2 कुरिन्थियो 11 - Halbi

हुनमन चो बिश्वास लायक काजे चिन्ता

¹ अगर तुमी मोचो खिन्डिक असन मुरूक सहतास तेबे काय ची नुकु होती; हव, मोचो साहा बले।

² कसनबल्लोने मय तुमचो बारे ने माहापुरू चो धुन लगाऊन रऊ आंय, ऐईकाजे कि मय गोटक ची माने ले तुमचो गोठ लगाले से कि तुमके पवितर कुंआरी चो असन मसीह के सोपुन देयें दें।

³ मान्तर मय डरें से कि जसन सांप आपलो चलाकी ले हव्वा के बहकालो, असने ची तुमचो मन हुन सोज आउर पवितरता ले जोन मसीह चो संगे होतोर आय, काहांय खराप नी करा जाओ।

⁴ अगर कोनी तुमचो लगे ऐऊन भाती कोनी दुसर ईशु चो परचार करोत, जेचो परचार आमीमन नी करलु; नाहले कोनी आउर आत्मा तुमके मिरो, जोन पयले नी मिरू रली; नाहले आउर कोनी नगतखबर सुना ओत जोन के तुमी पयले नी मानु राआस, तेबे तुमी हुनके सहु आहास।

पौलुस आउर फंदी पठालोबिता

⁵ मय तो समजु आंय कि मय कोनी गोठ ने बड़े ले बड़े पठालोबितामन ले कम नुआय।

⁶ अगर मय जबापदारी ने अनाड़ी आंय, तेबले बले गिआन ने नाई। आमीमन ऐके सपाय गोठ ने सपाय परकार ले तुमचो काजे परकट करलु से।

⁷ काय ऐ थाने मय काई पाप करले कि मय तुमके माहापुरू चो नगतखबर सेंत-मेंत सुना ले; आउर आपन खुद के खाले करले कि तुमी डेंग होऊन जाहा?

⁸ मय दुसर कलीसियामन के लुटले, बल्लोने मय हुनमन ले भुती धरले बल्ले तुमचो सेवा करें।

⁹ आउर जिदलदाय मय तुमचो संगे रये आउर मोके घाटा होली, तेबे मय काचीई उपरे बोजा नी लातले, कसनबल्लोने भाईमन मकिदुनिया ले ऐऊन भाती मोचो घटलोर के पुरा करला; आउर मय सपाय गोठ ने आपन खुद के तुमचो उपरे बोजा बनतोर ले ठेबाले, आउर ठेबाऊन रयें दे।

¹⁰ अगर मसीह चो सत मोचो ने आसे तो अखाया देश ने कोनी मोके ऐ घमण्ड ले नी ठेबा दे।

¹¹ केंव? काय ऐईकाजे कि मय तुमचो ले मया नी संगाये? माहापुरू ऐ जाने से कि मय मया संगाऊ आंय।

¹² मान्तर जोन मय करू आंय, हुनी करते रयें दे कि जोन लोग दाँव डगराऊ आत हुनमन के मय दाँव पाऊक नी देयें, बल्ले जोन गोठ ने हुनमन घमण्ड करू आत, हुन थाने हुनमन आमचो ची असन ठेबोत।

¹³ कसनबल्लोने असन लोग फंदी पठालोबिता, आउर छंद ले काम करतो बितामन, आउर मसीह चो पठालोबितामन चो भेष धरतो बितामन आत।

¹⁴ ऐ काई भक्यातो बिती गोठ नुआय कसनबल्लोने शयतान खुद बले उजर मय सरगदूत चो भेष धारन करू आय।

¹⁵ ऐ काई अगर हुनचो सेवक बले धरम चो सेवकमन चो असन भेष धरो, तो काई बड़े गोठ नुआय, मान्तर हुनमन चो आखरी हुनमन चो काममन चो अनुसार होये दे।

