Tsakariyaxi 8 - Kakaɨyari Niukieya

Yawé kemutayɨ Kerutsareme kename 'aixɨa yurieni

¹ Tawarita Yawé Naimekɨmɨtɨrɨkaɨye niukieya nehetsɨa kaninuani. Mɨpaɨ kanetiniutahekɨatɨani:

² «Mɨpaɨ kanaineni Yawé Naimekɨmɨtɨrɨkaɨye: »“Ne waɨkawa nepɨ'ɨtetsa Tsiyuni hepaɨtsita. Waɨkawa yemekɨ nepikwerie hetsiena mieme nepuyeha'arɨwe”.

³ »Mɨpaɨ kanaineni Yawé: »“Nepunuani tawarita Tsiyunitsie, meta Kerutsareme ne'ukaitɨ nepayani. Hikɨ Kerutsareme pɨmatiwani tita Yuri Mɨraine Kiekariyari, meta Yawé Naimekɨmɨtɨrɨkaɨye yemurieya Yemuri Mɨpatsie pɨtitewaka”.

⁴ »Mɨpaɨ kanaineni Yawé Naimekɨmɨtɨrɨkaɨye: »“'Ukirawetsixi meta 'ukaraixi tawarita Kerutsareme kayeyari'utɨa metiyaxiketɨ mepakɨne, yuxexuitɨ yu'itsɨ me'u'ɨtɨ waɨkawa wiyari memexeiyatɨkanikɨ.

⁵ Tɨɨri 'ukitsi meta 'ukari tawarita mekanitiwaikakuni mɨkɨ kiekari kayeyaritetsie”.

⁶ »Mɨpaɨ kanaineni Yawé Naimekɨmɨtɨrɨkaɨye: »“Kemɨ'ane 'ana memuyuhayewatɨweni 'ana tukaritsie kayɨweme mepɨ'erieka mɨpaɨ mɨtiyɨni, peru ne nehepaɨtsita pɨtiyɨwe, mɨpaɨ kanaineni Yawé Naimekɨmɨtɨrɨkaɨye”.

⁷ »Mɨpaɨ kanaineni Yawé Naimekɨmɨtɨrɨkaɨye: »“Neteɨterima nepɨwatawikweitsitɨani, tau manatineika hepatsie kiekatari wahetsɨa memu'uwa meta makayuyuipike hepatsie.

⁸ Nepɨwarakunuitɨani Kerutsareme pɨta memɨkutenikɨ, mɨkɨ neteɨterima mepɨhɨkɨtɨni neta wakakaɨyari nepɨhɨkɨtɨni, yurikɨ nepɨtiyurieneni meta heitseriemekɨ”.

⁹ »Mɨpaɨ kanaineni Yawé Naimekɨmɨtɨrɨkaɨye: »“Xekeneyuwaɨriyani, xeme, 'ikɨ tukaritsie xemi'eni Kakaɨyari niukametemama waniuki, mexi tenari wewiyane tuki hutarieka mieme manukuhanienikɨ Yawé Naimekɨmɨtɨrɨkaɨye hetsiemieme.

¹⁰ Meripaitɨ mɨreukayunetsie teɨteri mepɨkatepitɨariekai yu'uximayatsikakɨ meta tewaxi yu'ikwai mepɨkakumikiwakai. Hipatɨ memɨxe'aye'uniekaikɨ kɨkamete 'aixɨa 'iyari mepɨkaku'uwakai, netsɨ yanekatiniwarupitɨani yunaime teɨteri yunaitɨ memayuye'uniekakɨ.

¹¹ Hikɨri mɨpaɨ nepɨkatiwapitɨani memɨyuhayewaxɨ 'ikɨ teɨteri meripaitɨ kenemɨtiwarupitɨa hepaɨ —mɨpaɨ kanaineni Yawé Naimekɨmɨtɨrɨkaɨye—.

¹² Kayuwatɨ mepexeiyani kepauka mɨtika'etsitɨ, meta kaxie yu'ikwaxi putixuaweriyani, kwie pɨtiutixuaweriyani tita mɨtika'etsieni meta muyuawi yuwiyeri panakanɨ'ani. Mɨkɨ naime nepɨtiwapitɨani mɨtiwahetsiemiemetɨnikɨ 'ikɨ teɨteri memɨyuhayewatɨwe.

