Tsupuniyaxi 1 - Kakaɨyari Niukieya

¹ 'Ikɨ Yawé niukieya kanihɨkɨtɨni, Tsupuniyaxi kemɨtiutahɨawarie Kutsi nu'aya, mɨkɨta Kerariyaxi nu'aya, mɨkɨta 'Amariyaxi nu'aya, mɨkɨta 'Etsekiyaxi nu'aya, kepauka mɨti'aitakai Kutsiyaxi 'Amuni nu'aya, Kura kwieyaritsie:

Kememɨte'utaxatɨarie kememɨteka'unarieni 'arike

² «Meteyunaime nepɨtiwareuyehɨani kemeteyupaɨmetɨ kwiepa memɨtexuawe —Yawé mɨpaɨ kanaineni—.

³ Teɨteri meta tewaxi nekaniwareuyehɨamɨkɨ, meta memɨte'awɨwawe meta haramaratsie memɨteye'uwa, metatsiere kakaɨyarixi memɨwewiyatɨka metatsiere teɨteri 'axamemɨte'u'iyari yaxeikɨa. »Teɨteri nekaniwarakumaweriyamɨkɨ 'ena kwiepa naitsarie —mɨpaɨ kanaineni Yawé—.

Kura kemɨtika'unarieni

⁴ »Kura kwieyaritsie kiekatari nepɨtiwakwinitɨani, meta yunaime Kerutsareme kiekatari. Wahari huyerieya 'ɨarime naime nepakuyeitɨani, meta mawari wewiwamete hetsɨana miemete kememɨtetetewa naime,

⁵ meta kemɨ'ane yukii heima memukatunuma'uwe, muyuawitsie miemete xurawetsixi mewarayexeiyatɨ, meta kemɨ'ane metitunuma'utɨ, kename Yawé me'ayexeiya memutiyuane, kwitɨwata kakaɨyari Muruki yaxeikɨa memɨtehahɨawe,

⁶ meta kemɨ'ane Yawé memuku'e'eiriwa, meta memɨka'ikuwautɨwe meta memɨkahe'iwawiya.

⁷ Kayuwatɨ xekeneumaka Yawé Naimekɨmɨyɨwe hɨxie, Yawé mɨtixekwinitɨanitsie pehurari, Yawé mawari kaniukuha'aritɨani meta yu'inierima kaniwaru'itieniri.

⁸ 'Iya tukaritsie Yawé yumɨireme muwakwinitsie nepɨtiwakwinitɨani ti'aitame parewiwametemama meta niwemama, meta kemɨ'ane kamixate hipame kwieyaritsie miemete memanakatɨtɨka.

⁹ 'Iya tukaritsie nekatiniwakwinitɨamɨkɨ kemɨ'ane hipame kakaɨyarixi memɨwarayexeiya, meta memɨtehɨniya yukakaɨyarixi watukita piinite, 'itarikakɨ memɨte'a'iwaxɨ meta hipame mewananaimatɨ.

¹⁰ »Yawé mɨpaɨ kanaineni: 'Iya tukaritsie parewiya hiwariyari pɨ'enierieni, kitenie Tsapa mɨtitewatsie paitɨ, 'aiwari pɨ'enierieni Kiekari Hutarieka Mieme makumatsie, meta waɨkawa hiwari pa'eniɨriɨkɨni yemuritetsie paitɨ.

¹¹ »Xemeta xekeneutitsuanani, tetuayamete memakutei xemɨtama. Naitɨ tita xemɨtetua katineuyehɨiyamɨkɨ, xepeuyehɨiyani yunaitɨ kemɨ'ane pɨrata xemexeiyanikɨ xemɨyɨa.

¹² 'Iya tukaritsie Kerutsareme nepayekexiya kɨxeme ne'akwetɨ, nemɨtiwakwinitɨanikɨ kemɨ'ane yu'iyarikɨ memɨ'uxipie, kaxie winuyari mɨkakuyuitɨariwa meuyewexime hepaɨ memɨ'ane, kemɨ'ane mɨpaɨ memutiyuane: “Yawé 'atsipɨkatiyurieni, ni'aixɨa pɨkatatsiyurieni ni'axa pɨkatatsiyurieni”.

¹³ Xepiinitɨarika memɨxeka'una wa'iwarika pɨrayani, xekii yuxaɨta puyuhayewaxɨani: “Yukii xepɨtiwewieni, peru muwa xepɨka'ayeyaxe, kaxie xepɨka'iteɨta, peru winuyari xepɨkaha'inɨata”.

Yawé haxɨaya tukariyari

¹⁴ »Yawé haxɨaya tukariyari paye'axime, kanaye'aximeni yapauka. Yawé tukarieyatsie pɨ'enierieni kwinimieme memɨte'uka'eniwa hiwariyari, meta kemɨ'ane mɨkama 'ana kanitatsuamɨkɨ.

¹⁵ 'Iya tukaritsie haxɨa tukariyari kanayeimɨkɨ, meta 'uximatɨarika meta hiwerika tukariyari, xemɨka'unarieni meta xemakumaweriyarieni tukariyari, yɨriya tukariyari, meta haiwitɨri mɨyɨyɨxawi tukariyari,

¹⁶ kuxineta meta kuyaxa hiwariyari tukariyari kiekarite kuraruyari 'amatitɨtɨ hepaɨtsita mieme, meta tuxiyu 'amutɨtɨ hepaɨtsita mieme.

¹⁷ Ne nepɨwaranukuweiya teɨteri nekawa'uxipitɨatɨ, memɨkaheuneniereni hepaɨ me'anenetɨ mepu'uwani, Yawé hepaɨtsita 'axamemɨte'uyurikɨ. Waxuriya nitayeuriyamɨkɨ tumuanari hepaɨ, meta wakwinurite kwitarai hepaɨ pɨtiyuxexeiyani.

¹⁸ Wahuru meta wapɨrata pɨkawatawikweitsitɨani, Yawé haxɨaya tukariyaritsie. 'Ɨtetsarikaya taiyari naime kwie pakuxɨtsitɨani, yapauka kaniwarakumaweriyamɨkɨ yunaime teɨteri kwiepa memɨtama».