कुलुस्सियो 1 - Halbiशुभकामनामन 1 पौलुस चो बाटले, जोन माहापुरू चो इच्छा ले मसीह ईशु चो पठालोबिता आय, आउर भाई तीमुथियुस चो बाटले, 2 मसीह ने हुन पवितर आउर बिश्वासी भाईमन चो नाव जोन कुलुस्से ने रऊ आत। आमचो बुआ माहापुरू चो बाटले तुमके अनुग्रह आउर शान्ति मिरते रओ। धन्यबाद 3 आमी तुमचो काजे हरमेशा पारथना करून आपलो परबु ईशु मसीह चो बुआ बल्लोने माहापुरू चो धन्यबाद करूं आंव, 4 कसनबल्लोने आमीमन सुनलु से कि मसीह ईशु उपरे तुमचो बिश्वास आसे, आउर सपाय पवितर लोगमन ले तुमी मया संगाऊ आहास; 5 हुन आशा करलोर बिती तीज चो लागुन जोन तुमचो काजे सरग ने संगालोर आसे, जेचो बरनन तुमी हुन नगतखबर चो सत बचन ले सुनुन चुकलासास, 6 जोन तुमचो लगे पहुँचली से, आउर जसन जगत ने बले फर आनुन आउर बाड़ते जाऊ आय, असने ची जोन दिन ले तुमी हुनके सुनलास आउर सत ले माहापुरू चो अनुग्रह चितालासास, तुमचो ने बले असने ची करू आय। 7 हुनचो सिक्या तुमी आमचो लाड़रा संगे कामकरू इपफ्रास ले पावलास, जोन आमचो काजे मसीह चो बिश्वास लायक सेवक आय। 8 हुन तुमचो मया के जोन आत्मा ने आसे आमचो उपरे परकट करलो। आत्मिक बड़ोतरी काजे पारथना 9 ऐईकाजे जोन दिन ले ऐ सुनलु से, आमी बले तुमचो काजे ऐ पारथना करतोर आउर बिनती करतोर नी छांडु कि तुमी पुईतराय आत्मिक गिआन आउर समज संगे माहापुरू चो इच्छा चो पयचान ने भरपूर होऊन जाहा, 10 बल्ले तुमचो चाल-चलन परबु चो लायक होओ, आउर हुन सपाय परकार ले हरिक होओ, आउर तुमचो ने हर परकार चो बड़ीया काममन चो फर धरो, आउर तुमी माहापुरू चो पयचान ने बाड़ते जाहा, 11 हुनचो महिमा चो शक्ति चो अनुसार सपाय परकार चो सामरत ले बलवन्त होते जाहा, ऐथा ले कि हरिक चो संगे हर परकार ले धीरज आउर सयनशक्ति दकाऊक सका, 12 आउर बुआ चो धन्यबाद करते राहा, जोन आमके ऐ लाईक बनालो कि उजर ने पवितर लोगमन चो संगे हक ने मिसुन रऊ। 13 हुनी आमके अंधार चो बश ले छंड़ाऊन भाती आपलो लाड़रा बेटा चो राज ने परवेश करालो, 14 जोन थाने आमके छुटकारा बल्लोने पापमन चो छमा परापत होऊ आय। मसीह चो बड़ीया आउर हुनचो काम 15 बेटा तो नी दका देतो माहापुरू चो सवरूप आउर पुईतराय बरमाण्ड ने पयलवात आय। 16 कसनबल्लोने हुनचेई ने पुईतराय तीजमन चो रचना होली, सरग चो होओ नाहले धरतनी चो, दकलोर नाहले नी दकलोर, काय सिंघासन, काय परभुता मन, काय परधानमन, काय अधिकार, पुईतराय तीजमन हुनचेई बाटले आउर हुनचेई काजे बनाय गेली से। 17 हुनी सपाय तीजमन ने पयला आय, आउर सपाय तीजमन हुनचेई थाने थीर रऊ आय। 18 हुनी देंह, बल्लोने कलीसिया चो मुण्ड आय; हुनी मुर आय, आउर मरलो बितामन थानले जीव उठातो बितामन ने पयलवात चो सपाय गोठमन ने हुनी परधान ठेबो। 19 कसनबल्लोने बुआ चो हरिक होतोर ऐई थाने आसे कि हुनचो ने पुईतराय परिपुरनता बास करो, 20 आउर हुनचो कुरूस थाने बोहड़लो बिती लऊ चो कारन मिला-मिसा करून, सपाय तीजमन के हुनचेई कारन ले आपलो संगे मिलान करोत, भले हुन धरतनी थानो होओ भले सरग थानो होओ। 21 तुमी जोन पयले निकरालोर राआस आउर खराप काममन चो लागुन मन ले बयरी राआस; 22 हुन अदायं हुनचो शारीरिक देंह ने मरना चो कारन तुमचो बले मिलान करलो बल्ले तुमके आपलो पुरे पवितर आउर निसकलंक, आउर बेकसूर बनान भाती हाजिर करो। 23 अगर तुमी बिश्वास चो पाया थाने जमखम बनुन राहा आउर हुन नगतखबर चो आशा के जोन के तुमी सुनलासास नी छांडा, जेचो परचार बादरी चो खाले चो पूईतराय बरमाण्ड ने कराय गेली, आउर जेचो मय, पौलुस, सेवक बनले। कलीसिया काजे मसागत 24 अदायं मय हुन दुखमन चो लागुन हरिक करें से, जोन तुमचो काजे उठाऊँ आंय आउर मसीह चो कलेशमन चो ऊना हुनचो देंह चो काजे, बल्ले कलीसिया चो काजे, आपलो देंह ने पुरा करू आंय; 25 जेचो मय माहापुरू चो हुन जुगाड़ चो अनुसार सेवक बनले जोन तुमचो काजे मोके सोपला, बल्ले मय माहापुरू चो बचन के पुरा-पुरा परचार करें। 26 बल्लोने हुन भेद के जोन समयामन आउर पीढ़ीमन ले गुपत रली, मान्तर अदायं हुनचो हुन पवितर लोगमन उपरे परकट होली से। 27 जोन थाने माहापुरू परकट करतोर चाह लो कि हुनमन के मालुम होओ कि दुसर जातिमन ने हुन भेद चो महिमा चो किमत काय आय, आउर हुन ऐ आय कि मसीह जोन महिमा चो आशा आय तुमचो ने रऊ आय। 28 जेचो परचार करून आमी हरकोनी माने के जनाऊन देऊ आंव आउर पुईतराय गिआन ले हरकोनी माने के सिकाऊ आंव, कि आमी हरकोनी माने के मसीह ने सिद्ध करून हाजिर करूं। 29 ऐचीई काजे मय हुनचो हुन शक्ति चो अनुसार जोन मोचो ने सामरत चो संगे असर करू आय, तनमन लगाऊन भाती मसागत बले करू आंय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation