Kuwi 34 - Kakaɨyari Niukieya

Hutarieka 'Erihú kemutayɨ

¹ Metatsiere 'Erihú mɨpaɨ kaniutayɨni:

² «Xeme temaiwawemete, neniuki xekeneu'eni, xeme 'ɨxatsitɨariekate, yemekɨ xekeneneu'eni.

³ Naka 'enakareme niuki puwata'inɨnɨata, neni 'ikwai mɨrewata'inɨnɨata hepaɨ.

⁴ Teyunaitɨ 'ikɨ mɨyamɨti'ane tepeitimaixɨani, yatepɨtiyuani teyunaitɨ tita matsi 'aixɨa mɨti'ane.

⁵ »Kuwi mɨpaɨ putaine: “Ne 'axanepɨkatiyuruwame, matsi Kakaɨyari nehetsie 'aixɨa mɨtiyurieni pɨkayuwaɨriya.

⁶ Mɨti'itawa nekani'eriwanitsɨari, tsepa tewi heitserie nemexeiya nemɨhɨkɨ, 'ɨrɨteya 'ari pɨnetsimiexime, tsepa 'axanekatiuyuri”.

⁷ ¿Hakewa xewitɨ Kuwi hepaɨ 'anetɨ peyeika, yunanaimarika haretɨ haa hepaɨ?

⁸ Kaninakeni 'axateyuruwamete muwatemawiekakɨ meta 'axamemɨte'u'iyari muwanɨkakɨ.

⁹ Meta mɨpaɨ putaine kename tewi tixaɨtɨ kara'iwa Kakaɨyari naki'eritɨatɨ xeikɨa xɨka 'uyeikani.

¹⁰ »Teɨteri xemɨtemaiwawe xekeneneu'eni: Kakaɨyari 'axamɨtiuyurieni pɨkayɨwe, meta Naimekɨmɨtɨrɨkaɨye kemɨkatiheitseriekɨ yapɨkatiyurieni.

¹¹ Kakaɨyari tewi kemɨtiu'uximayataxɨkɨ yapɨrekapitɨwa, kemɨreuyewetse hetsiena yapɨtiyuriene.

¹² Mɨpaɨ tepɨkateku'eriwani kename Kakaɨyari kemɨkatiheitserie tiyuriene. Naimekɨmɨtɨrɨkaɨye heitserie kemɨrexeiya pɨka'anutuna.

¹³ ¿Kemɨ'ane kwiepa tɨrɨkariyaya pipitɨa? ¿Kemɨ'ane penukake kwiepa mɨti'ɨwiyanikɨ?

¹⁴ Xɨka mɨpaɨ tiu'erieni kename yu'iyari tatsinawairieni, yu'iiya xɨka tatsi'unawairieni kɨmana tukari temexeiyakɨ,

¹⁵ yunaitɨ teɨteri mekaniukumaweriweni, yunaitɨ tumuanari mekanakɨniwaweni.

¹⁶ »'Ikɨ ketineu'eni, xɨka yurikɨ petimaiweni, yemekɨ keneu'eni kenemɨtayɨni.

¹⁷ ¿Tiyɨwekuta tita mɨtiheitserie tixani'erietɨ mɨtiuta'aita? ¿Kamɨtsɨ Kakaɨyari heitserie mexeiya mɨtɨrɨkaɨye hetsie perahɨani,

¹⁸ kemɨ'ane te'aitamete memamariwaweme mɨkawarayeitɨa meta memɨtɨrɨkawi yatiwakɨhɨawetɨ 'axakememɨteyuriekɨ?

¹⁹ Kakaɨyari te'aitamete mexɨakate xeikɨa waɨkawa pɨkawaparewie, meta xikutsixi xeikɨa pɨkawaparewie tixaɨtɨ memɨkateheuxeiya kawanaki'erietɨ. Yunaitɨ matsi mɨkɨ 'iwewarimama mepɨhɨkɨ.

²⁰ Yapauka tɨkari hixɨapa menitakukuweni, teɨteri mekanitiyɨyɨakani marikakɨ mekanitakukuweni, Memɨmamariwawe mekananakaxɨriwani teɨteri 'atsimekateyuriekaku.

²¹ »Kakaɨyari hɨxiteya teɨteri wahuye pɨwaxeirie, mɨkɨ yuxexuitɨ kememɨte'u'uwa pɨ'ɨwiya.

²² Pumawe yɨriya meta 'etɨri 'emayetsuye 'axateyuruwamete mɨwati'awietakɨ.

²³ Kakaɨyari mitixeiyaxɨani pɨkaheuyewetse kepauka muwata'iwawiyakɨ.

²⁴ Pɨkati'iwauni 'akuxi memɨmamariwawe muwaranakaxɨrienikɨ, meta hipame pɨta muwaranuti'uitɨanikɨ.

²⁵ Kakaɨyari naime katinaka'utɨwani kememɨteyurie, yɨwikɨta kaniwaratixɨrɨwani meta kaniwatiketsinani,

²⁶ putiwaruka'enitsitɨwa ke'axamemɨte'uyurikɨ yunaime teɨteri wahɨxie,

²⁷ me'iweiyatɨ memɨte'uhayewaxɨkɨ 'aitsikaya memɨka'anuku'erikɨ.

²⁸ Hetsɨana paitɨ memiye'atɨakɨ tixaɨtɨ memɨkatehexeiya meta memɨteheuyehiwa wahiwari, hikɨ Kakaɨyari kani'enieni.

²⁹ ¿Matsi kepaikɨ hetsiena pɨrahɨawe xɨka mɨkɨ kayuwatɨ tiuyerɨni? ¿Kepaikɨ pixeiyawe xɨka yunierika 'awietani? Mɨkɨ yunaime teɨteri meta wakiekari waheima pɨkawe,

³⁰ 'axamemɨte'u'iyari memɨkate'aitanikɨ meta teɨterimama waruwiniyakɨ.

³¹ »Xɨka 'ipaɨ petitahɨawe: “Yurikɨ ne'axanepɨtiuyuri, tawariri 'axanepɨkamatitahɨawe.

³² Yakenetineuta'ɨkitɨa tita 'akuxi nemɨkatixeiya, xɨka 'axanetiuyurieni, tawariri mɨpaɨ nepɨkatiyurieni”.

³³ ¿Kakaɨyari metiupitɨawe, 'ekɨ kemɨmatinake, tsepa 'ekɨ pemɨka'itanaki'eri? Ne nepɨkahɨkɨ yanemɨtayɨni, matsi 'ekɨ pɨta, 'ayumieme yakeneutayɨki kepemɨtiku'eriwa.

³⁴ »Memɨtemaiwawe yamekenete'utahɨawe meta xeme xemeti'enatɨkɨka xemɨnetsi'enie:

³⁵ “Kuwi 'atsikatimaitɨ putaine, niukieyatsie pumawe meitimaitɨyanikɨ”.

³⁶ Kuwi keheutixeiyariexɨani, 'axatiyuruwame hepaɨ kaniutayɨni.

³⁷ 'Axatiuyuriekatɨtɨ tawari 'akuxi mɨkaheu'ena kanayuyeitɨwani, meta 'akuxi tahɨxie kataniyuriyani, metatsiere Kakaɨyari hepaɨtsita waɨkawa 'axakaniutayɨni».