Tsakariyaxi 7 - Kakaɨyari Niukieya

Kakaɨyari hakiya pɨkaheuyehɨwa

¹ Naurieka wiyaritsie ti'aitakaku Raríyu, naurieka tukaritsie 'atanauka metseritsie, kitsirehu metseriyaritsie mɨyatɨtɨ, 'ana Yawé niukieya Tsakariyaxi hetsɨa kaninuani.

² Weteri kiekatari mekaniwareyenɨ'akaitɨni Tsaretsexi meta Xekeni-Mereki, metatsiere wateɨterima, memiwauyukɨ Yawé parewiyaya,

³ meta memeta'iwaunikɨ mawari wewiwamete wahetsɨa memɨhɨritɨarie Yawé Naimekɨmɨtɨrɨkaɨye tukieya, metatsiere Kakaɨyari niukametemama: «¿Tetehe'eriwani 'akuxi 'auxɨwirieka metseriyaritsie xeitukari teteyuhiwerieka meta teteyuhakieka teyɨhɨtɨ, yaxeikɨa meripaitɨ wiyaritsie ketemɨ'anekai?»

⁴ Hikɨ 'ikɨ niuki nehetsɨa kaninuani Yawé Naimekɨmɨtɨrɨkaɨye hetsɨa mieme:

⁵ «Mɨpaɨ ketiniwarutahɨawi yunaime mɨkɨ kwieyaritsie memɨtama, metatsiere mawari wewiwamete: “Kepauka xeme xemuyutihakiwakai meta xemuyuhiweriekai 'auxɨwirieka metseriyaritsie meta 'atahutarieka metseriyaritsie haika tewiyari heimana tamamata wiyari manukatɨatsie, 'ana yurikɨ nehetsiemieme xepɨkayuhakiekai.

⁶ Kepauka xeme xemɨtekwa'a xemɨte'ie, yuhetsiemieme xeikɨa xekaniyɨaka”».

⁷ 'Ikɨ niuki pɨhɨkɨ neniukamete meripaitɨ miemete ne Yawé yanetiwapitɨakaku memitaxataxɨ kepauka 'akuxi Kerutsareme meta kiekari 'auriena mamanetɨkatsie mɨkiepatɨkai meta kayuwatɨ memexeiyakaitsie, kepauka 'akuxi Nekexi meta muweritsie tau makayuyuipike hepa mɨkiepatɨkai.

⁸ Yawé niukieya kaninuani hekwamekɨ Tsakariyaxi hetsɨa. Mɨpaɨ katineyehɨtɨani:

⁹ «Mɨpaɨ kanaineni Yawé Naimekɨmɨtɨrɨkaɨye: »“Xeketeneheitseritɨaka yurikɨ kemɨtiheitserie, xekeneyunaki'erieka meta xekeneyunenimayaka xeyunɨtɨ yunaitɨ.

¹⁰ Xepɨkawananaimaka wiuraxi meta nutuite, meta 'ateewa kiekatari metatsiere tixaɨtɨ memɨkateheuxeiya. 'Axamɨti'ane xepɨkawewieka yu'iyaritsie hipame wahetsiemieme”.

¹¹ »Peru mɨkɨ mepɨka'uyuwaɨri mɨpaɨ memɨtekakɨnekɨ. Me'i'inɨatatɨwetɨ mekanawaritaxɨani meta mepeuyukanaxɨa yunakata.

¹² Memɨka'i'enienikɨ niuki 'aitsika meripai miemetexi Kakaɨyari niukametemama Yawé Naimekɨmɨtɨrɨkaɨye muwareyenɨ'airiekai 'Iyari yuhetsɨa miemekɨ, 'ana yu'iyari mekaniutseiriya tete kwinimieme mɨtitse'i hepaɨ. Hikɨ 'ayumieme, Yawé Naimekɨmɨtɨrɨkaɨye yemekɨ kaniuyeha'ani.

¹³ “Memɨkanetsi'u'enikɨ kepauka nemɨwarutahɨawixɨtsie, neta nepɨkawa'enieni kepauka memɨnetsitahɨawetsie —mɨpaɨ kanaineni Yawé Naimekɨmɨtɨrɨkaɨye—.

¹⁴ Haikɨri waɨkawa mɨtɨrɨkaɨye hepaɨ, nekaniwareutaxɨriexɨani naitsarie hipame nuiwarite memɨkawamatekai wahetsɨa. Yukwie memiku'eiri yuxaɨta puyuhayewaxɨ nixewitɨ tɨma mana pɨka'uyeyeikakai. Mɨpaɨ me'ɨyɨka yukwie 'akumaweme mekanayeitɨani meripaitɨ witsimɨraku'anekai”».