Kwikari 2 - Kakaɨyari Niukieya

'Uka mɨnaki'eriwa

¹ Ne tuutu Tsarunitsie mayeweri mɨxuawe nekanihɨkɨtɨni, xewitɨ tuturi texuxuri mayeweritsie mieme.

'Uki mɨnaki'eriwa

² 'Uka neminaki'erie, kepauka hipame 'ukarawetsixi watsata muyeika, tuturi texuxuri xuyatsata muwe hepaɨ katiniyuxexeiyani.

'Uka mɨnaki'eriwa

³ 'Uki neminaki'erie kepauka hipame 'ukitsi watsata muyeika, xikɨti 'ɨtsitsata mɨkawe hepaɨ katiniyuxexeiyani. Kaneninakeni hetɨana nemɨ'etɨpieka, witsikatinakakani takariyari.

⁴ Kanenewitɨni kiita 'ixɨarari muwatiwewiwatsie, muwa yunaki'eriya 'inɨariyari kaniwarepitɨani.

⁵ Kaxie takari patsaruyarikɨ keneneutatɨrɨkariya, manitsanakɨ keneneutahuxaitɨa, nekanimɨximeni naki'eriyakɨ.

⁶ Mamaya 'utatana miemetsie nemu'u mɨniuka'uxipitɨanike, meta yutserieta miemekɨ kwimɨneniukwenike.

'Uki mɨnaki'eriwa

⁷ Ne mɨpaɨ nepɨtixewawirie, 'ukarawetsixi Kerutsareme kiekatari, maxatsi 'ɨimarixi yeuta memu'uwakɨ, 'uka neminaki'erie xepɨkahehɨtɨaka xepɨkahei'uximatɨaka tsepa kepaukake yukɨmana manutanierixɨ.

Hutariekamieme Kwikari 'Uka mɨnaki'eriwa

⁸ 'Uki neminaki'erie hiwarieya. Neuxei, 'ena kanamieni, 'utsunarɨmetɨ hɨritetsie, 'anutitsukwakatɨ hɨri 'amɨnenetsie.

⁹ 'Uki neminaki'erie maxa hepaɨ katiniyuxexeiyani, maxa temaikɨ hepaɨ kani'aneni. Paratsɨ xekeneuxeiya, takiiwarie warita kaniutiweni, 'awienierenetɨ maxawariyarietɨkata, yɨkɨ'ɨwiyatɨ mayexaxawata.

¹⁰ 'Uki neminaki'erie mɨpaɨ kanetiniutahɨawe: «Kenanukukexi 'uka nemɨmatsinaki'erie, hikɨmɨ kenewaye'a, 'uka witsipemɨti'ɨimari.

¹¹ Neuxei, kananuyeyaniri xexerixa, hamatɨanata kaniutanɨni wiyeri.

¹² Yeuta 'ari tuturi kanitineikani, kwikari tukariyari kanaye'aniri. 'Ariri naitsarie kwiepa kani'eniɨriɨkɨni kukuruxi memeɨyɨyɨxawi wakwikari.

¹³ 'Ariri piní matɨari mieme takariyari kanixuaweni, 'Ari kaxie xututɨ witsikaniukɨ'ɨareni. Kenanukukexi, 'uka nemɨmatsinaki'erie, nehetsɨa kenaye'a, 'uka witsipemɨti'ɨimari».

'Uki mɨnaki'eriwa

¹⁴ Nekukuru pemeutuxa, 'ai mukatataritsie pemuyu'awieta, meta hɨri 'amɨtiumariwetsie paitɨ, kenanieri nepɨmatsixeiya, keneutaniu nepumatsi'enieni, 'aniuki 'aixɨa kanimayaka meta witsipekatini'axexeiyani.

'Uki meta 'uka memuyunaki'erie

¹⁵ Kauxaitsi xekeniwarutiwiya, mɨkɨ kauxaitsi tɨɨrixi takaxie memɨtsewixima, takaxie haraweriyari xuturiyari.

'Uka mɨnaki'eriwa

¹⁶ 'Uki neminaki'erie nehetsiemieme kanihɨkɨtɨni, neta hetsiena mieme, mɨkɨ yumuxatsima kaniwarutihɨweni tuturi texuxuritsata.

¹⁷ Tau ka'akayuniwekaku 'akuxi meta 'etɨri ka'akumaweriwekaku 'akuxi, nehetsɨa kani'axeni, 'uki neminaki'erie. Maxa hepaɨ katiniunanautsani, maxa temaikɨ hepaɨ, hɨritsie paitɨ.