Yohane 20 - Lufingano Lupya

Ichanga kigaya kinu

¹ Pamilawu peyekwindaluka pa Jumapili, Maliya Magadalena ahele kuchanga swe ifika iliganga lyevevadinye uwuvi lihesiswe.

² Ndawe abitige luvilo ifika kwa Simoni Petulo na kwa umunyigendo uyungi yealimwende va Yesu akuvalongela ukuta, “Vamuhesise Umutwa muchanga, na situkukukagula kwe vamuvikite.”

³ Swe Petulo ihuma na yula umunyigendo uyungi vibita kuchanga.

⁴ Ndawe vabitige luvilo we vavili, na umunyigendo uyungi amulutye akumutalila Petulo ukufika kuchanga.

⁵ Ndawe agondamige na ukuhungilila swe akuyiwona isanda, neke umwene siinji.

⁶ Swe ndawe Simoni Petulo, nave afikige na ukwingila muwuvi ilava isanda.

⁷ Na kikitema ichekipilingise Mumutwe gwa Yesu, sichekilipamwi na iyo isanda, chepalubali kipilingise kiyena.

⁸ Neke peingile, na yula umunyigendo uyungi yealatasile ukufika kuchanga swe ilava, na ukufuuwa. (

⁹ Sivevalawukagula Uwandike uwewulonzile ukutigila, lumuvaje ukusilibuka.)

¹⁰ Ndawe avanyigendo vala vapilukige ukwawo.

Yesu akwiyelelula kwa Maliya Magadalena

¹¹ Maliya eimite pivala pipi na uwuvi ivemba. Wepeavemba agondime ilava muwuvi,

¹² swe akuvawona Vanyivaha va Nguluvi vavili vafwite imyenda imyelu vateng'ime pegwepogoli umufimba gwa Yesu uyumwi kumutwe uyungi kumagulu.

¹³ Swe vakumuwusa, “Yuva, mbi wivembela kiki?” Neke apitule, “Vamuhesise Umutwa vangu na singukukagula kwe vamuvisile!”

¹⁴ Nave ave ilonga iso apitwike swe akumuwona Yesu imile neke alemwe ukumukagula ulwa ye Yesu.

¹⁵ Yesu amuwusise, “Yuva, mbi wivembela kiki? wisaka nani?” Maliya atigilige wanda ye mulolesi va ikinyungu, swe akumutigila, “Mulugu wone umuhesise veve ndagile pumuvikite, nane ndimutegula.”

¹⁶ Swe Yesu akumukemela, “Maliya!” nave Maliya apitwike, swe akumulongela kwa Kiebulaniya, “Laboni.” Kwekutigila, “Mwigisi.”

¹⁷ Yesu amulonje, “Ulandibata, pakuva sindilapiluka kwa Dada. Ino bitage ku vanyalukolo vangu ukavalongele ulwa ndipiluka kwa Dada vangu nave Dadenyu kwa Nguluvi vangu nave Nguluvi venyu.”

¹⁸ Maliya Magadalena swe ibita kukuvalongela avanyigendo ulwa ndimuwene Umutwa na ulwa amulonje iso.

Yesu akwiyelelula kuvanyigendo vakwe

¹⁹ Pamihye kikimunyi kicho pa Jumapili avanyigendo vevakong'ine pamwi kono imilyango we midinde, pakuva wogopige avavina va Avayudaya. Ndawe Yesu aasige na ukwima pagati apawo neke avatigile, “Uwikalakunoga wuvelage na nyenye!”

²⁰ Na peyealonzile ulu swe akuvalagila amawoko gakwe na palubafu lwakwe. Ndawe avanyigendo vahekelelige pevamuwene.

²¹ Swe Yesu avalongele kangi, “Uwikalakunoga wuvelage na nyenye! Ndawe Dada lweanumite nane nguvatuma nyenye.”

²² Neke avaputile itigila, “Mwanukile Umuhe Umwelu.

²³ Wone muvadegepele avanu inzanangifu, vava vadegepilwe, wone mutane ukuvadegepela, vava sivadegepelwi.”

Yesu na Tomasi

²⁴ Ino Tomasi umunyigendo uyumwi va avanyichumi na vavili yeitambulwa munyawendani alasupali, Yesu peakuvelelukila.

²⁵ Swe avanyigendo vayagwe vakumulongela, “Tumuwene Umutwa.” Ndawe Tomasi avatigilige, “Nene pesindigaweni amavamba ga imisumali mumawoko gakwe na ukwambala ni chala changu mumavamba, na liwoko lyangu palubafu lwakwe nene sisafuuwa.”

²⁶ Peyefilutye ifilo fimunana avanyigendo vakwe vevali mukaye na Tomasi epamwinga nawo. Swe Yesu akusa imilyango we midinde akwima pagati nagati akuvatigila, “Uwikalakunoga wuvelage na nyenye!”

²⁷ Neke peamutigile Tomasi, “Aliogo kaletage ipa ichala chako ulave, lete iliwoko lyako wambale palubafu lwangu. Ulava ndawe yesiifuuwa, velage ndawe yeifuuwa!”

²⁸ Neke Tomasi pamupitule na ukutigila, “Mutwa vangu na Nguluvi vangu!”

²⁹ Yesu amutige, “Veve ufuuvitwe pakuva umbwene, vafunyilile avifuuwa wesivalawona!”

Ulupeke lwa ikitabu iki

³⁰ Ino kwekwina ifilagilo fyolofu fyapigite Yesu pa avanyigendo vakwe fyesifyandikwi mukitabu iki.

³¹ Neke ifi fyandikwe sambi mufuuwe ulwa Yesu ye Kilisito Umwana va Nguluvi na kwa ukumufuuwa muve na wumi mwitawa lyakwe.