1 कुरिन्थियो 9 - Halbi

पठालोबितामन चो कहनी

¹ काय मय छुटछाड़ा नुआय? काय मय पठालोबिता नुआय? काय मय ईशु के जोन आमचो परबु आय, नी दकले? काय तुमी परबु ने मचो बनालोर नुआस?

² अगर मय दुसरमन चो काजे पठालोबिता नुआय, तेबले बले तुमचो काजे तो आंय; कसनबल्लोने तुमी परबु ने मचो पठालो बिती थाने छाप आहास।

³ जोन मोके जाचु आत, हुनमन चो काजे ऐई मोचो जबाप आय।

⁴ काय आमके खातो-पीतोर अधिकार निआय?

⁵ काय आमके ऐ अधिकार निआय, कि कोनी मसीह भईन चो संगे बिहा करून हुनचो काजे फिरो, जसन दुसर पठालोबिता आउर परबु चो भाई आउर कयफा बोलु आत?

⁶ नाहले मात्र मोके आउर बरनबास के ची अधिकार निआय कि कमातोर छांडु।

⁷ कोन केबे आपलो घर ले खाऊन भाती पलटन चो कामकरू आय? कोन अंगुर चो बनवाड़ी लगाऊन भाती हुनचो फर नी खाये? कोन मेंडीमन चो राका करून हुनमन चो गोरस नी पिये?

⁸ काय मय ऐ गोठमन माने ची चो रीति थाने बलेंसें?

⁹ काय नियम बले ऐई ची नी बले? कसनबल्लोने मूसा चो नियम ने लिकलोर आसे, “फान्दतो दाय हिन्ड़तो बिती बयला चो मुंह नी बांद।” काय माहापुरू बयलामन ची चिन्ता करू आय?

¹⁰ नाहले अच्छा करून आमचो काजे बोलु आय। हव, आमचो काजे ची लिका गेली, कसनबल्लोने ठीक आय कि जोपतो बिता आशा ले जोपो आउर फान्दतो बिता शामिल होतोर आशा ले फान्दो।

¹¹ आउर जिदलदाय कि आमी तुमचो काजे आत्मिक तीजमन बुनलु, तेबे काय ऐ कोनी बड़े गोठ आय कि तुमचो देंह चो तीजमन चो फसह काटोत।

¹² जिदलदाय दुसरमन चो तुमचो उपरे ऐ अधिकार आसे, तेबे काय आमचो ऐचो ले आगर नी होयेदे? मान्तर आमी ऐ अधिकार काम ने नी आनलु; मान्तर सपाय काई सहु आंव कि आमचो बाटले मसीह चो नगतखबर ने काई अड़चन नी होओ।

¹³ काय तुमी नी जानास कि जोन मंदिर ने सेवा करू आत, हुनमन मंदिर थानो खाऊ आत; आउर जोन बेदी चो सेवा करू आत, हुनमन वेदी चो संगे सामिल होऊ आत?

¹⁴ ऐई रीति ले परबु बले ठेबालो कि जोन लोग नगतखबर सुनाऊ आत, हुनमन चो जीवना नगतखबर ले होओ।

¹⁵ मान्तर मय ऐ मन ले कोनी बले गोठ काम ने नी आनले, आउर मय ऐ गोठमन ऐईकाजे नी लिकले कि मोचो काजे असन करा जाओ, कसनबल्लोने ऐचो ले तो मोचो मरतोर ची नुकु आय कि कोनी मोचो घमण्ड के फकाहा ठेबा ओत।

¹⁶ अगर मय नगतखबर सुनायेंदें, तो मोचो काजे काई घमण्ड चो गोठ नुआय; कसनबल्लोने ऐ तो मोचो काजे जरूरी आय। अगर मय नगतखबर नी सुनायें, तो मोचो उपरे हाय!

¹⁷ कसनबल्लोने अगर आपलो इच्छा ले ऐ करें से तेबे भुती मोके मिरे से, आउर अगर आपलो इच्छा ले नी करे तेबले बले भण्डारीपन मोके सोपा गेली से।

¹⁸ तो मोचो काय भुती आय? ऐ कि नगतखबर सुनातो ने मय मसीह चो नगतखबर सेंत मेंत करून देये ऐथा ले कि नगतखबर ने जोन मोचो अधिकार आसे हुनके बले मय पुरा रीति ले काम ने नी आने।

सपाय चो सेवा

¹⁹ कसनबल्लोने सपाय ले छुटछाड़ा होतोर ले बले मय आपन खुद के सपाय चो दास बनान दिले से कि खुबे लोगमन के झिकुन आने।

²⁰ मय यहूदीमन चो काजे यहूदी बनले कि यहूदीमन के झिकुन आने। जोन लोग नियम चो अधीन आत हुनमन चो काजे मय नियम चो अधीन नी होलोर ने बले नियम चो अधीन बनले कि हुनमन के जोन नियम चो अधीन आत, झिकुन आने।

²¹ नियम नी मानतो लोगमन चो काजे मय-जोन माहापुरू चो नियम ले लापी नाई मान्तर मसीह चो नियम ले अधीन आंसे नियम नी मानतो लोग चो असन बनले कि नियम नी मानतो लोग चो मन के झिकुन आने।

²² मय कमजोरमन चो काजे कमजोर असन बनले कि कमजोरमन के झिकुन आने। मय सपाय मानेमन चो काजे सपाय काई बनले कि कोनी ना कोनी रीति ले कोनी गोटक चो मुक्ति करायें।

²³ मय ऐ सपाय काई नगतखबर चो काजे करू आंय कि दुसरमन चो संगे हुनमन चो भागी होऊन जायें।

मसीही दौड़

²⁴ काय तुमी नी जानास कि दौड़ ने तो दौडू सपाय आत, मान्तर ईनाम गोटक ची धरून जाऊ आय? तुमी असने ची दौड़ा कि जीता।

²⁵ हरकोनी पयलवान सपाय परकार चो सहन करू आय; हुनमन तो गोटक कोमजतो बिती मुकुट के पावतो काजे ऐ सपाय करू आत, मान्तर आमी तो हुन मुकुट चो काजे करू आंव जोन कोमजतो बिती नुआय।

²⁶ ऐईकाजे मय तो ऐई रीति ले दौड़ें से, मान्तर लक्ष हीन नुआय; मय बले ऐई रीति ले मुटकामन ले लडु आंय, मान्तर हुनचो असन नाई जोन लेहरा पेटते-पेटते लडु आय।

²⁷ मान्तर मय आपलो देंह के मारते कुटते आउर वश ने आनु आंय, असन नी होओ कि दुसरमन के परचार करून मय खुद ची कोनी रीति ले ठग ठेबे।