'Utseyaxi 14 - Kakaɨyari Niukieya

'Ixaheri ta'aurie kemɨrawenikekai para mɨreuyehɨwiyarienikɨ

¹ 'Ixaheri, kenenua Yawé 'akakaɨyari hetsɨa. Ke'axapemɨtiyuriene mɨkɨ pɨmatsihekahɨpa.

² 'Aixɨa ketineu'ahɨawi kepemɨtayɨni, Yawé hetsɨa kenenua mɨpaɨ ketineutahɨawi: «Ketatineuyehɨwirieka ke'axaketemɨte'uyuri, 'aixɨa 'anemekɨ ketaneutanaki'eri mawari hepaɨ, tepɨmatetaxatɨani.

³ 'Atsiriya pɨkatatsitawikweitsitɨani, kawayutsixi kuyaxa miemete wahetsie tepɨka'anutiyaxe. Tawariri tepɨka'itaterɨwani “'ekɨ takakaɨyari pepɨhɨkɨ” tixaɨtɨ tamamakɨ tiwewiyakame tepɨkate'ayexeiya, 'ahetsie nutui pikaxeiya kepemɨti'akanenimaya».

Kakaɨyari kemɨtiwaruta'ei

⁴ «Ne ke'axamemɨte'uyuri 'aixɨa nepɨwayurieni nepɨwanaki'erieka 'aixɨa 'anemekɨ, kenemɨtiha'akai wahetsiemieme nepɨtiuhayewaxɨ.

⁵ Ne wiyeri hepaɨ nepɨ'aneni 'Ixaheri hetsiemieme, yanepɨtiyurieni mɨkaxutunikɨ texuxuri tuturiyari hatetsita mieme hepaɨ. Nanayari tetɨata paitɨ ratiwiwiyame nepayeitɨani Riwanu kɨyeyari hepaɨ.

⁶ Yɨrariyari waɨkawa pɨtiwawere, huriwu kemɨtimamariwawe mɨpaɨ pɨtipapare meta witsimu'ɨa kariuxa Riwanu mieme hepaɨ.

⁷ Ne'etɨritɨa mepuyutikiitɨani, mepɨtiwawere tɨriku hepaɨ. Mepɨkayɨyɨrani kaxie hepaɨ, mepukuxaxatsiwani winu Riwanu mieme hepaɨ.

⁸ Neuxei 'Epɨrahini, kakaɨyarixi wa'ɨkiyari tixaɨtɨ pɨkatihɨkɨ. Ne nemetsiku'eiya nekanihɨkɨtɨni meta nemetsi'ɨwiya. Huku kɨyeyari yamɨtitsiɨraɨye nekanihɨkɨtɨni, kepemɨtiutixuxuawere ne nekatiniyurieneni».

⁹ Kemɨ'ane mɨtimaiwe kaneitimaitɨyeikani, kemɨ'ane waɨkawa mɨtiuyemate. Kaniyuritɨni Yawé huyeya kanixeuraɨyeni, mɨkɨ 'utɨma mekaniuhuni heitserie memexeiya, peru kemɨ'ane 'axamemɨteyurie mekanetiketamɨrikeni meteyukahiwe'erietɨ.