मसीह चो काजे दुक उठातोर

¹⁶ मय फेर बलें सें, कोनी मोके मुरूक नी समजोत; नाहले मुरूक ची समजुन भाती मोचो सहा, बल्ले खिन्डिक असन मय बले घमण्ड करूक सकें।

¹⁷ ऐ बेधड़क घमण्ड ने जोन काई मय बोलु आंय, हुन परबु चो हुकुम चो अनुसार नाई मान्तर माना मुरूक ले ची बोलु आंय।

¹⁸ जसन कि खुबे असन लोग देंह चो अनुसार घमण्ड करू आत, तो मय बले घमण्ड करें दें।

¹⁹ तुमी तो समजदार होऊन भाती हरिक ले मुरूकमन चो सऊ आहास।

²⁰ कसनबल्लोने जिदलदाय तुमके कोनी दास बनाऊ आय, नाहले खाऊन जाऊ आय, नाहले फासु आय, नाहले आपन खुद के बड़े बनाऊ आय, नाहले तुमचो मुंह थाने थापड़ मारू आय, तेबे तुमी सऊ आहास।

²¹ मोचो बोलतोर अनादर चो रीति ची थाने आसे, माना आमी ऐचो काजे कमजोर असन रलु। मान्तर जोन कोनी गोठ ने कोनी साहास करू आय मय मुरूक ले बोलु आंय तेबे मय बले साहास करू आंय।

²² काय हुनीमन ची इब्रानी आत? मय बले आंय। काय हुनीमन ची इस्राएली आत? मय बले आंय। काय हुनीमन ची अब्राहाम चो बंश आत? मय बले आंय।

²³ काय हुनीमन ची मसीह चो सेवक आत मय बया चो असन बलें सें मय हुनमन ले बडुन भाती आंय! खुबे मसागत करलो ने; घन-घन कयद होतोर ने; कोड़ा खातोर ने; घन-घन मरना चो खतरामन ने।

²⁴ पांच हार मय यहूदीमन चो हाथ ले उन्तालीस-उन्तालीस कोड़ा खादले।

²⁵ तीन हार मय बेत खावले; गोटक हार मोचो उपरे पकना मारला; तीन हार जाहज, जेचो थाने मय चेगु रयें, टुटुन गेली; गोटक रात दिन ने मय समुन्द ने बिताले।

²⁶ मय घन-घन यातरामन ने; लंदीमन चो खतरामन ने; डाकुमन चो खतरामन ने; आपलो जाति बितामन ले खतरामन ने; दुसर जातिमन ले खतरामन ने; नंगरमन चो खतरामन ने; रान चो खतरामन ने; समुन्द चो खतरामन ने; फंदी भाईमन चो मंजी खतरामन ने रले।

²⁷ मसागत आउर कष्ट ने; घन-घन चेतते रतोर ने; भुक पिआस ने; घन-घन उपास करतोर ने; सीतकार ने; उगाढ़ा रतोर ने;

²⁸ आउर दुसर गोठमन के छांडुन भाती जेचो बरनन मय नी करें, सपाय कलीसियामन चो चिन्ता रोजे दिना मोके चेपाऊ आय।

²⁹ काचो कमजोरी ले मय कमजोर नी होयें? काचो ठोकरना खादलो ले मोचो जीव नी दुके?

³⁰ अगर घमण्ड करतोर जरूरी आय, तो मय आपलो कमजोरी चो गोठमन थाने घमण्ड करें दें।

³¹ परबु ईशु चो माहापुरू आउर बुआ जोन हरमेशा धन्य आय, जाने से कि मय झूठ नी बलें।

³² दमिश्क ने अरितास राजा चो बाटले जोन हाकिम रलो, हुन मोके धरतो काजे दमिशकिमन चो नंगर थाने पाहारा बसाऊन रये,

³³ आउर मय गोपा ने खिड़की ले होऊन भाती बाड़ा उपर ले उतराया गेले, आउर हुनचो हाथ ले बाचुन निकरले।