1तीमुथियुस 5 - Halbi

कलीसिया चो सदस्यमन ले बर्ताव

¹ कोनी डोकरा के नी खीज, मान्तर हुनके बुआ जानुन भाती समजाऊन देस, आउर जुआनमन के भाई जानुन भाती,

² डोकरी बायले लेकीमन के आया जानुन भाती; आउर जुआन बायले लेकीमन के पुरा पवितरता ले भईन जानुन भाती समजाऊन देस।

रान्डीमन चो सायता

³ हुन रान्डीमन चो, जोन सते रान्डी आय, ईजीत कर।

⁴ अगर कोनी रान्डी चो पिलामन नाहले नाती पुती आसोत, तेबे हुनमन आगतु आपने ची घरलोगमन चो संगे भक्ति चो बरताव कर, आउर आपलो आया-बुआ बाकी के हुनमन चो हक देतोर सिकोत, कसनबल्लोने ऐ माहापुरू के भाऊ आय।

⁵ जोन सते रान्डी आत, आउर हुनचो कोनी निआत, हुन माहापुरू उपरे आशा संगाऊ आय, आउर रात दिन बिनती आउर पारथना ने मतभुल रऊ आय;

⁶ मान्तर जोन भोग बिलास ने पडुन गेला, हुन जीवता-जीवता मरून गेला से।

⁷ ऐ गोठमन चो बले हुकुम दिया कर बल्ले हुनमन बेकसूर रओत।

⁸ मान्तर अगर कोनी आपनमन चो आउर निज करून आपलो घरलोगमन चो चिन्ता नी करे, तो हुन बिश्वास ले मुकरून गेलो से आउर अन्दबिश्वासी ले बले खराप बनुन गेलो से।

⁹ हुन रान्डी चो नाव लिका जाओ जोन साठ बरक ले कम चो नी होओ, आउर गोटक ची मुनुक चो बायले रऊन रओ,

¹⁰ आउर अच्छा काम ने सुनाम रऊन रओ, जोन पिलामन चो पालन पोषन करू रओ; सगा चो सेवा करू रओ, पवितर लोगमन चो पाँय धोऊ रओ, दुखिमन चो सायता करू रओ, आउर हरकोनी अच्छा काममन ने मन लगाऊ रओ।

¹¹ मान्तर जुआन रान्डीमन चो नाव नी लिका, कसनबल्लोने जिदलदाय हुनमन मसीह चो बिरूद करून सुक-बिलास ने पडुन जाऊ आत तो बिहा करूक चाहाऊं आत,

¹² आउर दोषी ठेबु आत, कसनबल्लोने हुनमन आपलो पईल चो बिश्वास के छांडुन दिला से।

¹³ ऐचो संगे ची संगे हुनमन घर-घर फिरून भाती ठग होऊक सिकु आत, आउर मात्र ठग नाई मान्तर पुटुर-पुटुर करते रऊ आत आउर दुसरमन चो काम ने हाथ बले डालु आत आउर बेकार गोठमन बोलु आत।

¹⁴ ऐईकाजे मय ऐ चाहाऊं आय कि जुआन रान्डीमन बिहा करोत, आउर पिला जनमा ओत आउर घर दुआर संभालोत, आउर कोनी बिरूदी के बदनाम करतोर मवका नी दे ओत।

¹⁵ कसनबल्लोने कितलो तो भहकुन भाती शयतान चो पाटे होऊन गेला से।

¹⁶ अगर कोनी बिश्वासीनी चो थाने रान्डीमन आसोत, तेबे हुनी हुनमन चो सायता करो कि कलीसिया थाने भार नी होओ, बल्ले हुन हुनमन चो सायता करूक सको जोन सते रान्डीमन आत।

बचन चो सिकातो बिता सियानमन चो मान

¹⁷ जोन सियान अच्छा जुगाड़ करू आत, खास करून हुनमन जोन बचन सुनातोर आउर सिकातोर थाने मसागत करू आत, दुय गुना ईजीत चो लायक समजा जाओत।

¹⁸ कसनबल्लोने पवितर शास्त्र बले से, “फान्दतो बिती बयला चो मुंह नी बान्दा,” कसनबल्लोने “भुतीयार आपलो भुती चो हकदार आय।”

¹⁹ काई दोष कोनी सियान उपरे लगाया जाओ तेबे बिना दुय नाहले तीन गोहईमन चो हुनके नी सुन।

²⁰ पाप करतो बितामन के सपाय चो पुरे समजाऊन देस, बल्ले आउर लोग बले डरोत।

²¹ माहापुरू, आउर मसीह ईशु आउर चुनलो बितामन सरग दूतमन चो हाजिर जानुन भाती मय तुके जनाऊन देयें से कि तुय मन खोलुन भाती ऐ गोठमन के माना कर, आउर कोनी काम भेदभाव ले नी कर।

²² काचीई थाने झटके हाथ नी संगाव, आउर दुसरमन चो पापमन ने शामिल नी हो; आपन खुद के पवितर बनान संगाव।

²³ अगम ने मात्र पानी ची पिव तो बिता नी रा, मान्तर आपलो पेट चो आउर आपलो घन-घन बेमार होतोर लागुन खिन्डिक-खिन्डिक दाखरस बले पिव।

²⁴ कितलो मानेमन चो पाप परकट होऊन जाऊ आय, आउर नियाय चो काजे पयले ले पोंहचुन जाऊ आत, मान्तर कितलो चो पाटे ले ऐऊ आत।

²⁵ असने ची कितलो अच्छा काम बले परकट होऊ आय; आउर जोन असन नी होओत, हुनमन बले लुकुक नी सकोत।