Keremiyaxi 4 - Kakaɨyari Niukieya

¹ Yawé mɨpaɨ kanaineni: «'Ixaheri, xɨka penuamɨkɨ nehetsɨa, kenenua nehetsɨa. Xɨka nehɨxie kakaɨyarixi pewarexɨrieni memɨxani'eriwa meta xɨka pekanetsi'uku'eirieni,

² xɨka yurikɨ, 'aixɨa 'anemekɨ meta heitseriemekɨ, yape'utayɨni: “Yurikɨ Yawé 'amuyeikakɨ”, hikɨ, “hetsiena mieme nuiwarite 'aixɨa me'itɨarietɨ mepakɨne, meta me'inɨawatɨ mepakɨne”».

³ Yawé mɨpaɨ kanaineni Kura meta Kerutsareme kiekatari wahetsiemieme: «Xekenekwietsanatɨweni hakewa mɨkareka'etsitɨwetsie, meta xuyatsata xepɨka'etɨweni.

⁴ Kura kwieyaritsie kiekatari meta Kerutsareme, yu'iyaritsie xeketeneu'utɨa tɨratu 'inɨariyarikɨ: xitekiya 'inɨariyari xekeneuyuwewiri Yawé xemayexeiyanikɨ, nɨkahɨrixɨa 'axaxemɨte'uyurikɨ nehaxɨa 'utani tai hepaɨ kayutɨnɨatɨ xe'utitaiya.

Kura kemɨtika'unarienikekai

⁵ »'Ikɨ xeketenetaxata Kura kwieyaritsie, meta xeketenetaxata Kerutsareme kiekariyaritsie. 'Awa xekeneutahɨtsi naitsarie 'ikɨ kwieyaritsie. Kwi mɨpaɨ xeketeneuhiwa: “Xekeneuyukuxeɨri meta tekaneutahaxɨakuni kiekarite yukuraru 'ahatitetewame mexeiyatɨkata”.

⁶ Tsiyuni xekeneutamawiya paterakɨ memuyuta'unakɨ, hakewa xemeyuti'awieta xekeneutiwawa, kayuwatɨ xepɨkate'uka. Ne xeyetatsie nekanekanetɨamɨkɨ 'uximatɨarika meta tiyu'uname mariweme.

⁷ Maye yuterɨta kanewayeyaniri, xewitɨ nuiwarite 'uname kanayeyaniri, yukie kanayeyaniri 'akwie 'akumaweme mɨhayewakɨ, 'akiekarite 'u'unitɨ kaniyuhayewamɨkɨ meta yemekɨ kiɨripa kanayeimɨkɨ.

⁸ 'Ayumieme, hiwerika kamixayari xekenanakatɨxɨa, xekeneutitsuanani xeyu'iyaritɨatɨ, karikɨ Yawé haxɨaya mɨtiyukwaxiya 'akuxi tahetsie pɨkahayeyeiwe.

⁹ »'Iya tukaritsie ti'aitame peuyuyehɨani meta teɨteri wahetsiemieme memanuyetei mepeuyuyexɨrieni, mawari wewiwamete waɨkawa mepɨtimamani meta Kakaɨyari niukametetemama mepɨkatexatawaweni», Yawé mɨpaɨ kanaineni.

¹⁰ Ne mɨpaɨ nekaniutayɨni: «Neuxei, Yawé nekakaɨyari, pepɨwakwamanane 'ikɨ teɨteri meta Kerutsaremetari. Mɨpaɨ peputayɨ: “Kayuwatɨ mepexeiyani”, peru xɨari 'ixipara wakɨipitɨa peuwe».

¹¹ 'Iya tukaritsie mɨpaɨ mepɨtetahɨawarieni 'ikɨ teɨteri meta Kerutsaremetari: «Hɨrite mɨmeetse makumawetsie mɨtiteitsie paitɨ 'eka xɨkatɨ pataneika neteɨterima wakiekari nemɨnaki'erie makuma hepa 'erietɨ. Mɨkɨ 'eka tihename pɨkahɨkɨ meta tɨriku hename pɨkahɨkɨ,

¹² 'eka nemanɨ'ani mɨpaɨ pɨka'ayumieme mɨkɨ matsi waɨkawa pɨtɨrɨkaɨye, karikɨ ne yanekanitayɨmɨkɨ wahetsie nekatiniɨhɨamɨkɨ».

¹³ Xekeneuxeiya hai hepaɨ 'a'ahume. Kaxetamama wiyeri mɨtɨrɨkaɨye hepaɨ pɨtiyuxexeiya. Kawayutsiximama kwinimieme matsi mepayɨwawe kwixɨtsi kememɨkahayɨwawe. Xɨa'ui tame. Tame tepeuyexɨri.

¹⁴ Kerutsareme, 'a'iyaritsie keneu'a'iti 'axamɨti'anekɨ, pemɨtawikweitsitɨarienikɨ. ¿Kepaukake pepɨtihayewa 'iyaritɨarika kemɨmatikuyuitɨwa?

