मात्र ऐई ची माहापुरू चो राज चो काजे मोचो सकरमी आउर मोचो शान्ति चो कारन रला से।

¹² इपफ्रास, जोन तुमचो ले आय आउर मसीह ईशु चो दास आय, तुमके जुहार बलेंसें आउर सदा तुमचो काजे पारथनामन ने कोशिश करू आय, बल्ले तुमी सिद्ध होऊन भाती पुरा बिश्वास चो संगे माहापुरू चो इच्छा थाने थीर राहा।

¹³ मय हुनमन चो गोहई आंय कि हुन तुमचो काजे आउर लौदीकिया आउर हियरापुलिसमन चो काजे बड़े मसागत करते रऊ आय।

¹⁴ लाड़रा बयद लूका आउर देमास चो तुमके जुहार।

¹⁵ लौदीकिया चो भाईमन के, आउर नुमफास आउर हुनमन चो घर चो कलीसिया के जुहार बोलुन देस।

¹⁶ जिदलदाय ऐ चिठ्ठी तुमचो थाने पड़ा जाओ तेबे असन करा कि लौदीकिया चो कलीसिया ने बले पड़ा जाओ, आउर हुन चिठ्ठी जोन लौदीकिया ले ऐये दे हुनके तुमी बले पड़ा।

¹⁷ आउर अर्खिप्पुस ले बोला कि जोन सेवा परबु ने तुके सोपा गेली से, हुनके सावधानी चो संगे पुरा करा।

¹⁸ मय पौलुस चो आपलो हाथ ले लिकलोर जुहार। मचो सिकरामन के सुरता संगाहा। तुमचो उपरे अनुग्रह होते रओ। आमीन।