1 CHANRELNAK 28 - Lai (Hakha) Common Language Bible 2006

Biakinn Sak Rian Solomon A Hluai

¹ David nih Jerusalem ah Israel mi bawi vialte, an phun chung bawi hna, siangpahrang rian a ṭuanmi ralkapbu bawi hna, a thongthong pawl a haotu hna, a zaza pawl a haotu hna, siangpahrang le a fapa hna i an thilri le saṭil a cawngtu hna kha siangpahrang inn bawi hna le miṭhawng hna le ralkap ṭhawng vialte hna he khan hmunkhat ah a pumh hna.

² Cun Siangpahrang David cu a dir i, “Ka unau hna le ka mi hna, ka bia ka ngai tuah u. Bawipa biakamnak kuang caah le kan Pathian ke chiahnak caah dinhnak inn pakhat kha sa ning law tiah ka lung chungin ka rak ti tawnmi a si i cu saknak caah cun timhtuahnak ka rak ngei.

³ Sihmanhsehlaw Pathian nih a ka thawh i, ‘Nang nih cun ka min caah inn na sa hnga lo, zeicahtiah nang cu ralkap na si i thisen na chuah,’ tiah a ka ti.

⁴ Asinain, Bawipa, Israel Pathian nih keimah cu ka pa innchungkhar vialte chung khan Israel cung i siangpahrang zungzal in si awkah a ka thim; zeitintiah Judah kha hruaitu ah a thim i Judah innchungkhar chungah ka pa innchungkhar kha a thim i ka pa fapa hna lakah keimah cu Israel mi vialte cung i siangpahrang ah ser awkah ka chungah lawmhnak a ngei.

⁵ Cun ka fapa vialte hna lakah (zeitintiah Bawipa nih fapa tampi a ka pek hna) ka fapa Solomon cu Israel cung i Bawipa pennak bawiṭhutdan cung i ṭhut awkah khan a thim.

⁶ Amah nih a ka thawh i, ‘Ka inn le ka tual a satu ding cu na fapa Solomon hi a si lai, zeitintiah amah cu ka fapa si awkah ka thim cang i keimah cu a pa ka si lai.

⁷ Nihin ah a tuah bantuk hin, ka nawlbia hna le ka phunglam hna kha fek tein a zulh lengmang hna ahcun, a pennak cu zungzal in ka hmunhter lai,’ tiah a ti.

⁸ Cucaah Israel mi vialte, Bawipa mibu aa pummi hmuhhngan le kan Pathian theihhngan ah hin, nannih nih Bawipa nan Pathian i nawlbia vialte cu zul u law kawl tuah u; zeitintiah nannih nih hi ram ṭha cu nan co i nan hnu i a ra dingmi nan tefa hna caah ro ah nan roh zungzal hna nakhnga.

⁹ “Cun nang, Solomon ka fapa, na pa i a Pathian hi hngal law lung ṭengnge lo te le a tha a thomi ruahnak he a rian ṭuan tuah; zeitintiah Bawipa nih cun lung vialte cu a purh dih ko i tinhmi le ruahnak vialte cu a hngalh dih. Amah cu na kawl ahcun na hmuh lai; sihmanhsehlaw amah cu na hlawt ahcun zungzal in an hlonh ko lai.

¹⁰ Cucaah i ralring tuah, zeicahtiah nangmah cu Bawipa nih a thiangmi hmun ca i inn sak awkah an thim cang; ṭhawng ngaiin um law ṭuan tuah,” tiah a ti.

¹¹ Khi tikah David nih a fapa Solomon cu biakinn a tual le a inn hna le a chawhlawn chiahnak hna le a cunglei khaan hna le a chungchin dal hna ruam-am le velngeihnak ṭhutdan chiahnak a khaan ca i a ruam-am cu a pek;

¹² cun Bawipa inntual ca le a kulhtu khaan hna le Pathian inn chawhlawn khonnak hna le pekchanhmi laksawng chawhlawn khonnak ding ruam-am hna zong kha a pek;

¹³ cun tlangbawi hna le Levi mi hna a phu a phu in an umnak ding le Bawipa inn chung rianṭuannak ca rian vialte; Bawipa inn chung rianṭuannak ca i umkheng vialte ca le,

¹⁴ rianṭuannak cio ca i sui umkheng hna ca i sui a rih zat rianṭuannak cio ca i a herhmi ngun a rih zat,

¹⁵ sui meivannak tung hna le an meiinn hna an rihning, meivannak tung pakhat cio ca le a meiinn hna ca i a herhmi sui a rihning, meivannak tung ca le a meiinn hna ca i a herhmi ngun a rihning, rianṭuannak ca i a meivannak tung hna cu hman an sining cio in,

¹⁶ hun camcinmi changreu cabuai cio hna ca i a herhmi sui a rihning, ngun cabuai ca i ngun a herhmi,

¹⁷ keuṭe ca le hmaihum ca le hrai ca i a herhmi sui thiang; sui khengkuar hna le an rihning cio,

¹⁸ ermi sui in an sermi rimhmui biakṭheng ca le a rihning i an ruam-am vialte a lung chung i aa chiahmi cu a pek; cun sui rangleng le an thla aa samh i Bawipa biakamnak kuang a zarhtu cherubim hna ca i a ruahmi an ruam-am zong kha a pek.

¹⁹ Cun David nih aa thawh i, “Bawipa hrimhrim nih na tuah lai, tiah a ka fialmi tuahnak ding caah a ṭial in ṭialmi timhtuahnak chungah hi thil vialte hi an um dih,” tiah a ti.

²⁰ Khi tikah David nih a fapa Solomon cu a thawh i, “Ṭhawng ngai le ralṭha ngaiin um law ṭuan tuah. Ṭih hlah, na lung dong hlah; zeicahtiah Bawipa Pathian, keimah i ka Pathian hrimhrim cu na sinah a um. Bawipa inn chung rianṭuannak ca i rian vialte cu lim a si hlantiang amah nih cun an deuh lai lo i an hlaw fawn lai lo.

²¹ Cun Pathian inn rianṭuannak vialte ca i tlangbawi bu hna le Levi mibu hna hi zoh tuah hna; cun hi rian vialte ah hin zungthiammi paoh nih anmah le an thiamnak zawn rian paoh ah khan an in ṭanpi lai i bawi hna le mi vialte hna zong hi nangmah nawl tangah an um dih lai,” tiah a ti.