'Utseyaxi 5 - Kakaɨyari Niukieya

'Ixaheritsixi kememɨtekwinitɨarieni

¹ »'Ikɨ niuki xekeneu'eni xeme mawari wewiwamete. Xekeneu'enana 'ixaheritsixi. Xekene'enanaka ti'aitame nuiwarimama. Xehetsie pɨmieme kexemɨte'anutaxɨriyani. Mitsipa kiekariyaritsie xeme xekateni'irɨwiyarieka, Tawuxi hɨriyaritsie winiyari 'amɨtewi xekaniutawieka.

² Tsitihini mɨrakutewatsie putsu muwatixawa xekaniutawewieni. 'Ayumieme ne netinixekwinitɨaka 'aixɨa nexeyurietɨ.

³ Ne 'Epɨrahini nekanimateni, meta 'Ixaheri nepɨkahatɨmaiyawe. Peru 'Epɨrahini tuminikɨ kaniyumayɨinɨaka, meta 'ixaheritsixi meka'itiyatɨ mepayuyeitɨwa.

⁴ »'Axakememɨteyurie pɨkawapitɨa Kakaɨyari hetsɨa memɨ'axɨani, mepɨkayumaiwawe 'axamemɨteyuriekɨ hipame wa'ɨitama memɨwakumaɨwakɨ mepɨkayɨwawe Yawé memetimanikɨ.

⁵ 'Ixaheri 'uyuta'ɨretɨ 'uxa'atɨniwarie yuhetsie pɨrahɨani. 'Ixaheri meta 'Epɨrahini ke'axamemɨte'uyuri yukɨmana mepekaxɨrieni, Kura meta wahamatɨa kanekawemɨkɨ.

⁶ Yumuxatsima meta yuwakaitsixi metewara'arietɨ, Yawé mekanitiwaukuni, peru mepɨka'itaxeiya mɨkɨ mɨwaruku'eirikɨ.

⁷ Yawé xekaniuku'eirieni, yumɨiretɨ tɨɨri mekaniutinunuiwa hipame waniwema. Hikɨ 'ayumieme xekanika'unariekuni meta naitɨ xekwie.

⁸ »Kuxineta xekenetahɨtsi Kiweya kiekariyaritsie, Xamatsie paitɨ 'awa kehetahɨtsieni, Weti-'Aweni meta xekenetihiwa xemɨyutakwinikɨ, mɨpaɨ mete'uhiwatɨ: “Wenikamini, kene'a'ɨwiyani 'awarita”.

⁹ Kepauka memɨtekwinitɨarieni, 'Epɨrahini yuxaɨta puyuhayewa. 'Ixaheri nuiwaritemama watsata yanepɨtiwatahɨawe kemɨtiwayurieni.

¹⁰ 'Itsɨkate te'aitamete Kura kwieyaritsie miemete kwie memɨnawatɨwe wahepaɨ mepɨ'anene. Wahetsie nehaxɨa nepɨtatuani haa nemɨwayenetɨani hepaɨ.

¹¹ 'Epɨrahini 'axapɨtixeiyarie, memeye'unie xeikɨa mepitsaipɨna, memɨkayuri kakaɨyarixi mɨwaruweiyakɨ.

¹² 'Epɨrahini tepaxi wahepaɨ nekaniwakwimɨkɨ, kɨye mɨkɨmie Kura teɨterimama mepɨhɨkɨtɨni.

¹³ »Kepauka 'Epɨrahini yukwiniya muxei, Kura katinetimani haiyayatsie, 'Epɨrahini kaneyani 'Atsiriyatsie mana parewiya kaniutawauni ti'aitame mɨmariwe hetsɨa. Peru ti'aitame mana kiekame pɨkayɨwekai menayehɨanikɨ, meta haiyaya mu'uayemani.

¹⁴ Ne maye nepayani 'Epɨrahini hetsiemieme, maye nunutsita Kura hetsiemieme. Ne nekɨmana nekaniwatitsanamɨkɨ, meta nekaniyemieni, nemiwiyaxɨ ne'atɨtɨ, nixewitɨ pɨkayɨweni mɨnetsi'unawairieni.

¹⁵ 'Ana nepakunuani nemɨra'aitatsie, kepaukake mɨpaɨ memɨtehetimani kename 'axamete'uyuri. Mepitiwauni kehepaɨ meyɨakaku nemɨwatanaki'erieni, me'u'uxetɨ mepɨnetsitiwauni meyuwaɨriyatɨ».