Yohane 18 - Lufingano Lupya

Yesu akwibitilaga

¹ Ave pealonzile iso, Yesu ahesile pamwi na vanyigendo vakwe. Alowike mu mwambu gwa akakoga ka Keduloni, uko kwekwina ikinyungu swe akwingila umwene na vanyigendo vakwe.

² Nave Yuda, yeamupitwike alapasele apono pala, Pakuva Yesu abitige kolofu na vanyigendo vakwe.

³ Swe, Yuda peyeanuche ikilugu cha avanyigalu na avakami avahumige ku vavina va avatambisi na Avafalisayo vahele kuko we vakolye ifyenge na amahomelo.

⁴ Neke Yesu kono weakulukagula isikumusila iyelelwe na ukuvawusa, “Yenani ye mukumusaka?”

⁵ Neke vamupitule, “Twisaka Yesu Umunasaleti!” Swe Yesu akuvatigila, “Ye nene.” Nave Yuda yeamupitwike eimile pamwi na avatavangu.

⁶ Ave akuvalongela, “Ye nene.” Vapilwike kimbele mbele swe vigwa pasi.

⁷ Neke avawuse kangi, “Mwisaka nani?” Neke vatigile, “Yesu Umunasaleti!”

⁸ Swe akuvapitula, “Nyenye ndivalonje ulwa ye nene. Apo pemwisaka nene, muvaleke tandi iva vibitilage.” (

⁹ Alonzile ulu sambi lukwile ulukani lweealonzile, “Vala veweumelye sindamuyasisi nambi yumwi.”)

¹⁰ Ino Simoni Petulo, eina limage muhala, swe isonola nu kumuputa ilisigisa lya kundyo lya umukami va umutambisi umuvina. Na umukami yula ilitawa ali ye Maliko.

¹¹ Swe, Yesu akumulongela Petulo, “Pilule ilimage muhala. Ngali ndemwage ukunywela ikinywelo cha uluteseko cheamelye Dada?”

Yesu ali kwa Anasi

¹² Swe ndawe vala avanyigalu, na umuvina vawo, na vala avalolesi va Avayudaya vamwibete Yesu na ukumupinga

¹³ neke vamusindike tasi kwa Anasi; pakuva e mukwive va Kayafa, yee mutambisi umuvina umwaka ugo.

¹⁴ Nave Kayafa uyu ye yula yeali avalonje Avayudaya ulwa lwinogela umunu uyumwi afwe wimila avanu.

Petulo akumubihila Yesu

¹⁵ Simoni Petulo na umunyigendo uyungi vamufwatite Yesu. Na umunyigendo uyo ali akagulanike na Umutambisi Umuvina, swe akwingila pamwi na Yesu mwipala lya Umutambisi Umuvina.

¹⁶ Petulo aliimite kwivala, pamulyango. Ndawe yula umunyigendo uyungi yalakagulanike nu Mutambisi Umuvina ahumige na ukumulongela umwanahinza, umulolesi va umulyango swe akumwingisa Petulo mwipala.

¹⁷ Swe yula umwanahinza umulolesi va umulyango amuwusise Petulo, “Veve nave si wimunyigendo va umunu uyu?” Nave swe itigila, “Si nene nda!”

¹⁸ Navala avakami na avanyigalu veve vimite vakosise umoto gwa amakala vakota, pakuva kwekwina nungwi. nave Petulo alipamwi nawo akota.

Umutambisi Umuvina akumuwusa Yesu

¹⁹ Neke Umutambisi Umuvina amuwusise Yesu ulwa avanyigendo vakwe na ulwa inzigiso sakwe.

²⁰ Yesu amupitwe, “Nene ngalonzile na ing'i wima hela. Mbepali ngigisige mumasinagogi na mu tembeli mwevakong'anige Avayudaya mbevali na sindendilalonga lukani lwa kinyele.

