Kwikari 1 - Kakaɨyari Niukieya

¹ Tsarumuni kwikarieya xapayari.

'Uka mɨnaki'eriwa

² Xɨka, penetsi'u'itsenike 'ateni kemɨtiyu'itsewekɨ, matsi 'aixɨa pɨ'ane 'anaki'eriya, keyuri winu.

³ Witsimu'ɨata pemɨ'akawiriwa, yemekɨ puwanake, 'ekɨtɨtɨ pekanihɨkɨtɨni waritsamu witsimu'ɨa. Kauka 'ayumieme 'ɨimarixi memenenaki'erie.

⁴ Kene'amexɨitɨaka, 'ahetsiemieme yemekɨ kenenayeitɨa. Kenenanuwitɨki pemuyehuputsie, ti'aitame. Tepuyutemamawieka ta'iyarikɨ teyunaitɨ, tepiku'eriwani kepemɨti'amaɨwa keyuri winu. Titakɨ mɨmatinaki'erieka panayuhayewa.

Wahamikuma 'Uka mɨnaki'eriwa

⁵ 'Uka mɨyɨwi nepɨhɨkɨ, peru witsinepɨti'iɨmari, 'ukari 'aku Kerutsaremetari, nekaniyɨwini Tseraxi teɨteriyari waxamaru hepaɨ, witsinekatini'ɨimarika Tsarumuni 'ixuriki kiiyarieya hepaɨ.

⁶ Newaiyaritsie xepɨkanetsixeiyani nemɨyɨwikɨ, tau nenawiyari mɨyakaniuyurieni. Ne'iwama 'ukitsi mekaneniuyeheka, kaxie haraweriyari 'ɨwiyariyarikɨ mekaneniuta'aitɨani waɨriyarika, meta nekaxie 'aixɨa nepɨkatiɨ'ɨwiyaxɨ.

⁷ Kenetineutaxatɨa, 'uki nemɨmatsinaki'erie, ¿hakewa 'amuxatsima pepɨwaretihɨwe? ¿hakewa tuka pepɨwareti'uxipitɨwa? ¿Ne titayari netikuyeika xeikɨa, 'ahamikuma wamuxatsima wahamatɨa?

Wahamikuma

⁸ Xɨka 'atsipekatimaika, 'uka witsipemɨti'ɨimari 'ukari watsata pe'uyeikatɨ, muxatsi waketate kemɨreuyuyune kenanukuweiya meta 'atsipuri tɨɨrixi keniwahɨneni, muxatsi wahɨwemete wakii maku'utsie.

'Uki mɨnaki'eriwa

⁹ 'Ekɨ meta kepemɨreuyukuniɨtɨa, 'uka nemɨmatsi naki'erie, Kawayutsixi nepɨwaraye'eriwa witsimemɨtehekɨniɨtɨarietɨka yumu'uyaritsie Parahuni kaxetaya memuhaxime.

¹⁰ Witsipɨtiyuxexeiya 'a'aurite meta kepemɨti'akutsa'a. 'Akɨipi witsipɨtiutimerɨka 'akukakɨ.

¹¹ 'Anakɨtsa tepɨtiwewieni hurukɨ meta pɨratakɨ.

'Uka mɨnaki'eriwa

¹² Ti'aitame mexi mexatsie 'utika, witsimu'ɨa nemɨnetawiri kaniɨkɨ'ɨareni hetsiena.

¹³ 'Uki neminaki'erie, mixaxi witsimu'ɨa purutsata mɨyeka hepaɨ kani'aneni, netawitsie kaneukukutsuni neheikukwekaku.

¹⁴ 'Uki neminaki'erie, 'aukwe tuturiyari witsimu'ɨa hepaɨ kani'aneni 'Enikaritsie kaxie 'iteɨriyari hepaɨ.

'Uki mɨnaki'eriwa

¹⁵ Kwinimieme pepɨti'ɨimari, 'uka nemɨmatsinaki'erie. Witsipepɨ'ane. 'Ahɨxite, kukuruxi memɨyuhuta wahepaɨ pɨtiyuxexeiya.

'Uka mɨnaki'eriwa

¹⁶ Kwinimieme pepɨtitemaikɨ, 'uki nemɨmatsinaki'erie. Yemekɨ 'ekɨ pepɨnetsinake. 'Ɨxa mɨtsitsiɨrawi ta'itari kanayeimɨkɨ kepauka temɨyutiwitɨnitsie,

'Uki mɨnaki'eriwa

¹⁷ takii pikaxiyari kariuxa kanihɨkɨtɨni Huku mɨxexeurawi xawarikɨ kananukakitsieka.