¹⁵ Xewitɨ pahiwa 'uximatɨarika haxaxatatɨ Rani kwieyaritsie paitɨ meta 'Epɨrahini hɨriyaritetsie paitɨ.

¹⁶ «Xekeniwarayehɨtɨa nuiwarite, xeketeneutaxata Kerutsareme kiekariyaritsie: “'Ateewa kiekatari mepɨ'axɨani memɨtatsi'anutinanikɨ kuyaxa hepaɨ mete'uhiwatɨ Kura kiekariteya hepaɨtsita”.

¹⁷ Mepaketɨkɨ waritana 'etsiya mɨhɨrieka hepaɨ, netsi'aye'unietɨ matɨakɨ —Yawé mɨpaɨ kanaineni—.

¹⁸ Kepemɨtiuka'iyari kepemɨtiyuriene 'ayumieme 'ikɨ mɨya pepɨranuyemie. 'Ikɨ 'a'uximatɨarika kanihɨkɨtɨni. Kwinimieme pɨratsiwi. Pɨmatikwinitɨa 'a'iyaritsie».

¹⁹ Waɨkawa nepɨnehiwerie, nepɨtiuka'eniwa. Kukuiniya pɨnetsi'uta'ɨimura. Ne 'iyari puwatayuane. Xɨa'ui ne'iyari. Kayuwatɨ nemɨtiuyerɨni nepɨkayɨwe. Nepi'enie 'awa metahɨtsieriwa meta hiwari mɨrayukwine mieme.

²⁰ Xɨka tiuyutakwini tawarita pɨtiyutakwini, naitɨ 'ikɨ kwieyari pɨka'unariexime. Yapauka puka'unarie ne'ixuriki kiiyari hakewa nemayekatei.

²¹ ¿Kepaukari tamɨ patera kayuwatɨ pɨtamare meta 'awa hetahɨtsieriwatɨ?

²² «Neteɨterima mepɨka'u'iyari, mepɨkanetsimate, tɨɨri 'atsimemɨkatemate mepɨhɨkɨ memɨkatemaiwawe. Kwinimieme mepanayeyɨne 'axamemɨteyurienikɨ, 'aixɨa memɨteyurienikɨ mepɨkamate».

²³ Kwiepa nepeukanierixɨ, kwie pɨkamatsiɨkɨkai puyuxamuriekai, muyuawitsie nepeutinierixɨ, manatatsiere naitɨ pɨyɨwikai.

²⁴ Hɨrite nepuxei, puyɨyɨakatɨkatei, naitɨ yemurite pɨti'unikekai.

²⁵ Nemunierixɨ, xewitɨ tɨma pɨkayuhayewanekai, yunaitɨ wikixi mepeuyuta'unaxɨakai.

²⁶ Nemunierixɨ, kwie 'aixɨa mɨ'ane makumawe pɨhɨkɨtɨkai, naitɨ kiekarite 'u'unitɨ puyuhayewanekai, Yawé mɨyamɨtiuyuriekaikɨ, haxɨaya mɨtiyukwaxiyakɨ.

²⁷ Yawé mɨpaɨ kanaineni: «Naitɨ 'ikɨ kwieyari 'akumawetɨ kanayeimɨkɨ, peru naimeta nepɨkaka'una.

²⁸ 'Ayumieme 'ikɨ kwieyari puyuhiwerieka, meta muyuawi meutitewatsie pɨkɨyɨre, 'ari mɨpaɨ nekaniutayɨni, nepɨkatihayewa, 'ari mɨpaɨ nepɨtiu'eri, ne'ɨtɨa nepɨkatayani».

²⁹ Tupikɨ temɨmɨmete meta kawayutsixi wahetsie memutei wayuariya me'enietɨ yunaitɨ kiekatari mepɨtananautsa. Hipatɨ 'ɨtsita mepɨtahake, hipatɨta 'aitsie mepeutiwɨwɨre. Naitɨ kiekari puku'eiriwaxɨ, xewitɨ tɨma kiekame pɨka'uyuhayewaxɨ.

³⁰ ¿Kepetiyurimɨkɨ, kiekari pemuka'unarie? ¿Titayari 'ixuriki witsimɨtixeta peranakatɨkɨ? ¿Titayari huru pereukapine? ¿Titayari 'ahɨxita perayu'utɨwa? Yakɨ xeikɨa witsipepɨ'akuyuruwa, karikɨ 'atuxexerima mekamenixani'erieka, mepiwautɨwe xeikɨa kememɨmetemienikɨ.

³¹ Hiwari nepɨ'enie, niweyame hiwarieya hepaɨ 'anɨyɨneme, 'aiwarika matɨari mɨniweneni 'aiwarikaya hepaɨ 'anɨyɨneme. Tsiyuni witsimɨti'ɨimari 'aiwarieya kanihɨkɨtɨni, waɨriyarika meka'ietɨyeika, yumamá 'utatsetseratɨ mɨpaɨ mutaine: «Xɨa'ui ne, nepɨmɨximeri. Teyumiekate 'ari mepɨnetsiwiya».