²¹ Lweki pukumbusa nene? Vawuse vala vevapulike kiki chendavalonje, avene vakukikagula chendavalonje.”

²² Ave ilonga iso umukami uyumwi yeeimile pipi amuvatwe itigila, “Ukumupitula de Umutambisi Umuvina?”

²³ Neke Yesu amupitule, “Wone ndonzile fivi, nzolelele uwubi, neke wone ndonzile wunofu, ‘Umbatulye kiki?’”

²⁴ Ndawe Anasi amusindikige, we mupinge, kwa Kayafa Umutambisi Umuvina.

Kangi Petulo akumubihila Yesu

²⁵ Nave Simoni Petulo eimite kuko akota umoto. Swe vakumuwusa vitigila, “Veve nave si wiyumwi va vanyigendo vakwe?” Nave swe ibihila itigila, “Sinene nda!”

²⁶ Umukami uyumwi va Umutambisi Umuvina, umunyalukolo va yula yealaputitwe ilisigisa na Petulo, amuwusise, “Nene singenguweni mu kiwunga pamwi nave?”

²⁷ Swe Petulo ibihila kangi, ndawe lulusika lulo inzogolo yavikige.

Yesu ali kwa Pilato

²⁸ Ndawe vamusindikige Yesu uluhuma kwa Kayafa, Vakumusindika Kwivaha, ukwitambulwa Pulaitolyo ye pe milawu hilo; nawo sambi valye i Pasaka sivinji valava vahongawinya.

²⁹ Swe Pilato ihuma kwivala neke atigile, “Mwitosa nongwa ng'iki kulumunu uyu?”

³⁰ Ndawe vamupitulige, “Ake uyu simwananga kinu siketumuleta kwa veve.”

³¹ Neke Pilato avalongele, “Ale apo mukamutegulage, mukamuhige kwa indagilo senyu.” Neke Avayudaya vamutigile, “Hwehwe twivagaya lulagilo lwa ukuwulaga munu.” (

³² Valonzile ulo sambi lukwile ulukani lwealonzile Yesu ulwa saafwa ifwa iyindawuli?)

³³ Ndawe Pilato ingilige kangi mwivaha swe akumukemela Yesu nu kumuwusa, “Ndawuli, veve wi Mutema va Avayudaya?”

³⁴ Yesu amupitwe, “Veve wilonga de yuveve, ngali apangi avanu vangi vakulonje ing'ani sangu?”

³⁵ Pilato amupitwe, “He! Mbi nene ndi Muyudaya? Sivavanu va ukwenyu na Avatambisi Avavina vevakuletite kwa nene. Mbi wananzile kiki?”

³⁶ Yesu amupitwe, “Uwutwa wangu si wa mung'i iyi nda. Wone Uwutwa wangu wuke wuve wa mung'i iyi, avakami vangu vake vananga ndemwe ukutawulwa mumawoko ga Avayudaya. Lino, uwutwa wangu si wa ipa.”

³⁷ Swe Pilato akumuwusa, “Ino veve wi Mutema?” Yesu amupitwe, “Veve ye wilonga ulwa nene ndi Mutwa. Nene ndawonike wimila isi, na wimila isi nene ndasile mung'i ukolelela avanu ulwa nachene. Yeyeavesaga va nachene aipulika iliswi lyangu.”

³⁸ Pilato swe iwusa, “Nachene che kiki?” Nave Pilato ave ilonga ulukani ulo elelwike kangi ku Vayudaya avali kwivala na ukuvalongela, “Nene singuluwona lweananzile.

Yesu ihigwa ukufwa

³⁹ Ino kwa nyenye kwina misimu jenyu ulwa nywanite ukumudindulila umunu yumwi mukimunyi icha Pasaka. Sweno, mwiwenda ndivadindulile Umutwa va Avayudaya?”

⁴⁰ Swe kangi viyovela ng'ani vitigila, “Si uyu nda! avelage Balaba!” Nave Balaba alimuposi.