'Utseyaxi 2 - Kakaɨyari Niukieya

¹ »Kepauka memɨ'axɨani xe'iwama 'ukitsi mɨpaɨ xeketeniwaruterɨwa: Hami, taniukikɨ manuyɨne “Mepɨneteɨterimari”. Meta 'ukari Xuhama, taniukikɨ manuyɨne “Nepitinenimayatari”.

'Ixaheritsixi kememɨtekwinitɨariekai meta kememɨte'utinenimayatsie

² »Peru hikɨ yumaama hetsie xeketeneuhɨpani, mɨkɨri hikɨ pɨkane'ɨya neta nepɨkakɨnaya. Yuhɨxie mayuyewirie witsimɨtixeiyariekakɨ ke'ayuye'itieni 'axamɨtiuka'iyarikɨ, meta yutawie kemɨratikuka ketiuhayewa.

³ Ya mɨpaɨ pɨkatiuyuri, ne naime nekatininawairiemɨkɨ, ke'anetɨ mutinuiwaxɨ mɨpaɨ 'anekame nekanihayewamɨkɨ. Makuwakitsie nekanihɨamɨkɨ. Kwiepa tixaɨtɨ mɨkaraxuawe nenihayewamɨkɨ, yeharimɨnetɨ kanimɨmɨkɨ.

⁴ Niwemama nepɨkawatinenimayata, 'axamɨtiyuriene hetsie memɨmiemetekɨ.

⁵ Wamaama tuminikɨ muyuwitɨnɨa kanihɨkɨtɨni, Mɨwarutiniwexɨ ka'uyukatewiyatɨ. Mɨpaɨ kaniutayɨni: “Netuxexerima wahamatɨa nepukuyeikani, memɨnetemikwa memɨnetsiharitɨa, muxa huxarieya, rinu 'ixurikiyari, nehatseiti meta tita nemɨranuye'e”.

⁶ 'Ayumieme ne huyetana nepɨranutanani xuyakɨ, muwa xeikɨa nepiyenaka huye mɨkataxeiyakɨ.

⁷ Waɨkawa tiuka'eniwatɨ yutuxexerima pɨwakuwauneni, kawataxeiyame mɨpaɨ pɨtayɨni: “Nekɨna matɨari nemitiwitɨ hetsɨa nepɨnuanikeyu, matsi meripaitɨ 'aixɨa nepɨtixeiyariekai keyuri hikɨ”.

⁸ Mɨkɨ mɨpaɨ pɨkaretimaiwe kename ne nehɨkɨ nemɨtimikwa, kaxie winuyari mɨhekwa meta hatseiti nemɨtiyetuirie. Ne waɨkawa nepɨtimɨiririe pɨrata meta huru, ¿ketiuyuri kɨmana? Memɨkayuri kakaɨyarixi pɨwarutiwewi.

⁹ »'Ayumieme kepauka tukarieya maye'ani ne tɨriku nepinawairieni kaxie winuyari mɨhekwa. Muxa kaheuhuxakame nepɨhayewa meta rinu 'ixurikiyari kahexeiyame nemɨtiyetuiriekai mawekaku kɨmana meuyukunakakɨ.

¹⁰ Nepitewiyatsitɨani mɨirikɨa tuxexerimama me'ixeiyakaku, nixewitɨ pɨkayɨweni hetsiena mutanuani.

¹¹ Naitɨ mana pɨtiuye'atɨyani 'ixɨarari temawierikayari kemɨtiwewiekai. Meta kemɨtikuyeikakai metseri xikɨraɨyekaku, meta kepauka muka'uxipiwekai meta 'ixɨarari kemɨtiutiwewiwakai xeiwiyari 'aye'axekaku.

¹² Kaxie haraweriyari kemɨrexeiyakai meta piní, kename mɨkɨ tuxexerimama mete'iyetuiriekai. Maku'ɨtsiya nepayeitɨani, yeuta memɨte'u'uwa mekanitikwaikuni xeikɨa.

¹³ Nepɨtikwinitɨani mɨkɨ tukaritsie hipame kakaɨyarixi mɨtiwarutimawiriwakaikɨ, kepauka witsitiyukukemaritɨwatɨ nakɨtsatekɨ meta kukakɨ ne kanetsiha'eriwatɨ, yutuxexerima wa'utɨma xeikɨa peyeikakai —Yawé mɨpaɨ kanaineni—.

¹⁴ »'Ayumieme hikɨ nekatini'irɨwiyamɨkɨ: makumawetsie nekanenuwitɨmɨkɨ mana witsi'anekamekɨ nekaneitahɨawimɨkɨ.

¹⁵ 'Ana nekaniyetɨiriemɨkɨ kaxie haraweriyari, mayeweritsie waɨkawa Kemɨtiuka'eniwakai 'aixɨa 'aneme nepayeitɨani memanukɨka Mɨnetsitakwewiekɨ. Mana pɨnetsita'eiya temaikɨyari hepaɨ, kepauka 'Ekipitu mayetɨatsie hepaɨ.

¹⁶ »Yawé mɨpaɨ kanaineni: Kepauka maye'ani tukari mɨpaɨ pepɨkanetiuterɨwani: “neti'aitɨwame”, matsi pɨta: “nepɨmatsinaki'erie nekɨna”.

¹⁷ Ne nepɨmeratɨmaiyatsitɨani tawarita pemɨkawakuxatanikɨ memɨkayuri kakaɨyarixi, hatsuakuri pemɨkawatahɨawe.

¹⁸ Mɨkɨ tukaritsie tɨratu nepɨwewieni Yeutari wahamatɨa, muyuawitsie memɨte'uwɨtɨkɨka wahamatɨa kwiepa memɨteku'ɨretɨwe wahamatɨa. Kiekari mukumanetsie tupi nepɨwanawairieni, 'ixipara, kuyaxi meta para 'aixɨa 'anemekɨ xemu'uwanikɨ yunaitɨ.

¹⁹ Ne ne'ɨya nematsi'ayeitɨani yuheyemekɨ, nematsi'awitɨkɨni heitseriemekɨ 'aixɨa 'iyari, teyunaki'erietɨ teteheuyuyehɨwirietɨ.

²⁰ Pepɨnetsihetimani heitseriemekɨ kenemɨtiuka'iyari hatsuaku nepɨkamatsiku'eirieni, hikɨ 'ana Yawé pekanetimaimɨkɨ.

²¹ »Yawé mɨpaɨ kanaineni: Mɨkɨ tukaritsie ne yanepɨtikamieni, ne muyuawitsie paitɨ nepɨxeku'eiyani, meta muyuawi kwie pɨ'enieka,

²² Kwieta 'imɨari pɨxuaweriyani, kaxie winuyari mɨhekwa huriwa hatseitiyari meta, mɨkɨkɨ mekaniwata'eiyakuni Ketsireri.

²³ Ne nehetsiemieme kwiepa nepɨwaka'eni. “Nepɨka'itinenimayatari” mɨkɨ wahetsiemieme nepɨwatinenimayata. “Mepɨkaneteɨterimari” nepɨtiwaterɨwa, “Mepɨneteɨterimari”, mɨkɨta mɨpaɨ mepɨtiyuani, “Pɨtakakaɨyari”».