1 थिस्सलुनीकियो 1 - Halbi

शुभकामनामन

¹ पौलुस आउर सिलवानुस आउर तीमुथियुस चो बाटले थिस्लुनिकीमन चो कलीसिया चो नाव, जोन माहापुरू बुआ आउर परबु ईशु मसीह ने आसे। अनुग्रह आउर शान्ति तुमके मिरते रओ।

थिस्सलुनीमन चो अच्छा उदाहरन

² आमी आपलो पारथनामन ने तुमके सुरता करूं आंव आउर सदा तुमी सपाय चो बारे ने माहापुरू चो धन्यबाद करूं आंव,

³ आउर आपलो माहापुरू आउर बुआ चो पुरे तुमचो बिश्वास चो काम, आउर मया चो मसागत, आउर आमचो परबु ईशु मसीह ने आशा चो धीरता के सरलगा, सुरता करूं आंव।

⁴ हे भाईमन, माहापुरू चो लाड़रा लोगमन, आमी जानु से कि तुमी चुनलो बिता आहास।

⁵ कसनबल्लोने आमचो नगतखबर तुमचो लगे ना मात्र शब्द मात्र ची ने मान्तर सामरत आउर पवितर आत्मा ने, आउर बड़े तय चो संगे पहुँचली से; जसन तुमी जानेसास कि आमी तुमचो काजे तुमचो मंजी ने कसन बनुन जाऊ रऊँ।

⁶ तुमी बड़े कलेश ने, पवितर आत्मा चो हरिक चो संगे, बचन के मानुन भाती आमचो आउर परबु चो असन चाल चलुक मुरयालास।

⁷ ऐथा ले कि मकिदुनिया आउर अखाया चो सपाय बिश्वासीमन चो काजे तुमी नमूना बनलास।

⁸ कसनबल्लोने तुमचो थानले ना मात्र मकिदुनिया आउर अखाया ने परबु चो बचन सुनाया गेली, मान्तर तुमचो बिश्वास चो जोन माहापुरू उपरे आसे, हर जगा असन चरचा फयलुन गेली से कि आमके बोलतोर जरूरत ची निआय।

⁹ कसनबल्लोने हुनमन खुद ची आमचो बारे ने सांगु आत कि तुमचो लगे आमचो ऐतोर कसन होली; आउर तुमी कसन मुरतीमन ले माहापुरू चो बाटे फिरलास बल्ले जीवता आउर सत माहापुरू चो सेवा करा,

¹⁰ आउर हुनचो बेटा चो सरग थानले ऐतोर बाट टाकते राहा जोन के हुन मरलो बितामन थानले जिआ लो, बल्लोने ईशु चो, जोन आमके ऐतो बिती घोर रिस ले बचाऊ आय।