2 CHANRELNAK 17 - Lai (Hakha) Common Language Bible 2006

Jehoshafat Pennak Fehter A Si

¹ A fapa Jehoshafat kha amah hmun ah cun a hung bawi i Israel mi he i dohnak ding caah khan a thazang aa ṭhawnter.

² Judah ram chung i kulhnak ngei khua vialte ah khan ralkap a chiah hna i Judah ram chung le a pa Asa nih Efraim khua a rak lakmi hna chungah khan ralvengtu ralkapbu a chiah hna.

³ A pa nih a hlan deuh i a rak zulhmi lam kha a zulh caah Bawipa cu Jehoshafat sinah a um; amah nih Baal kha a kawl hna lo,

⁴ sihmanhsehlaw a pa Pathian kha a kawl i Israel mi nih an zulhmi lam si loin a nawlbia kha a zulh.

⁵ Cucaah Bawipa nih pennak cu a kut chungah a fehter i Judah mi vialte nih Jehoshafat sinah ngunkhuai an thawh i a rum ngaingai i upatnak a hmu.

⁶ Bawipa lam leiah cun a lung kha a ral a ṭha i cuhleiah Judah ram chungin khuahrum bo hna le Asherim hna kha a ṭhial hna.

⁷ A bawi kum thumnak ah a bawi Benhail, Obadiah, Zekhariah, Nethanel le Mikaiah kha Judah ram chung khua hna ah cawnpiaktu ah a thlah hna;

⁸ anmah sinah cun Levi mi Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah le Tobadonijah kha an i tel; cun hi Levi mi hna sinah hin tlangbawi Elishama le Jehoram an i tel.

⁹ Cun Judah ram chungah khan Bawipa phungbia cauk kha an i put i an cawnpiak hna; Judah ram chung khua vialte kha an ṭol i mi kha an cawnpiak hna.

¹⁰ Cun Judah ram pawngkam i a ummi ram vialte cungah khan Bawipa ṭihnak kha a tlung i Jehoshafat kha an do lo.

¹¹ Filistin mi a cheukhat nih Jehoshafat cu laksawng an rak pek i ngunkhuai caah ngun an rak pek; cun Arab mi hna zong nih tuukawng thong sarih za sarih le mehehtum thong sarih le za sarih an rak pek.

¹² Cun Jehoshafat cu duhsah tein a ngan chin lengmang. Judah ram chungah ralhruang hna le thil khonnak khua hna kha a ser hna i

¹³ Judah ram khua chungah khan thil tampi a khon hna. Jerusalem ah ralkap a ṭhawng i a ral a ṭhami a chiah hna.

¹⁴ Mah hihi an pale innchungkhar ning cio ah an i relnak cu a si: Judah chungin, a thong pawl hna haotu ah Adnah a si, amah sin ummi cu miṭhawngmi ralṭha sing thum an si,

¹⁵ cun amah a hun dottu ah haotu Jehohanan a si, amah sin ummi cu sing hnih le sang riat,

¹⁶ cun amah a hun changtu ah Zikhri fapa Amasiah a si, amah cu Bawipa rian caah mah lungtho tein aa pemi a si, amah sinah cun miṭhawng miralṭha sing hnih an um.

¹⁷ Benjamin chungin: mit:hawng mi ralṭha Eliada, amah sinah cun likuk le phaw a ngeimi sing hnih an um,

¹⁸ cun a hun dottu ah Jehozabad a si i amah sinah cun raltuk awk i aa thuammi sing khat le sang riat an um.

¹⁹ Hi hna hi siangpahrang rianṭuantu cu an si, hi hna hleiah hin Judah ram chung dihlak kulhnak a ngeimi khua paoh i siangpahrang nih a chiahmi hna kha an um rih.