Tsakariyaxi 3 - Kakaɨyari Niukieya

Mawari wewiwamete tiwa'aitɨwame 'ixurikiteya mɨ'e'ekwi

¹ Hikɨ kaneniuxeiyatsitɨani Kutsuhexi, mawari wewiwamete tiwa'aitɨwame pɨhɨkɨtɨkai, Yawé niuki tuayameya hɨxie 'apuwekai, meta Kauyumarie nepuxei tserietana 'utiweme, 'ixanetamɨtɨ.

² Niuki tuayame Yawé hetsɨa mieme Kauyumarie mɨpaɨ katiniutahɨawe: «Yawé kemetsi'utatieni, Kerutsareme manayexei. Yawé kematsi'utatieni, Kauyumarie. 'Ikɨ tewi kɨye taxɨximetɨ taipa manayehanie hepaɨ kaniuyɨni».

³ Kutsuhexi yukemari tɨtɨnime 'anakatɨtɨ niuki tuayame hɨxie puwekai.

⁴ Hikɨ mɨpaɨ niuki tuayame katiniwarutahɨawe mana memɨti'ukai, me'iparewikutɨ: «Xekenanutihɨniri kemariteya mɨtɨtɨni». Hikɨ Kutsuhexi mɨpaɨta katiniutahɨawe: «Mɨpaɨ ketinemaika, tita 'axapemɨtiuyuri 'ari nekamatinanuyeitɨirieni, 'ayumieme hikɨri 'ixurikite nekamenanakatɨtɨamɨkɨ witsimɨ'anene».

⁵ Hikɨ neta mɨpaɨ nekaniutayɨni: «Mukuretsi xekenanutiketsirita mɨ'itiya». Hikɨ mekanenutiketsirieni mukuretsi mɨ'itiya meta mekanitikemaritɨani, mexi niuki tuayame Yawé hetsɨa mieme mana 'uwekai.

⁶ Hikɨ niuki tuayame Yawé hetsɨa mieme Kutsuhexi mɨpaɨ katinayehɨtɨani:

⁷ «Mɨpaɨ kanaineni Yawé Naimekɨmɨtɨrɨkaɨye: »“Xɨka ne'aitsikatetsie yapetikamieni, meta xɨka mawari wewiwame pehɨkɨtɨtɨ peraye'atɨani, hikɨ 'ana netukita pepɨtita'aita meta netakwa hepaɨtsita mieme pepɨti'ɨwiyani. Ne 'ena tixaɨtɨ nepɨmatihɨritɨani 'ena memu'uwa 'ikɨ wahamatɨa.

⁸ »”Kutsuhexi, keneneu'eni, mawari wewiwamete tiwa'aitɨwame, meta 'a'iwama meke'u'enanani, 'ahɨxie memayaxike, xeme xekani'inɨaritɨni kemɨtiyɨni: Neti'uximayatsiriwame nekani'atɨaximeni, nekani'atɨaximeni Meukuyɨraxɨ.

⁹ Kutsuhexi, tete keneuxeiya 'ahɨxie nemitaye. Mɨkɨ hetsie hɨxite 'atahutatɨ patei, mɨkɨtsie nepɨreu'utɨani. Xeitukaritsie kwiepa memɨtama ke'axamemɨte'uyuri nepɨtiwaranuyeitɨirieni —mɨpaɨ kanaineni Yawé Naimekɨmɨtɨrɨkaɨye—.

¹⁰ »”Mɨkɨ tukaritsie, yuxexuitɨ xekaniwata'iniexɨakuni yu'iwama kaxie hetɨa xemɨtitenikɨ meta piní hetɨa, mɨpaɨ kanaineni Yawé Naimekɨmɨtɨrɨkaɨye”».