¹³ Kura kwieyaritsie kiekatari meta 'Ixaheritsie, xepɨkaheumamaka, matsi xekeneyuwaɨririyani. Xeme hipame nuiwarite watsata 'axaxemɨ'itɨarie xepɨhɨkɨtɨkai, ne peru nepɨxetawikweitsitɨani, hikɨ hipatɨta 'aixɨa mepɨ'itɨarieni xekɨmana”.

¹⁴ »Mɨpaɨ kanaineni Yawé Naimekɨmɨtɨrɨkaɨye: »“Kepauka xetutsima memɨnetsi'uyehaxɨatɨa, ne yaneputayɨ nemɨwarakumaweriyakɨ nekawareunenimayatɨ —mɨpaɨ kanaineni Yawé Naimekɨmɨtɨrɨkaɨye—.

¹⁵ Peru hikɨta nepɨnewaɨri Kerutsareme 'aixɨa nemɨyurienikɨ meta Kura kwieyari. 'Ayumieme xepɨkaheumamaka.

¹⁶ »”Peuyewetse xeme 'ipaɨ xemɨtekahuni, yurikɨ xeketeneyukuxaxatɨwani, xekeneyuxanetani 'itsɨkate wahetsɨa yurikɨ meta kemɨtiheitserie. Mɨpaɨ xɨka xeteyurieka kayuwatɨ kaniumakamɨkɨ.

¹⁷ 'Axamɨti'ane xepɨkatewewieka yu'iwa hepaɨtsita, 'itarikakɨ xepɨkatekuxatani, karikɨ ne mɨkɨ naime nekatini'uxiwe'erieka, mɨpaɨ kanaineni Yawé”».

¹⁸ Nehetsɨa kaninuani Yawé Naimekɨmɨtɨrɨkaɨye niukieya, mɨpaɨ kanetiniutahɨawe:

¹⁹ «Mɨpaɨ kanaineni Yawé Naimekɨmɨtɨrɨkaɨye: »“Kura teɨteriyari wahetsiemieme, hakiya mematinenetɨwakai naurieka metseritsie meta 'auxɨwirieka, 'atahutarieka meta tamamata metseriyaritsie, hikɨri temawierika mepexeiyani, 'ixɨarari mepatinenetɨwani. Kamɨtsɨ, xekenenaki'erieka tita yuri mɨraine meta tita kayuwatɨ mɨtiyupitɨwa”.

²⁰ »Mɨpaɨ kanaineni Yawé Naimekɨmɨtɨrɨkaɨye: »“Mekani'axɨakuni teɨteri, waɨkawa kiekari mukumanetsie kiekatari,

²¹ hipame kiekaritsie mekanitikɨnikuni mɨpaɨ metewakuxaxatɨwatɨ mana kiekatari: Hikɨmɨ tepuhu Yawé hetsɨa tepiwawirieyu 'aixɨa mɨtatsiheyurienikɨ. Tepiwauyu Yawé Naimekɨmɨtɨrɨkaɨye. Netatsiere nekaneiwaumieni.

²² Meta yumɨiretɨ teɨteri metatsiere nuiwarite memɨtɨrɨkawi Kerutsareme mekani'axɨakuni me'ikuwautɨwetɨ Yawé Naimekɨmɨtɨrɨkaɨye meta 'aixɨa mɨwayurienikɨ”.

²³ »Mɨpaɨ kanaineni Yawé Naimekɨmɨtɨrɨkaɨye: “'Iya tukaritsie yuwaɨkawatɨ mepuxuaweni teɨteri, yɨkɨ memɨte'uniuka yunaitɨ, hipatɨ nuiwarite yunaitɨ, hikɨ xeime huriyu tewiyari kamixaya tetsimeyaritsie mekawɨreme mɨpaɨ mekatenitahɨawikuni: Neuxei tepɨmatsi'anuteɨta. Mɨpaɨ tepɨtehetima kename Kakaɨyari xehamatɨa 'uyeika”».