Kwikari 6 - Kakaɨyari Niukieya

Yunaitɨ kwikarɨwame

¹ ¿Kekuta reuyunixɨ 'uki peminaki'erie, 'uka yemekɨ witsipemɨti'ɨimari? ¿Hakewa kuta petɨa? 'Ahamatɨa te'uhutɨ tepiwauyu.

'Uka mɨnaki'eriwa

² 'Uki neminaki'erie kaneyani yuharawerita, waritsamu muye'etsietsie, muwa mɨtiwaikakɨ, tuturi 'atsutsena tipinike.

³ Ne 'uki neminaki'erie hetsiemieme nekanihɨkɨtɨni, 'uki neminaki'erie nehetsieta kanimiemetɨni, Mɨkɨ yumuxatsima tuturi 'atsutsena tsata kaniwarutihɨweni.

'Auxɨwirieka Kwikari 'Uki mɨnaki'eriwa

⁴ 'Ekɨ 'uka nemɨmatsinaki'erie, witsipepɨti'ɨimari kiekari Tiritsa hepaɨ, witsipe'anetɨ kiekari Kerutsareme hepaɨ, pemɨmariwe xurawetsixi wahepaɨ.

⁵ Kwi pepɨkanetsixeiyaniri, nepeɨxɨyarie 'ahɨxite netsixeiyakaku. 'Akɨpate tsipuri xeitewayari wahepaɨ pɨtiyuxexeiya memuyuhayatɨwe Karaha hɨriyaritsie.

⁶ 'Atamete tsipuri 'ukari tɨɨrixi wahepaɨ pɨ'anene hekwamekɨ memuti'ɨwaxɨ. Yuxexuitɨ mɨkɨ mepuyuhuhuta, xewitɨ yuxaɨta pɨka'uyeika.

⁷ 'A'aurite pemeuyukunama warita manitsana hepaɨ pɨtiyuxexeiya.

⁸ Tsepa haika tewiyari 'ukari te'aitamete wa'ɨitama memakɨne, tsepa nauka tewiyari 'ukari memɨhɨkɨ ti'aitame hutarieka 'ɨitamama tsepa mekate'inɨaritɨ 'ukari 'ɨimarixi,

⁹ peru xewitɨ hɨkɨa xeikɨa kanihɨkutɨni nekukuru 'etsimupe witsimɨti'ɨimari, 'uka kwinie maamaya mɨtinaki'erie, 'aixɨa mɨtixeiya mitiniwexɨ. Hipatɨ 'ukari kepauka memixeiya 'aixɨa mepɨtehehɨawe, 'ukari te'aitamete wa'ɨitama witsimemɨ'anene meta hipatɨ 'ukarawetsixi ti'aitame hutarieka 'ɨitamama mekaninɨawani.

Yunaitɨ kwikarɨwame

¹⁰ ¿Kemɨ'ane 'ikɨ pɨyɨane witsi'anetɨ tau 'ɨrɨya hepaɨ? Witsikani'aneni metsa hepaɨ, xawatɨtɨ tau hepaɨ, mariwetɨ xurawetsixi muyuawitsie memeukatei wahepaɨ.

'Uki mɨnaki'eriwa

¹¹ Nekaneyani kariu haraweriyari muyema nemɨtixeiyakɨ hekwamekɨ mayeweritsie mɨtiyɨyɨra, ne'ixeiyamɨtɨ kaxie mɨyɨyɨra, meta manitsana kɨyeyariteyari muxutu.

¹² 'Atsinekareyutimaiwekaku, netemawierikakɨ kauka kaxetatsie nenekaya, takiekaritsie ti'aitame kaxetayatsie.

Wahamikuma

¹³ Keneukunua, 'uka Tsurami kiekame keneukunua, keneukunua tahamatɨa keneuyeikani, tepɨmatsiheuxeiyaku. ¿Titayarikuta 'uka Tsunami kiekame xeteheuxeiyaku, neiya hutakɨa yu'utɨma mehewetɨkaikaku miemetsie hepaɨ?