1 पतरस 1 - Halbi

शुभकामनामन

¹ पतरस चो बाटले जोन ईशु मसीह चो पठालोबिता आय, हुन परदेशीमन चो नाव जोन पुन्तुस, गलातिया, कप्पदुकिया, आसिया आउर बितूनिया ने जत-खत होऊन भाती रऊ आत,

² आउर माहापुरू बुआ चो अगम गिआन चो अनुसार, आत्मा चो पवितर करलोर दुवारा हुकुम मानतोर आउर ईशु मसीह चो लऊ के छिंछतो काजे चुना गेलासे। तुमके अनुग्रह आउर शान्ति खुबे ले खुबे मिरते रओ।

गोटक सरग चो धन

³ आमचो परबु ईशु मसीह चो माहापुरू आउर बुआ चो धन्यबाद होओ, जोन ईशु मसीह चो मरलो थानले जीव उठलोर दुवारा, आपलो बड़े दया ले आमके जीव आशा चो काजे नवा जनम दिलो,

⁴ आउर गोटक अमर, आउर निंगल, आउर नी सरतो धन काजे जोन तुमचो काजे सरग ने संगालोर आसे;

⁵ जेचो रक्षा माहापुरू चो सामरत ले बिश्वास चो दुवारा हुन मुक्ति चो काजे, जोन ऐतो बिती समया ने परकट होतो बिती आय, करा जाऊ आय।

⁶ ऐई लागुन तुमी मतभुल होऊ आस, आउर जरूरी आय कि ऐबे खिन्डिक दिन चो काजे नाना परकार चो परीक्षामन चो लागुन दुख ने आसास;

⁷ आउर ऐ ऐईकाजे आय कि तुमचो परकलो बिती बिश्वास, जोन आईग ले तपालो बिती नाश होतो बिती सोना ले बले कितलो आगर बड़े मोल आय, ईशु मसीह चो परकट होलो ने परशंसा आउर महिमा आउर मान चो कारन ठेबला।

⁸ हुनचो ले तुमी बिना दके मया संगाऊ आस आउर अदायं तो हुनचो उपरे बिना दकुन बले बिश्वास करून असन हरिक आउर मतभुल होऊ आस जोन आमचो गोठ ले बहारे आउर महिमा ले भरलोर आसे;

⁹ आउर आपलो बिश्वास चो करलो फल आउर आत्मामन चो मुक्ति परापत करू आस।

नबी मन चो गोहई

¹⁰ ऐई मुक्ति चो बारे ने हुन अगम गिआनीमन खुबे खोज बीन आउर जाच-पड़ताल करला, जोनमन हुन अनुग्रह चो बारे ने जोन तुमचो उपरे होतो बिती रये, अगम गोठ करू रवत।

¹¹ हुनमन ऐ गोठ चो खोज करला कि मसीह चो आत्मा जोन हुनमन थाने रये, आउर पयले ले ची मसीह चो दुकमन चो बाटे हुनचो पाचे होतो बिती महिमा चो गोहई देते रये, हुन कोन ले आउर कसन समया चो बाटे ईसारा करते रलो।

¹² हुनमन उपरे ऐ परकट करा गेली कि हुनमन आपलो नाई मान्तर तुमचो सेवा चो काजे ऐ गोठमन बोला करते रओत, जेचो खबर अदायं तुमके हुनमन चो दुवारा मिरली जोनमन पवितर आत्मा चो दुवारा, जोन सरग ले पटाया गेली, तुमके नगतखबर सुनाला; आउर ऐ गोठमन के सरगदूत बले धिआन ले दकतोर इच्छा संगाऊ आत।

पवितर जीवना जिवतोर बुलाहट

¹³ ऐई लागुन आपलो-आपलो अकल चो करांड बान्दुन भाती, आउर चेत रऊन भाती, हुन अनुग्रह चो पुरा आशा संगाआ जोन ईशु मसीह चो परकट होतोर समया तुमके मिरतो बिती आय।

¹⁴ हुकुम मानु लेकामन चो असन आपलो अगिआनता चो समया चो जुना बिती मनमानीमन चो समान नी बना।

¹⁵ मान्तर जसन तुमचो हाग देऊ बिता पवितर आय, हुसने ची तुमी बले आपलो सपाय चाल-चलन ने पवितर बना।

¹⁶ कसनबल्लोने लिकलोर आसे, “पवितर बना, कसनबल्लोने मय पवितर आय।”

¹⁷ आउर जसन कि तुमी “हे बुआ” बोलुन भाती हुनचो ले पारथना करू आस, जोन बिना भेद-भाव हरकोनी चो काम चो अनुसार नियाय करू आय, तेबे आपलो परदेशी होतोर समया भय ले गुजारा।

¹⁸ कसनबल्लोने तुमी जानास कि तुमचो ठग चाल-चलन जोन बुआ दादी ले चलते ऐये से, हुनचो ले तुमचो छुटकारा चाँदी-सोना आउर नाश बिती तीजमन चो दुवारा नी होली;

¹⁹ मान्तर बेकसूर आउर निसकलंक मेमना, बल्लोने मसीह चो बड़े मोल लऊ चो दुवारा होली।

²⁰ हुनचो गिआन तो जगत चो उपजास चो पयले ची ले जाना जाऊ रये, मान्तर अदायं ऐ सरासरी जुग ने तुमचो काजे परकट होलो।

²¹ हुनचो दुवारा तुमी हुन माहापुरू थाने बिश्वास करू आस, जोन हुनके मरलो बितामन थानले जिआलो आउर महिमा दिलो कि तुमचो बिश्वास आउर आशा माहापुरू थाने होओ।

²² आउर: जसन कि तुमनमन भाईचारा चो निष्कपट लाड़ चो लागुन सत चो मानतो ले आपलो मनमन के पवितर करलासास, तेबे तन-मन लगाऊन भाती गोटक दुसर ले खुबे मया संगाहा।

²³ कसनबल्लोने तुमनमन नाशवान नाई मान्तर अविनाशी बीज ले, माहापुरू चो जीवता आउर हरमेशा ठेबतो बिती बचन चो दुवारा नवा जनम पावलासास।

²⁴ कसनबल्लोने “हरकोनी जीव लाटा चो असन आत, आउर हुनचो सपाय शोभा लाटा चो फुल चो असन आय। लाटा सुकुन जाऊ आय, आउर फुल झडुन जाऊ आय,

²⁵ मान्तर परबु चो बचन जुग-जुग थीर रऊ आय।” आउर ऐई नगतखबर चो बचन आय जोन तुमके सुनाया गेलीसे।