Kunatsi 2 - Kakaɨyari Niukieya

Kunatsi kemɨtiuyunenewi

¹ Hikɨ Kunatsi Yawé yukakaɨyari kaniutahɨawe ketsɨ 'amupa yuriepa paitɨ yekaitɨ.

² Mɨpaɨ kaniutayɨni: «Waɨkawa neyuhiwerietɨ Yawé neputahiwi, hikɨ mɨkɨta pɨnetsi'uta'ei. Kepauka 'aritɨtɨri nemɨmɨkikai parewiya nekaniuta'iwauni, 'ana 'ekɨ nehiwari pepu'eni.

³ 'Emeukatewatsie pepɨnetsiheukahɨa, haramara hixɨapa, haa mɨtɨrɨkaɨye pɨnetsikurupanekai, naitɨ 'ahamewari neheima puyekɨkakai.

⁴ 'Ana mɨpaɨ nepɨtiu'eri: “'Ahɨxie nemɨka'uyeikanikɨ nepayeweiyarie. ¿Keneyɨanetɨ nepunuani tawari nemixeiyanikɨ 'atuki mɨpatsie?”

⁵ Naitɨ nepukayunixɨ, haramara 'ameukatewa pɨnetsi'anukanakai, tupiriya hata mieme nemu'utsie pekutsetsewekai,

⁶ nepukurupirɨmekai hɨri muyu'utɨkatsie hata paitɨ. Neheyemekɨ neheyame nepɨne'eriekai, nemanuani nepɨkaheyɨwekai. Yawé nekakaɨyari, peru 'ekɨ netukari peputawikweitsitɨa.

⁷ »Kepauka 'ari nemɨmɨximekai, Yawé nepaye'eri, hikɨ 'ekɨta nenenewieri pepu'eni, 'atuki mɨpatsieta paitɨ pepi'eni.

⁸ »Tetexi kakaɨyarixiyari memɨwarayexeiya 'anaki'eriya mepɨku'eiri.

⁹ Ne matsi, mawarite nepɨmatsiwewirieni, meta nɨawari 'ahetsiemieme nepɨyetuani. Nepɨraye'atɨani kenemɨmatiutahɨawixɨ. 'Ekɨ xeikɨa, Yawé, wikweitsitɨarika pemexeiyakɨ».

¹⁰ Hikɨ Yawé ketsɨ 'amɨpa katiniuta'aitɨani Kunatsi mɨhayanikɨ hatetsita paitɨ.